سلطة التونة سلطة التونة المقادير علبة تونة قطع حزمة بقدونس ثمرة طماطم كبيرة 2 ثمرة فلفل رومي أخضر 1⁄2 كوب زيتون مخلي خس أو كابوتشا 1 بصلة صغيرة ملعقة مسطردة عصير 2 ليمونة 3 ملعقة زيت زيتون ملح الطريقة 1- قطعي كل الخضراوات قطع صغيرة. 2- صفّي التونة من الزيت. 3- اخلطي عصير الليمون وزيت الزيتون والمسطردة مع بعض في طبق صغير علشان هتستخدميه صوص للسلطة. 4- اخلطي كل الخضراوات وضيفي الصوص وقلبيهم كويس، بعدين ضيفي عليهم التونة وقلبيهم كويس، وقدميه في طبق عميق.
شوربة الجمبري بالكريمة شوربة الجمبري بالكريمة المقادير: 1⁄2 كيلو جمبري وسط مغسول ومقشر ملعقة صغيرة ثوم مفروم ملعقة صغيرة بهارات 2 ملعقة كبيرة دقيق 2 كوب كريمة لباني 2 ملعقة كبيرة زبدة 3 كوب ماء بقدونس مفروم (للتزيين) الطريقة: 1- سيّحي الزبدة في حلة على النار، وبعد كده شوّحي فيها الجمبري وقلّبيه مرة، وبعد كده ضيفي عليه الثوم والبهارات وقلّبيهم مع بعض وسيبيهم على النار لحد ما الجمبري يستوي. 2- ضيفي الدقيق على الجمبري وقلّبيهم مع بعض، وابدئي ضيفي الميه بالتدريج، وبعد خمس دقايق ضيفي الكريمة، مع الاستمرار في التقليب على نار هادئة لمدة 15 دقيقة. 3- بعد كده اغرفي الشوربة في أطباق التقديم وزيّنيها بالبقدونس المفروم.
طاجن سي فوود طاجن سي فوود المقادير: 1⁄2 كيلو سمك فيليه مقطع مكعبات 1⁄2 كيلو كاليماري مقطع مكعبات 1⁄2 كيلو جمبري مقشر 2 ثمرة فلفل حار مقطع 2 بصلة مفرومة خشن 5 فصوص ثوم مفروم 3 ملاعق كبيرة زيت عصير 2 ليمونة 2 ثمرة طماطم 1⁄2 كوب ماء 2 ورقة لورا ملعقة صغيرة من زعتر- بابريكا- كاري- كمون- ملح- فلفل الطريقة: 1- هاتي طبق كبير وحطي فيه التوابل مع عصير الليمون، وتبلي الكاليماري والجمبري والسمك بالتتبيلة دي. 2- هاتي طاسة كبيرة وحطي فيها الزيت والبصل والثوم وسيبيهم على النار يدبلوا شوية، وبعدين حطي الفلفل الحار، والطماطم وقلبيهم لمدة دقيقتين. 3- ابدأي حطي الكاليماري الأول على الخليط لأنه بياخد سوى أكتر وقلبيه لمدة 5 دقايق، بعد كده حطي الجمبري والسمك وقلبيهم واطفي النار. 4- هاتي طاجن وصبي فيه السي فوود اللي جهزتيه في الطاسة، وحطي عليه الميه، ودخليه الفرن لمدة 20 دقيقة وقدميه.. وبالهنا والشفا.
أصابع التونة المقلية أصابع التونة المقلية المقادير: 4 ملعقة كبيرة شوفان مطحون علبة تونة 2 ملعقة كبيرة بقدونس مفروم رشة ملح وفلفل أسود ملعقة صغيرة بهارات 2 بيضة 4 ملعقة كبيرة دقيق بصلة مفرومة الطريقة: 1- ضيفي على التونة الشوفان والبصل والبقدونس والملح والفلفل الأسود والبهارات، وابدأي امزجيهم مع بعض كويس. 2- شكّلي الخليط على هيئة أصابع ودخليهم الثلاجة لمدة 30 دقيقة، وبعدين طلعيهم من الثلاجة واغمسيهم في البيض، وبعدين اغمسيهم في الدقيق، وابدأي اقليهم في الزيت على النار. 3- شيلي أصابع التونة من على النار وصفيهم من الزيت تماما، وقدميهم.. وبالهنا والشفا.
بارفيه بالعسل بارفيه بالعسل المقادير: 3 بيضات كوب لبن رايب 1⁄2 كوب زبادي 1⁄2 كوب سكر 3 ملعقة عسل نحل 1⁄2 ملعقة صغيرة فانيليا كوب بسكويت مجروش 1⁄2 كوب فراولة مقطعة للتزيين الطريقة 1- اخفقي البيض كويس مع السكر، وقلبيهم وحطيهم على حمام ميه لحد ما يبقى القوام تقيل زي البشاميل. 2- ضيفي العسل على الرايب والزبادي واخفقيهم كويس، وخليه على جنب. 3- احضري الكاسات وحطي البسكويت في القاع ثم ضيفي البيض بعد ما يهدى من على النار، ثم ضيفي خليط الزبادي والرايب والعسل في الآخر، بحيث إنها تكون على شكل طبقات. 4- حطي الكاسات في الفريزر لمدة 3 ساعات وخرجيها وزينيها بقطع الفراولة وقدميها ساقعة.. وبالهنا والشفا. خلصت عزومتنا النهارده.. استنونا كل يوم مع وصفات جديدة.. سلام،،