عصير الموز بالآيس كريم العصير ده من العصاير اللذيذة جداً، وخصوصاً في الحر.. المقادير: * 1/4 كيلو موز * كوب آيس كريم بطعم الموز * 1/2 كوب لبن مُحلى * علبة قشطة * عصير ليمونة الطريقة: اضربي كل المكونات دي مع بعضها في الخلاط، وبعد كده صبيها في كاسات العصير.. وبالهنا والشفا.
******************* شوربة الكوسة شوربة الكوسة المقادير: * 1/2 كيلو كوسة مبشورة * 3 ثمرات جزر مبشورين * فلفل أحمر مقطع شرائح طولية * كوب شوربة فراخ أو لحمة * بصلة مبشورة * 1/2 حزمة كزبرة خضراء مفرومة * ملعقة كبيرة زيت ذرة * ملح وفلفل الطريقة: 1- حمري البصل في الزيت لغاية ما لونه يبقى ذهبي، وبعد كده ضيفي إليه الشوربة لغاية ما تغلي. 2- بعد ما تغلي ضيفي إليها الجزر والكوسة والفلفل وسيبيهم مع بعض لمدة 20 دقيقة أو لغاية ما تلاقي إن الخضار استوى. 3- بعد كده ضيفي عليهم الكزبرة الخضراء والملح والفلفل، وسيبيهم على النار لمدة عشر دقائق، وبعد كده اطفي البوتاجاز وحطي الشوربة في أطباق الشوربة.. وبالهنا والشفا.
******************* باذنجان مخلل باذنجان مخلل المقادير: * كيلو باذنجان أسود طويل * 1/2 رأس ثوم مدقوق * 2 ثمرة فلفل أخضر مقطع قطعاً صغيرة * 2 ثمرة فلفل أخضر حار مقطع قطعاً صغيرة * ملعقة كبيرة ملح * 3 أكواب مية * عصير ليمونة * كوب خل الطريقة: 1- هاتي الباذنجان واغسليه كويس واقسميه إلى جزأين، واسلقيه في مية مضاف إليها الملح لمدة ربع ساعة أو لغاية ما تلاقي إن الباذنجان بقى طري. 2- طلّعي الباذنجان من المية، وحطيه في مصفاة علشان يبرد. 3- افرمي الثوم والفلفل الأخضر والفلفل الحار والبقدونس في الكبة كويس، وبعد كده احشي بيهم قلب الباذنجان وبعد كده رشي عليه عصير الليمون.
******************* كباب المأكولات البحرية كباب المأكولات البحرية المقادير: * 1/4 كيلو جمبري متوسط الحجم * 1/2 كيلو سمك فيليه مقطع مكعبات * 1/2 كيلو كاليماري "سبيط" بدون الأرجل والرأس * بصلة كبيرة الحجم * 1/2 حزمة بقدونس مقطعة قطعاً صغيرة * 2 ملعقة كبيرة ريحان طازج ومفروم * 5 فصوص ثوم * ملعقة صغيرة كمون * ملعقة صغيرة بهارات السمك * ثمرة فلفل أخضر مقطعة لمكعبات صغيرة * 1/2 كوب عصير ليمون * 1/2 كوب زيت ذرة أو زيت زيتون * ملح وفلفل الطريقة: 1- اخلطي الثوم مع البصل مع الفلفل الأخضر والبقدونس والريحان في الكبة واضربيهم مع بعض كويس، وبعد كده ضيفي إليهم الملح والفلفل والكمون وبهارات السمك وعصير الليمون والزيت وقلبيهم كلهم مع بعض. 2- اغسلي الجمبري والسمك والكاليماري كويس، وبعد كده قطعي الكاليماري والسمك لمكعبات متوسطة الحجم، وبعد كده ضيفي إليهم الخليط السابق اللي أنتِ عملتيه، وقلبيهم مع بعض، وسيبيه لمدة ساعتين علشان السمك والجمبرى والكاليماري يتّبل. 3- بعد مرور ساعتين هاتي الأسياخ الخاصة بالشواء اللي عندك سواء المعدنية أو الخشبية، وابدأي في رص قطع الجمبري والكاليماري والسمك فيها؛ بحيث أنها تكون قطعة جمبري وقطعة سمك وقطعة كاليماري. 4- شغّلي الشواية اللي عندك سواء الفحم أو الكهرباء، وحطي عليها الأسياخ مع مراعاة التقليب من وقت للتاني لغاية ما كل حاجة تستوي.
******************* كريب بالشيكولاتة كريب بالشيكولاتة المقادير: كوب ونصف لبن 3 أكواب دقيق 5 بيضات 1/2 ملعقة صغيرة فانيليا 1/2 فنجان زيت ذرة 1/2 فنجان سكر بودرة مقادير الحشو: كوب شيكولاتة سايحة موز مقطع قطعاً صغيرة ومرشوش عليه عصير ليمون شرائح فراولة مربى تين الطريقة: 1- اضربي اللبن مع الدقيق بالمضرب، وضيفي إليهم البيض والفانيليا، وقلبيهم مع بعض كويس لغاية ما تلاقي العجينة بقت متجانسة. 2- هاتي طاسة تيفال، وحطي فيها نقطة زيت، وحطيها على النار، وهاتي مغرفة صغيرة، وحطي عليها شوية من العجينة، وحطيها في الطاسة، وبعد خمس دقائق اقلبيها على الوش التاني علشان العجينة تستوي، استمري على الحال ده لغاية ما كل العجينة اللي عندك تخلص. 3- احشي كل واحدة من الكريب بالشيكولاتة وقطع الموز والمربى وشرائح الفراولة، ولفيه على شكل رول ورشي عليها السكر البودرة وصوص الشيكولاتة.
*******************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة... واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك.. كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول.. وإلى اللقاء غدا إن شاء الله مع أطيب التمنيات بصوم مقبول وإفطار شهي بإذن الله سلااااااااام ********************* للتعرف على مزيد من الوصفات الشهية اضغط هنا "سفرة دايمة" *********************