انا ورقة

عنوان غريب صح ؟؟
يمكن . ويمكن يكون عادى .... المهم
تعالو كدا نفكر شويا الانسان عبارة عن ايه
اول مايتولد مايعترفش بيه انه انسان وموجود حى يورزق الا لما يتعمله شهادة ميلاد ( ورقة ) شوف بقى لما يبقى وجودك فى الدنيا دى مربوط على حته ورقه ( لامؤخذة ياورقة مش قصدى الاهانة والله ولا التقليل منك ) .......... سبحان الله
ولما يكبر شويا ولازم يدخل المدرسة لازم يقدم اوراقه عشان يقبلوا يعلموه ويبقى بنى ادم متعلم ويطلبوا منه شهادة ميلاد وصور و ..........و الخ ( ورق بردو ) و اول ماينجح فى الدراسة لازم ياخد شهادة من المدرسة ( ورقة ) عشان يثبت انه نجح
ولما يكبر شويتين كدا لازم يطلع البطاقة ( ورقة بردو بس جامدة شويا ) ههههههههه عشان يقدر ياخد حقوق اكتر تانية .............. ولما يفكر يشترى عربيه........ ياسلام على العربيه والله نفسى اجيب واحدة ....... المهم
لما يجى يجيب العربية خد عندك بقى اوراق اد ايه عشان يجبها وقبليها الرخصة ( ورقة بس زى البطاقة جامدة ) وقيس على كدا اى حاجة يحب يشتريها ............. واول ما يتخرج من الكلية تبتدى رحلة العذاب .......... البحث عن شغل واول حاجة لازم يعملها حتة ورقة يوصف فيها امكانياته ومؤهلاته وخبراته كلها وتدعى (سى فى) عشان يثبت انه قادر على العمل و اول ما تتقبل الورقة دى تلاقى بقى كمية ورقة مطلوبه منه اد كدا ....... شهادة جيش وميلاد ...... وفيش وتشبيه ودى لوحدها كفايا عشان يعملها يطلع عينه وكل ده ليه عشان يقول انا انسان كويس ومش سوابق
وياسلام بقى لو حب يدخل دنيا ويتجوز لازم قسيمة جواز ( ورقة ) وعشان ياخد لقب اب لازم يجيب عيل ويعمله شهادة ميلاد ( ورقة ) ولو حب يطلع من الدنيا اللى دخلها دى ويطلق بردو لازم قسيمة طلاق ( ورقة )ه
وكل ما يكبر فى العمر كل مايزيد عدد اوراقه اللى تثبت وجوده ومكانته
لحد مايجى معاد الورقة الوحيدة اللى مابيشوفهاش عشان تثبت انه كان انسان موجود ( شهادة الوفاه ) ورقة بردو بس دى الورقة الوحيدة اللى بتفضل منه موجودة بعد كل الورق ده
تخيلوا بقى كمية الورق اللى فى حياتنا عشان تخلينا عايشين وموجودين ويقولو علينا بنى ادمين
السؤال اللى عندى امال الناس زمان اوى كانت عايشة ازاى من غير كل الورق ده ومع ذلك كانو عارفين بعض وعارفين ده مين ودى مرات مين وده ابن مين وكمان كانوا بيردو الحقوق من غير ما يكون فى ورق ولا حاجة
مش زى النهاردة يبقى فى ميت ورقة بحقك ومش عارف تخده
ياجماعة انا مش ضد الورق والله ولا بعمل حملة عليه انا بس حسيت للحظة ان الورقه هى اللى مخليانا بنى ادمين تخيل بقى لما يبقى مقامك ورقة
يبقى بالذمة الانسان عبارة عن ورقة ولا لاء