مسحراتى الأحزاب

اصحى يا نايم.. وحد الدايم.. رمضان كريم.. اصحى يا أحزاب مصر المحروسة.. واسمعى الحدوتة.. حدوتة مصرية.. فى الطريق جاية.. ووحدى الرزاق..اصحى يا محمود بك يا أباظة.. وشوف الوفد بتاع زمان.. راح منك فين يا غفلان!..
اصحى وحد الدايم وقول نويت الصيام.. عن سماع كلام الحكومة.. وقفل باب الرجولة عن كل مشتاق للمعارضة والكفاح.. زى أيام عمك مصطفى النحاس.. اصحى يا نايم.. ورمضان كريم!! اصحى يا دكتور رفعت السعيد.. ووحد اللى لا يغفل ولا ينام.. وقول نويت الصيام.. عن لعب الثلاث ورقات مع المباحث والإخوان.. وحزب الحكومة المتلمع.. ونسيت يا نايم حزب التجمع.. اصحى وصلى على النبى المختار.. وسيب ولادك تشتغل وهى اللى تختار.. وكفاية عليك المشوار.. اصحى يا دكتور.. ورمضان كريم!!
اصحى يا دكتور..يا غزالى حرب وقوم من سريرك المفروش بالورد.. وقول نويت الصيام عن كتر الكلام.. وشوف عدد أعضاء حزبك بقوا كام.. وانزل يا غزال وحارب مع الجبهة.. لاجل ربنا يقبل صيامك وتدخل الجنة..
ووحدالدايم.. ورمضان كريم!وانتم يا بقية الأحزاب.. ياللى ما نعرف لكم اسم أو عنوان.. اصحوا من النوم.. وقولوا نوينا الصيام عن أخد منح الحكومة.. واتفقوا يرحمكم الله على منع التزوير.. ووقف التوريث.. اصحوا يا ولاد المحروسة.. لاجل بلدكم تفضل محروسة.. ووحدوا الرزاق.. رمضان كريم.
محمد حرش بلبيس - شرقية