مذكرات رجل من الجنوب هريدى ولد الشيخ عبدالرحيم همام..الجزء الثالث

الجزء الثالث من رحلة هريدى رجل من جنوب الوادى فى القاهره رحلته وزوجته ملك إلى الصعيد
ملك مرتى جاعده فى العربيه
عتسوج وأنى جنبيها عبص عليها وأبص حواليه
وأجول بينى وبين نفسى .
يا سبحان الله وليه
عتسوج عربيه
وتروح بيها آخر الدنيا
ومخايفاشى من عربيه نجل من جنبيها تعدى
إديها من الخوف تترعش ومتجدرش بينا تهدى
واهى عتسوج إديها . حاجه والله غريبه
ولو كانوا حكولى فى الصعيد عليها
معصدجهاشى .
بس أنى شايف بعنيا وجاعد كمان أنى وهيه .
ولا أجولك يا هريدى بلاشى
ما يحسد المال إلا صحابه
ولو صابتها عينى هنروحوا أنى وهيه بلاشى
غمض عنيك عنها ومتبحلجشى كتير عليها
. دى برضه مرتك وإنت جاعد جنبيها .
بس يا ناس دى حاجه غريبه
معجول هتوصلنا الصعيد وهناك ندلوا والناس يشوفونا بيها
ويجولوا عليك جوز المره جاعد جنبيها
وجعتك طين وهباب يا هريدى
مش بس هتاخد بالمركوب
دا أنته ليلتك هباب . يا فجرى يا مرشح
أمايتى لما تشوفنى هتدينى موشح
هتجيب من تحت رجليا وتحط فوج راسى ولا يهمهاشى .
هتجولى عريتنا يا هريدى يا ولدى
جاى الصعيد ومعاك غازيه وجاعد جنبيها
ومش مستحى من دمك لما يشفوك ولد عمك .
وإنت جاى راكب عربيه وعتسوج بيك وليه .
ربنا يستر عليك يا فجرى .
بحرت على مصر تشتغل وترجع مليان وخلاجاتك نضيفه
راجع كمان وراكب عربيه
وإللى سايجه وجاعد جارها وليه .
آه لو كنت أعرف أسوج كانت العمليه هتكون هينه شويه .
بزيداك حديت مع نفسك عشان ملك ما تاخدشى بالها منك
وتجول إتجننت ولا أيه يا هريدى .
فعلآ إللى يخاف من العفريت يطلعله
بصت عليا ملك وجالتلى
أربنا نوصل يا هريدى ولا لسه بدرى .
الكلام كان لملك مرتى .
جولتلها مالك يا ملك من السواجه تعبتى
إحنا يدوب عدينا بنى سويف يعنى لسه جدامنا من البلاد كتير
إلمنيا وأسيوط وبعدين سوهاج غير المراكز والنجوع
وكل محافظه ومحافظه بينهم وبين بعض سا عات .
يعنى يعدى النهار كله ويجى علينا الليل بطوله
ويمكن ربنا يسهل ونوصلوا على الفجريه
أو لو طولت شويه لما الشمس تنور وتطلع
وتبجى حاميه شويه .
لو تعبانه يلا نرجعوا تانى وأدينا يا دوب فى أول الطريج .
وده أهون شويه .
ويبجى إتفسحنا ونرجعوا نروحوا على بيتنا ويا دار ما دخلك شر
وإللى تعرفه دلوكيت أحسن من إللى هنشوفه كمان شويه .
ضحكت ملك وبصت عليا وجالتلى متخافش يا هريدى .
أنا مش هسيبك تروح الصعيد لوحدك أنا نفسى أشوف البلاد ديه .
أنا سمعت عن الصعيد والصعايده .
بس عايزه أعرف عايشين إزاى . وبيعملوا أيه
والستات عندكم شكلهم أيه وبيلبسوا أيه
والحاجات دى يعنى .
وحياتك يا دوده علشان خاطرى يا ديدى .
عتجولى أيه يا وليه
أيه دوده دى ومين ديدى إللى عتجولى عليها .
يا حزنك وفجرك البدرى
وكمان سمتينى بأسم واحده يا ملك
أنى غلطان وأستاهل أكتر من كده كمان .
خلتينى حلجت شنبى وجلعت الطاجيه
وسرحت شعرى وغيرتينى وجلعتينى توبى من فوج جلدى .
وأديكى سمتينى بأسم وليه .
حسك عينك يا وليه يطاوعك لسانك وتنطجيها تانى .
ولا أجولك بسرعه وجفى العربيه .
وإفتحيلى الشنطه علشان أغير خلاجاتى
وألبس على راسى طاجيه وأحط الشال على كتافى
علشان أهون المصيبه شويه
ولو سألونى راح فين شنبك
أجول وأنى عحلج ورب من شويه .
روحت جصيته وخفيته شويه معجبنيش شكله
جولت أحلجه وبكره يطلع شويه شويه .
ضحكت تانى ملك خلتنى هفرطك من الغيظ بضحكتها العاليه .
جولتلها ودى كمان متنفعشى حدانا
معيضجكش الضحكه دى غير لما تكون الواحده غازيه
ولو حد سمعك وإنتى عتتمرجعى بيها وصوتك يعلا وإنتى عتضحكيها
هيفكروا حدانا مولد وجايبين ترجص فى المولد غازيه .
إسمعينى يا ملك زين
الكلام إللى هجولهولك توعيه زين
كيف الحلج فى ودانك .
إللى راح كوم وإللى جاى كوم تانى
حدانا فى الصعيد كل حاجه يجولوا عليها عيب .
لو الواحده ضحكت وسمعها حد غريب تبجى حدانا عيب .
لو الواحده مشت فى الطريج والشمس طالعه
وشافها واحد غريب تبجى عيب .
لو الواحده بانت رجليها من تحت توبها
يبجى يوم إكحل عليها وعلى إللى خلفوها .
يعنى حدانا المره مره والراجل راجل .
لازم من دلوكيتى تفهمى معنى العيب
وإوعاكى تغلطى وتنسى إنك من ساعة ما تتحط رجليكى
على أرض الصعيد ومن العربيه وتتدلى
تدخلى جوه البيت ومتجعديش جارى
غير وإحنا فوج المصطبه إللى عناموا عليها فى العشيه .
يعنى طول النهار أنى جاعد مع الرجاله فى المندره
اتلجى الناس إللى هتيجى تسلم عليا
وإنتى متهمليش أمى ولا تنطجى بكلمه .
من الكلام بتاعك الماصخ إللى يودى صاحبه فى داهيه .
فاهمه ولا أجول تانى .
ولة مش عاجبك إحنا لسه أدينا جاعدين فى العربيه
يدوبك نلفوا ونرجعوا وكإنك يا أبو زيد ما غزيت .
وإللى نجدروا نحلوه دلوكيت بإدينا
بكره معنجدروش نحلوه بسنانه
فاهمه ولا لاْ .
متزعليش منى يا ملك أنى عجولك على عاداتنا وتجاليدنا
الصعيد غير المدن
وأنى عازرك برضه متعودتيش على طبعنا
بس والله يا بت الناس الغلطه حدانا
تبجى عار فوج الراس وتفضل سنين وسنين ولا تتنساش .
أصلك إنت معارفاشى .
حدانا ناس معيعرفوش حاجه واصل
من الغيط للبيت ومن البيت للغيط
مفيش حدانا فى الصعيد بين الراجل والمره تواصل .
طبعنا كده إتربينا على كده ومشفناش حاجه غير كده
حجاش لما يجوا الغجر ينصبوا خيامهم حدانا
يبجوا جايين وجايبين معاهم مغنواتى وغازيه
عترجص . وتلاجيها ملغمطه وشها بالإحمر والإخضر
والكحله فى العين مخلياها جويه
تبص على الراجل منينا تجيب داغه .
تخليه يروح البيت يدى مرته ميت مركوب
ويلعن سلسفين إللى خلفوها .
تبجى فى عنيه زى الجرد ولا تصد ولا ترد
زى البهيمه تنام وتشخر ولا تعرف كيف تدلع الراجل .
ولو كلمتيها كلمه زينه تكشر
وتجول باين عليك ليلتك زى النيله
عتجولى كلام عيب .
ودى هى عوايد وطبع حريمنا .
لكن الغازيه عتجيى توجعد إسبوع ولا أسبوعين
تغنى وترجص طول الليل وتغمز يمين وشمال بعنيها
لكل واحد ينجطها شويه .
عشان كده حريمنا تلاجيها لابسه لبس زين
تغطى راسه لغاية رجليها
ولا يبان منها ضافر ولا حتى عنيها
لو رايحه مع حد من العيله مشوار تحط البرده عليها .
تبجى ماشيه متعرفهاش
مين دى ولا بت مين ولا من أى عيله
حجاش تعرفها باللى ماشى جدامها
وتجول يمكن تكون فلانه ولا علانه
لكن مين هى بعينها متعرفهاش
حتى لو جامت الجيامه .
ومنجدروش حتى نرموا السلام على حد نعرفوه
يكون مصادفنا فى الطريج ماشى
وتكون مرته ولا أمه ولا بته ولا أخته وراه .
عيب جوى نرموا السلام على حد وحرمه ماشيه وراه
. هى دى عوايدنا
مش زيكم . الواحد يبجى ماشى والست حاطه إيدها فى إيده .
وشعرها مكشوق ومتسرح تسريحه زينه
وتلاجى ماشى عيهزر ومبسوط بيها .
لو حدانا يطخوه بعيار ويجولوا كلب وغار
ولا يجيب فى يوم لناسه العار
والناس تتحدت وتجيب سيرته ليل ونهار
ويبجو ا فى كل مجلس سيره وعار
وكمان حدانا حد يجدر يخلى بته ولا أخته تخرج وحديها .
معندناش الكلام ده كل عيله عارفه العيله إللى جنبيها
وعيب جوى واحده تطلع بره البيت وحديها .
هى دى حياتنا فى الصعيد يا ملك
الشرف حدانا غالى جوى
ومسك السيره عيب جوى . جوى . جوى .
وممكن يوجع فيها جتيل وإتنين وعشره
ويبجى تار بين العائلات
زى النار لما تجيد ولا حدش يجدر يطفيها .
أنى جولتلك على كل حاجه
والغلطه منك هتودر كل حاجه
ولا أجدر أسامحك ولا أغفرلك أى حاجه .
إسمعى كلامى زين وحطيه حلج فى ودانك .
فهمانى يا ملك ولا مش عاجبك دلوكيتى حالك .
إحنا لسه فيها ممكن نعاودوا وتريحينى وتريحى بالك .
جولتى أيه يابت الناس إحسبيها زين وجوليلى
أيه رأيك نكملوا على كده
ولا نرجعوا البيت ولا يبجى حد شافنى ولا شافك
لاء نكمل يا هريدى
شوأتنى للصعيد بكلامك .
نفسى أشوف الحاجات دى
وأشوف الستات وهى بتعمل كده
يمكن يعجبنى الحال وأعيش معاك هناك .
معجول يا ملك تجعدى معايا هناك
يبجى يوم المنى .
على الأجل تونسى أمى وتكسبى فيها صواب
دى برضه وليه كبيره
ولما تلاجيكى حنينه معاها
هتفرح بيكى وترضى عنى وعنك .
ونخلوا بالنا من الغيط والزرعيات والبهايم .
وحياتى وحياتك تتغير وتبجى حياه زينه
ومتعمليش حاجه تانى تمنع الخلفه
ونملوا البيت عيال كتيره .
يتنططوا ويلعبو حوالينا
وتفرح بيهم أمى . وترضى عنك وعنى .
خلاص يا هريدى
لما نوصل وأشوف نفسى
هبأى أأولك إن كنت أادر أاعد ولا مأدرشى .
طيب يلا إتوكلى على الله وخلى من الطريج بالك
وبصى جدامك .
وربنا يسترها ونوصلوا بسرعه
أمى وحشتنى بس جلجان من إللى مستخبى .
خليها على الله وعليه إتوكلى وبصى زين جدامك .
وخلى بالك زين الطريج مليان عربيات
وكل سواج عيتلفت عليكى
ومش مصدج إنك وليه
وراكبه عربيه وعتعرفى تسوجى .
ولو تعبتى جوليلى
نريحوه كل محافظه ساعه ولا ساعتين
علشان تعرفى تاخدى بالك من الطريج وتوصلينا بالسلامه .
فى الكلام خدنا وادينا
وعلى الصعيد حكينا الحكاوى
حبيت أشوفها وأضحك عليها
يعنى حبيت أهزر معاها شويه
يمكن الخوف والجلج يروح ويهملنى شويه
جولتلها بلاش يا ملك
جالتلى لاء يا خويا رجلى على رجلك
جولتلها كيف ما بدك
إنتى حره بس ملياش دعوه
هتسمعى كلام ولا هيسرنى ولا هيسرك
عوايدنا فى الصعيد غير عوايدكم
ومش هيعجبهم حالى ولا حالك
دخلنا النجع ومن العربيه إدلينا
العيال زاطت وهاجت وماجت
والدنيا بجت عفره من رجليهم
تراب الأرض هاج وملى السما ضباب
متجولشى مش شايف جدامك
وسط الزيطه بعنيا لمحت أمى
إدليت من العريه وطيرت عليها
خدتها بالباط وطيت وحبيت على رجليها
شافتنى
وإندارت ولا حتى بصت بطرف عنيها
وجالتلى أنى مش أمك
من دلوكيتى أمك ماتت
جايب معاك فى الصعيد واحده خوجايه يا هريدى
ولا دى غازيه من الغوازى
باين عليك إدبيت ومصر شجلبت حالك
جولتلها
دى مرتى ملك يا ماى
جايه معايا
جالتلى وأنى مش أمك
ولا إنت هريدى ولدى
إرجع بيها زى ما جيت تانى
لو شفوها الناس هيتغمزوا علينا
و هيجولوا علينا حكاوى وغناوى
وهنبجوا سيره يتسلوا بيها وكل شويه
و نتعايروا بيها
راحت
همت وسابتنى
راسى إندارت والحيره مسكتنى
أولل زى الولايه وأخبط على راسى
وأجول سامحينى يا مايا
أنا ماكنتش للجوازه دى ناوى
بس الجسمه والنصيب
وكل شىء يا مايا مكتوب
وجفت وجالتلى ماتولولش يا ولدى
دخلنا
وجفلنا الدار وكل واحد فينا عن التانى مندار
طول الليل سهران أعاتب نفسى وجايده جوايا النار
وملك ولا عتصد ولا عترد
نامت زى ماتجول بجالها سنه مانامتش
وأنى طول الليل صاحى أدعى وأصلى وأترجى ربى
أرضى عليا يا ربى
أمى ماليش غيرها وفى الدنيا دى كلها ملهاش غيرى
كيف العمل إهدينى يا ربى
كيف أرضى أمى وتسامحنى وترضى عنى
وتجدر حالى وغلبى وهمى
سامحينى وإرضى يامه عنى
صبح الصبح والناس ظاطت
صحيت ملك وفكراها معارك
جولتلها متخافيش الناس والبهايم والكلام ظاطت
يومنا فى الصعيد يبدأ كده هرج ومرج وكل على الغيطان سارح
جولتلها جومى يا ملك شطفى وشك و إدلى
حضرى الفطور مع امى وكلميها يمكن ترضى عنى
أمى غاليه وعزيزه جوى جوى على جلبى
وإنتى يا ملك نصيبى ومرتى
جوليلها ماتزعلش منى
جامت ملك تفرك فى عنيها
تميل وتتعدل وكل ما تجابل حاجه تتخبط فيها
تجولش مش شيلاها رجليها
رجعت تانى تترجانى
بلاش أنا يا هريدى إنزل إنت دى برضه أمك مش أمى
جولتلها خليكى كلامك صح يا مرتى
أنى هتدلى وأحب تانى على رجليها
إدليت من فوج وعليها بعينى بصيت
لجيتها جاعده جدام الكانون عتعدد وتبكى
جولتلها صباح الخير يامايا
مردتشى عليا
عيدت الصباح تانى
ودموعى خانتنى جولتلها ردى الصباح يامايا
متجطعيش جلبى
بصت عليا والدموع فى عنيها
لمحت دموعى جامت بسرعه وفى باطها خدتنى
دموعى نازله زى النطره حاميه عتكوى خدى
وهى عتواسى فيا وتجولى يا حبيبى يا ولدى
خايفه عليك من مسك السيره
وإنت عارف حنية جلبى
أحب على إيدك يا ماى سامحينى
ماكنشى بإيدى ولا بيدك
إرضى عنى وأطلبى الرضا من ربى
يمكن يا مايا يسامحنى
فى عنيها هم وغم وحزن الدنيا مجمع
بصت عليا شافت عنيا بالدموع تشكى وتدمع
ما هونتش عليها تشوفى بالعيون أبكى
طبطبت عليا وجالتلى يا هريدى ماتخافشى يا ولدى
مالك عتتنفض ليه هو فيه راجل يبكى
مدت إديها على شالها إلمدلى
ومسحت ونشفت بيه الدموع عن وشى
صعبت عليا نفسى بكيت بصوت عالى
زى اليتيم لما يبكى ويتألم
زادت الدموع وعلى خدى نازله عتجرى
زى الميه إللى نازله من جواديس الساجيه
فى الجنايه عتجرى
زى
الشلال لما ينزل من فوج الجبال يخبط ويطرطش حواليه ويجرى
ضحكت غصب عنها
جاصده تزيح الهم بضحكتها الحلوه عنى
حسيت بضحكتها طالعه جطعت بيها جلبى
خدتنى بالباط وجالت انى عليك بدلع
مسكت إيديها أحبحب عليها
وأبوس على
رجليها وانى جلبى بالنار مولع
جاعد تحتيها أترجاها
الدمع غطى عنيها لما شافتنى موطى على رجليه و بركع
طبطبت عليا وجالتلى جوم أوجف يا ولدى
مرتك تطب علينا وتشوفك بعنيها وصورتك جبالها تضعف
متجدرش تجيم عينك فيها ولا تجدر فى يوم جبالها توجف
إاسمع كلامى زين ومن راسك مش عايزاه يطلع
نفسى يا ولدى تكون بين الرجال راجل
العمه فوج راسك ما يجى عليها غبار واصل
ولا تبجى سيرتك ملطشه للعفش والزين واصل
رافع بينهم راسك وما ليهم حداك دين واصل
جول لمرتك تبدل الخلجات الشين
وتلبس لبس حشم يحميها من بصة العين
يا ولدى بين النسا والرجال شياطين
لو ركبوا الراس يمرموغوها فى الطين
الأصيل من الرجال مخلص وآمين
أما
جليل الأصل أساسه واطى ولعين
أبوك يا ولدى مات وساب من الطين فدانين
باروا من بعد منه والصالح منهم جراطين
إوعاك تفرط فيهم وحاسب من الدين
يذل صاحبه فى الليل والنهار مرتين
الأرض كيف العرض شيلها جوه العين
إرويها بعرجك تديك فى السنه زرعتين
وإتعب وإشجى عليها الفدان يزيد وببجى فدانين
يزيد خيرك وتسد بيه دينك وتبجى بين الرجال زين
هما دول يا ولدى الكلمتين
غابت عنينا شمس السبت
وطل علينا من
تحت الغيوم ظلام ليل الحد
وأمى مرضت وأنى مهموم مش طايج من الخلج حد
دعيت ربى يشفيها وصحتها عليها تدوم
مرت
الساعات تجيله ما زار عنيها ول عينيا النوم
أمى طريحة الفرشه بتتألم من المرض اللعين
جالها على غفله من غير ما يجول لحد
دبل الوش ودبت فيها علامات الموت
وغابت عن الوعى والروح وصلت الحلجوم
وطلعت عند باريها وخلجها بعد ما وصلنا الصعيد بيوم
ودفناها فى نفس اليوم
غابت وراحت شمس النهار
وانى ومرتى ملك فضى علينا الدار
جاعدين بعد العزا كل واحد عن التانى بوشه مندار
راحو الحبايب والدار خلى من الزوار
جعت أنا ومرتى ملك نتذكر اللى كان وصار
كل شىء فى الدنيا يعلى وينهار
حتى
الليل لما يجيى يطول ظلامه لغاية ما تطلع شمس النهار