كل سنة وكل الأمة الإسلامية بخير بمناسبة المولد النبوي.. أكيد الاحتفال بالمناسبة الجميلة دي هيكون أحلى في لمة العيلة.. علشان كده إحنا حبينا نكون معاكم في اللمة الحلوة دي.. ونحضّر مع بعض عزومة كاملة لعيلتك... يلّا نشوف هنعمل إيه... عصير الموز والفراولة باللبن عصير الموز والفراولة باللبن المقادير 4 أكواب لبن بارد 4 ثمرات موز مقطعة قطعاً صغيرة 1/4 كيلو فراولة مجمدة 8 معالق كبيرة عسل أو 1/2 كوب سكر مكعبات ثلج عصير ليمونة الطريقة اضربي كل المقادير مع بعضها في الخلاط، وبعد كده صبيها في كاسات العصير، وضيفي إليها مكعبات الثلج. ************************* سلطة البسلة سلطة البسلة المقادير 1/4 كيلو بسلة 5 ثمرات بطاطس مسلوقة حزمة فجل زيتون أخضر كرفس ملح معلقة مايونيز الطريقة اسلقي الخضراوات دي مع بعضها ما عدا الفجل بعد ما تسلقي الخضروات حطيها في مصفاة، وبعد كده ضيفي إليها الملح والمايونيز وحلقات الفجل، وقلبيهم مع بعض وحطيهم في طبق السلطة. ************************** لحمة على الطريقة الهندية لحمة على الطريقة الهندية المقادير 1/2 كيلو لحم ضأن بدون عظم مقطعة مكعبات 2 بصل مفروم 1 معلقة طعام صلصة طماطم ثوم وزنجبيل معلقة صغيرة زعفران 1/4 كوب ماء ورد معلقة طعام كاري معلقة صغيرة ملح 5 حبات حبهات 5 أعواد قرفة 2 ثمرة بطاطس مقطَّعة قطعاً صغيرة 2 ثمرة فلفل أحمر مقطعة شرائط رفيعة الطريقة دي ما فيش أبسط منها، كل اللي عليكي إنك تخلطي كل المكونات دي مع بعضها وتسيبيها مع بعضها لمدة خمس ساعات في الثلاجة، وبعد كده تحطيها في صينية ودخليها في الفرن لغاية ما تستوي وتحمر. ************************* كريب بالشوكولاتة كريب بالشوكولاتة المقادير كوب ونصف لبن 3 أكواب دقيق 5 بيضات 1/2 معلقة صغيرة فانيليا 1/2 فنجان زيت ذرة 1/2 فنحان سكر بودرة مقادير الحشو كوب شوكولاتة سايحة موز مقطع قطعاً صغيرة ومرشوش عليه عصير ليمون شرائح فراولة مربي تين الطريقة 1- اضربي اللبن مع الدقيق بالمضرب، وضيفي إليهم البيض والفانيليا، وقلبيهم مع بعض كويس لغاية ما تلافي العجينة بقت متجانسة. 2- هاتي طاسة تيفال، وحطي فيها نقطة زيت، وحطيها على النار، هاتي مغرفة صغيرة، وحطي عليها شوية من العجينة، وحطيها في الطاسة، وبعد خمس دقائق اقلبيها على الوش التاني علشان العجينة تستوي، استمري على الحال ده لغاية ما كل العجينة اللي عندك تخلص.. 3- احشي كل واحدة من الكريب بالشوكولاته وقطع الموز والمربى وشرائح الفراولة، ولفيه على شكل رول ورشي عليها السكر البودرة وصوص الشيكولاتة. وبكده تكون خلصت عزومتنا.. نتمنى إنها تكون عجبتكم.. وفي انتظار آرائكم.. ولو عندك وصفة جامدة تكوني جربتيها قبل كده.. وعايزة تشاركي بها معانا.. وتنزل على باب صحة وجمال باسمك.. ابعتِ لينا على لينك..
