البيتزا والأكلات الإيطالية في بيتك ومن صنع إيدِك

البيتزا الإيطالي من الأكلات المحببة لينا كلنا، بس ماتعودناش ناكلها في البيت، النهارده جبنا لك طريقة سهلة لعمل البيتزا بإيديكي، وكمان جهزنا لك عزومة كاملة علشان تستمعي بالبيتزا مع كل اللي بتحبيهم.
عصير الجوافة بالليمون غني بالفيتامينات
عصير الجوافة بالليمون
المقادير
4 ثمرات جوافة منزوع منها البذر
2 ليمونة
كوب سكر
4 أكواب ماء
الطريقة
حطي كل المكونات في الخلاط واضربيهم لمدة من 3 إلى 5 دقايق، بعدين صفّي العصير وقدميه في كاسات فيها مكعبات تلج.

تُقدم سلطة الكول سلو باردة
سلطة الكول سلو بالكمثرى
المقادير
ثمرة خس كابوتشا مقطعة لشرائح
2 ثمرة كمثرى مقطعة قطع صغيرة
ملعقة كبيرة زيت زيتون
2 ملعقة كبيرة مايونيز
ملعقة صغيرة مستردة
2 ملعقة كبيرة خل
1⁄2 عصير ليمونة
رشة شطة
رشة سكر
الطريقة
1- لعمل الصوص: امزجي المايونيز مع المستردة والخل وعصير الليمون والزيت والسكر مع بعض كويس بمضرب اليد، وشيليها على جنب.
2- حطي الكابوتشا في طبق التقديم وضيفي عليها الكمثرى، وبعدين صبي عليهم الصوص وغلفيهم ودخليهم الثلاجة لمدة 30 دقيقة، وبعد كده طلعيها وضيفي عليها الشطة وقلبيهم مع بعض، وقدميها.. وبالهنا والشفا.

شوربة الكريمة من الشوربات الغنية
شوربة المشروم بالكريمة
المقادير
1⁄4 كيلو مشروم
4 كوب شوربة فراخ
4 ملعقة كبيرة زبدة
3 ملعقة كبيرة دقيق
بصلة مفرومة
كوب كريمة طبخ (هتلاقيها في السوبر ماركت)
ملح وفلفل
الطريقة
1- شوّحي البصلة على النار مع ملعقة زبدة، وبعد كده ضيفي المشروم عليها، وقلّبيهم مع بعض كويس، وتبّليهم بالملح والفلفل.
2- هاتي طاسة تانية، وحطّي فيها باقي الزبدة والدقيق، وقلّبيهم كويس مع بعض، وبعد كده ضيفي الشوربة تدريجيا مع الاستمرار في التقليب علشان الشوربة ما تعملش تكتلات.
3- حطّي خليط المشروم في الخلاط، واضربيه كويس، وضيفيه على الشوربة وقلبيها كويس على النار.
4- في الآخر، ضيفي كوب الكريمة على الشوربة، وقلّبيها وسيبيها لحد ما الشوربة تبدأ تغلي، وقدّميها في أطباق التقديم، وممكن تزيّنيها بالبقدونس.. وبالهنا والشفا.

البيتزا الإيطالية ممكن تعمليها في البيت
البيتزا
المقادير
4كوب دقيق
كوب لبن
ملعقة كبيرة خميرة
ملعقة كبيرة سكر
كوب ماء دافئ
رشة ملح
كوب زيت
الطريقة
1- اخلطي الخميرة مع السكر في طبق كبير مع المية وسيبيها 5 دقايق، وضيفي عليها اللبن والملح والزيت وقلبيهم، ثم ضيفي عليهم الدقيق مع التقليب المستمر.
2- سيبي العجينة تتخمر لمدة ساعة وبعد كده قسميها ل8 كرات متساوية.
صلصة البيتزا
المقادير
كيلو طماطم
ملعقة كبيرة زعتر
3 كوب ميه
3 فص ثوم مفروم
2 ورق لورا
ملعقة صغيرة ملح
الطريقة
1- اغسلي الطماطم وحطيها في حلة وعليها المية وحطيها على النار لحد ما تغلي، سيبيها تبرد وشيلي من عليها القشر واضربيها في الخلاط.
2- حطي الطماطم المضروبة في حلة وعليها باقي المكونات على النار لحد ما تغلي وتبقى سميكة.
الحشو
الأساسي: زيتون أسود- موتزاريلا- مشروم
اللحوم: ممكن تضيفي أي نوع تحبيه من اللحوم والفراخ
طريقة عمل البيتزا
1- هاتي صينية متوسطة من اللي ما بيلزقش فيها الأكل وامسحيها بزيت بسيط، وافردي فيها العجينة وحطي عليها الصلصة والمكونات الأساسية ثم نوعك المفضل من اللحوم أو الفراخ.
2- دخلي البيتزا في الفرن على درجة حرارة عالية لمدة 20 دقيقة، وخرجيها وقطعيها.. وبالهنا والشفا.

سويز رولز بالفراولة
سويس رول
المقادير
3⁄4 كوب دقيق
1⁄2 كوب سكر
2 ملعقة زيت
كريمة خفق
4 بيضات مفصول الصفار عن البياض
ملعقة صغيرة فانيليا
1⁄2 ملعقة صغيرة ملح
1⁄4 كوب مربى فراولة
الطريقة
1- اخلطي بياض البيض كويس لحد ما يبقى شكلها كريمة، وبعدين في طبق منفصل اخلطي صفار البيض مع السكر لحد ما الخليط يتجانس، وبعدين ضيفيه على خليط بياض البيض وضيفي عليهم الفانيليا والملح وقلبيهم بطريقة دائرية مع بعض.
2- ضيفي الدقيق على الخليط بالتدريج مع التقليب المستمر، وبعدين افردي ورقة الزبدة على صينية وافردي العجينة عليها، بحيث يكون بشكل مربع أو مستطيل، وبعد كده دخليها فرن درجة حرارته 180 درجة مئوية لمدة من 15-20 دقيقة أو لحد ما يستوي.
3- طلعي الصينية من الفرن وغطيها وسيبيها على جنب لحد ما تبرد شوية، وبعدين ابدئي افردي المربى عليها ولفيها بشكل إسطواني، ومهم وإنتي بتلفيها شيلي ورقة الزبدة، وقطعيها شرائح، وقدميها.. وبالهنا والشفا.
وبكدة تبقى خلصت عزومتنا،،،
استنونا في وصفات جاية،،،
سلام،،،