وفّري وقتك في رمضان.. نصايح مهمة جداً لحفظ الأكل بطريقة صحية

النهارده هنعرف مع بعض إزاي تقدري تحفظي بعض الحاجات اللي بتستخدميها بشكل يومي في رمضان، زي الأرز والشعيرية...
وكمان الحلويات اللي بتعتبر من الحاجات المميزة لرمضان زي الكنافة والقطايف..
وهاقول لك على شوية نصايح تاخدي بالك منها وإنتِ بتحفظي الأكل في الفريزر؛ علشان يحتقظ بطعمه وقيمته الغذائية لأطول فترة ممكنة...

الأرز
علشان تحفظي منه كمية فكل اللي عليكِ إنك تجيبيه وتغسليه، وبعد كده تقلّبيه على النار مع كمية من الزبدة، لغاية ما المية اللي فيه تنشف، وبعد كده اطفي عليه وسيبيه يبرد، وقسّميه على أكياس بلاستيك مفرّغة من الهواء، وشيليه في الفريزر.
المكرونة ولسان العصفور والشعيرية
ممكن تعمليهم بنفس طريقة الأرز، بس هتقلّبيهم على النار مع الزبدة لغاية ما لونهم يبقى ذهبي، وبعد كده هتشيليهم بنفس الطريقة اللي قولنا عليها.

ممكن تجيبي كمية من الياميش وتحطيهم في أكياس بلاستيك في الفريزر
الياميش والمكسرات
بالنسبة لياميش رمضان سواء كان مشمشية أو تين مجفف أو قراصية أو المكسرات زي السوداني واللوز وعين الجمل، فإنتِ ممكن تجيبي منهم كمية وتحطيهم في أكياس بلاستيك وتشيليهم في الفريزر، وممكن إنك تخلطي كمية من المكسرات وتطحنيهم مع بعض، وتحتفظي بهم علشان تستعمليهم، وتحشي بهم الكنافة والجلاش والقطايف.
الجلاش والكنافة والقطايف
طبعاً كلنا بنستنى من رمضان لرمضان علشان ناكل الكنافة والقطايف والجلاش، وعلشان تكوني متطمنة إن كل حاجة جاهزة عندك ممكن إنك تجيبي منهم كمية قبل رمضان، وتقسّميهم وتحطيهم في أكياس بلاستيك بحيث إن الكمية اللي في الكيس تكفي لمرة واحدة، بس خلي بالك إنك قبل ما بتشيلي الكنافة بتفككيها من بعضها وبتقطعيها لقطع صغيرة.
وبالنسبة للقطايف فدي لازم تحشيها وتقفليها قبل ما تشيليها؛ لأنها لو اتجمّدت من غير ما تتحشي مش هتعرفي تحشيها بعد كده وهتلاقيها بتتفكك منك، وممكن تحشيها بمكسرات وزبيب أو تحشيها بجبنة قريش أو جبنة شيدر.
أما الجلاش فإنتِ بتجيبي لفات الجلاش وتحطيها في الفريزر زي ما هي، وقبل الاستخدام بتطلعيها وتسيبيها بره الثلاجة فترة، وبعد كده تبدئي تعمليها.

احشي السمبوسك ولفيها وشيليها في الفريزر
السمبوسك
بتجيبي السمبوسك وتحشيها بالحشو اللي إنتِ عايزاه سواء كان جبنة أو لحمة أو خضار ولفيها، وبعد كده ادهني سطحها بشوية زيت صغير، وقسّميها على أكياس بلاستيك مفرغة من الهواء، ولما بتيجي تستخدميها طلّعيها قبلها بساعة أو ساعتين وبعد كده اقليها في الزيت.
وبكده أعتقد إنك تقدري تحفظي الحاجات الأساسية عندك من قبل رمضان، ومش هتضيعي وقت كتير في تحضيرها أثناء الصيام، وهتكوني مستعدة لأي مفاجآت، وفي أقل من نصف ساعة ممكن يكون عندك وجبة كاملة عبارة عن خضار وأرز وسلطة وعصير وشوربة وطبق الحلو كمان.
وعلشان أكون عملت كل اللي عليّ تعالي أقول لك بعض النصايح العامة اللي من الأفضل إنك تاخدي بالك منها علشان عملية حفظ الطعام تتم بشكل صحي وسليم مية في المية...
احفظي كميات صغيرة:
حفظ الطعام وتجميده لو تم بالطريقة الصحيحة، بيحافظ على طعم الأكل زي ما كان طازة ومش بيغيّره، لكن إعادة تجميد الأكل بعد تسييحه بتخلّي طعمه يتغيّر، علشان كده من الأفضل إنك تقسّمي الحاجة اللي هتحفظيها على كميات صغيرة؛ بحيث إنك لما تيجي تستخدميها تستخدمي الكمية كلها وما تضطريش إنك تسيحي كمية كبيرة علشان تاخدي منها شوية صغيرين وترجّعي الباقي.
ومش بس كده ده كمان كل ما كانت الحاجة اللي بتحفظيها متقسّمة على كميات صغيرة ده بيساعد على إنها تتجمّد بشكل أسرع، والتجميد السريع للأكل بيساعد على إنه يحتفظ بطعمه والفيتامينات اللي فيه.

حفظ كميات صغيرة بيساعد على إنها تتجمّد بشكل أسرع
اتخلّصي من الهواء:
لو لاحظتي وإحنا بنتكلّم عن طرق حفظ أنواع الأكل المختلفة كنت في كل مرة باقول لك إنك لازم تضغطي على أكياس الحفظ بالراحة، وتتأكّدي إنك تخلّصتي من كل الهواء اللي فيه، وعلشان تعرفي أهمية الخطوة دي وما تهمليش فيها وإنتِ بتحفظي أكلك، لازم تعرفي إنك لو شلتي الأكل في الفريزر وكان فيه هواء زيادة بيخلي ملمس الأكل جاف وسميك وبيغير من طعمه.
سيبي مساحة فاضية:
لما تيجي تحفظي الأكل وخصوصاً الحاجات السايلة زي العصاير والشوربة، لازم تسيبي مساحة فاضية في الحاجة اللي هتحفظيه فيها سواء كان كيس بلاستيك أو علبة بلاستيك أو زجاجة، وده لأن الأكل لما بيجمد مساحته بتزيد، وبيكون محتاج لمكان علشان يتمدد فيه، ويفضل كمان إنك أول ما تحطي الأكل في الفريزر إنك تسيبي مسافة بين كل حاجة والتانية لغاية ما تحسي إن الأكل كله اتجمد، وبعد كده الزقيهم في بعض، وده علشان تسمحي للهواء البارد إنه يحيط بالأكل من كل الجوانب وبالتالي يتجمد بشكل أسرع علشان زي ما قلنا كلما كان التجميد أسرع كلما احتفظ الأكل بطعمه وبنضارته، ولما بتيجي تستخدميه بيكون كأنه طازة بالظبط.
سيبي الأكل يبرد قبل ما تجمّديه:
فيه بعض الأكلات زي ما قلنا بتكوني محتاجة تحفظيها بعد ما تسويها نصف سوا أو تغليها على النار لمدة خمس دقايق، والأكلات دي قبل ما تشيليها في الفريزر لازم تسيبيها برة الفريزر لغاية ما تبرد، وبعد كده تشيليها في الفريزر في علب أو أكياس بلاستيك.
اقرأ أيضاً:
* وفّري وقتك في رمضان.. طريقة حفظ الخضار والفاكهة والعصاير
* وفّري وقتك في رمضان.. طريقة حفظ اللحوم والشوربة والصلصة

ومن هنا للأسبوع الجاي لو عندك أي طريقة أو فكرة...
بتعمليها وإنتي بتحضري لاستقبال لرمضان...
يا ريت ما تبخليش علينا بها...
وابعتيها لنا علشان كل قراء "قمر 14" يستفيدوا منها...
سلام،،،