اصحى يا نايم

اصحى يا نايم وحد الدايم.. رمضان كريم.. اصحى يا أحزاب مصر المحروسة.. واسمعى كلام أولادك الأحرار اللى ألسنتهم مخروسة.. بفعل فاعل لاجل تفضلى يا أحزاب مصر محبوسة.. ووحدى الرحمن!!.. اصحى يا سيد يا بدوى.. دا إحنا كنا فى انتظارك من بدرى.. اصحى وصحصح معاك الوفد ورجع لنا «يحيا الوفد ولو فيها رفد».. ووحد اللى لا يغفل ولا ينام.. اصحى وحط إيدك فى إيد الكل.. ولا يهمك يا محترم من كلام اللى عندهم غل.. اصحى ووحد الرحمن!!..
اصحى يا عم رفعت يا سعيد يا راجل يا شريف.. ووحد الدايم.. اصحى وارحمنا من زعلك الدايم.. من الإخوان والبرادعى.. اصحى دا الوقت عمّال يجرى.. بلدك يا مؤمن على وشك التوريث.. اصحى يا أبواليسار يا مناضل.. ووحد الرحمن!!.. اصحوا يا اولاد عبدالناصر وبطلوا خناق على الكرسى.. ده لا بيزيد من قيمة الرجل ولا الحزب وحياة سيدى المرسى.. اصحوا ووحدوا الرحمن.. وقوموا كده وصهللوا من تانى زى أيام زمان.. اصحوا دا لسه فيه ناس بتحبكم وتجلكم من أيام عمكم جمال.. ووحدوا الرحمن!!..
اصحى يا دكتور أسامة حرب أنا عارف إنك عايز تخليها حرب.. وعارف إنك صاحى بس إنت يا مسكين عامل نايم.. اصحى يا دكتور وكتر من ولادك فى الجبهة.. أصل البلد محتاجة السنة دى واللى جاية نكون كلنا جبهة.. اصحى يا محترم ووحد الدايم!!.. أما انتوا يا باقى أحزاب مصر المحروسة.. عينا عليكم محروسة.. اصحوا.. اتكلموا.. اعملوا حاجة.. فكوا لسانكم ولسان ولادكم اللى على النظام مخروسة.. اصحوا يا أحزاب مصر.. حرام عليكم وكفاياكم نوم.. اصحوا دا البلد غرقت.. وشبعت نوم!!
بلبيس شرقية