شرائح اللحم بصوص الفراولة

النهارده هنعمل مع بعض صنف جديد ولذيذ جدًّا..
وهو "شرائح اللحم بصوص الفراولة" اللي طلبتوها مننا..
وعلشان إحنا ما نقدرش نتأخّر عنكم وعن طلباتكم..
قررنا نقدّمها لكم في أسرع وقت..
يلّا بقى بسرعة ندخل على المطبخ ونحضّر حاجتنا..
علشان نعمل الطبق الجامد ده..
المقادير
شرائح لحم بقري "الكمية على حسب العدد"
عصير ليمونة
100 جرام زبدة
معلقة كبيرة زيت زيتون
50 جرام سكر بودرة
1/8 كيلو فراولة مقطعة لقطع صغيرة
2 معلقة كبيرة فلفل أسود مطحون
ملح
صوص بني
الطريقة
1- اخلطي الصوص البني مع الفراولة ونقطة من عصير الليمون، وحطيهم في طاسة على نار متوسطة لمدة 10 دقايق مع التقليب المستمر، لغاية ما تحسي إن الخليط كثافته زادت وبقى سمكه عامل زي المربى، بعد كده ارفعيه من على النار، وصفّيه كويس أوي، وسيبيه على جنب علشان يبرد، وبعدين ضيفي عليه الفلفل الأسود وباقي عصير الليمون.
2- سخني الزبدة على النار لغاية ما تسيح وتبدأ في الغليان، وبعد كده ضيفيها على صوص الفراولة، وبعد كده ارفعي الصوص على النار تاني، وسيبيه لغاية ما حجمه يقل، وتلاقي إن كثافة الصوص زادت.
3- في الوقت اللي بتكوني حاطة فيه الصوص على النار، ابدئي شوّحي شرائح اللحم في كمية قليلة من زيت الزيتون على نار عالية، وممكن ترشي عليها كمية صغيرة من الملح علشان اللحمة تتملح، وقلّبي شرائح اللحمة على الوجهين، وسيبيها لغاية ما اللحمة تستوي زي ما أنتِ عايزة.
4- قدّمي شرائح اللحم مع الصوص في طبق التقديم، وممكن تزينيه ببعض من شرائح الخضار الطازجة والفراولة، وبالهنا والشفا.
لتحضير الصوص البني
بتجيبي بصلتين وتفرميهم كويس، وتشوّحيهم في الزبدة على نار هادية لمدة 5 دقايق، بس خلي بالك إنك ما تغمقيش البصلة أوي، وبعد كده ضيفي على البصل معلقتين كبار دقيق، وقلبيهم مع بعض كويس على النار، واستمري في التقليب لغاية ما تلاقي إن الدقيق بقى لونه بني، بعد كده ضيفي كوبايتين من شوربة اللحمة على الدقيق، وقلّبي كل المكونات مع بعض كويس لغاية ما الشوربة تغلي، وبعد كده وطي النار، مع التقليب المستمر لمدة 20 دقيقة، لغاية ما تحسي إن الخليط بقى سميك، وفي الآخر ضيفي الملح والفلفل على حسب الطعم اللي إنتِ عايزاه، وعلى فكرة الكمية دي بتعمل تقريباً كوبايتين من الصوص، ولو عايزة تزوّدي الكمية ممكن تزوّدي في المقادير اللي بتحطيها.
يلّا بقى بسرعة ادخلي على المطبخ واعملي وصفة النهارده..
وبعد كده ابعتِ لنا وقولي لنا على النتيجة..
وكمان ما تنسيش لو عندك وصفة جامدة..
بتعرفي تعمليها وبتطلع معاكِ تحفة..
ابعتيها لنا على لينك..
"ورينا شطارتِك"
علشان ننشرها عندنا باسمك.. وكل أصدقائنا يستفيدوا منها
مستنيينك،،،