يا حكومة يااااااااااااااااا

أول إتبعت الحكومة سياسة الخصخصة إقتداءا بسياسة الخصخصة التى إتبعتها الحكومة البريطانية
فى بلادها, وبرغم ثبوت فشل نظام الخصخصة فى إنجلترا إلا أننا كحكومة مصرية رصينة نعلن و بكل فخر نجاح سياسة الخصخصة فى بلادنا التى لم تعد ملكا لنا من جراء تلك السياسة , بل شاركنا فيها القريب و الغريب و العدو قبل الحبيب
ولن أتكلم عن حكمة الحكومة فى تطبيق سياسة الخصخصة وغيرها من السياسات عملا بالمثل القائل دستور يا حكومة وربنا يجعل كلامنا خفيف و ظريف على قلب الحكومة واللى يشدد لها ,,, وهدور على ركن جنب الحيط أحتمى فى ظله وأمشى جنبه ,,,,, بس هموت وأعرف إجابات ... ماهو أنا زى الناس , عندى تساؤلات , عايزة مجرد إجابات ,, محتارة أنا يا حكومة , مش فيكى لا سمح الله ,, لأ فى غباء عقلى
اللى رافض يصدق ما يقال ,,, بيقولى يابت لما هما باعو و قبضو التمن ,, وكانو مرضيين و مبسوطين
و عيونهم بتقول مبسوطين ,, ليه دلوقت رجعو يشترو ,, ولما سألنا ليه ؟؟ بينفو .......... إسكت
يا عقلى شوية , وجعت راسى , روح أدخل على الفيس بوك و إلعب أى حاجة تعمى عينيك وتخليك
تتهد تنام أو أقولك شغل أغانى وإحكى عن غرامك اللى مش باين له بداية ولا نهاية ,,,بس يا حكومة مش راضى يسكت ,, مصر يعرف
خلينا نتكلم جد شوية ,, والالا بلاش جد ,, يعنى بعد إذن عظامتك , و إذا رضيتى حضرتك تقولى لى ,,, حكاية عمر أفندى ,,, مش عمر أفندى اللى هو سى عمر يعنى المرحوم نجيب الريحانى ,, لأ عمر أفندى
المتجر الكبير اللى إكتسب خبرة فى مجال المبيعات و أصابه الدور ضمن سياسة الخصخصة المبجلة وإتقال عليه ما تقال , لما أصابه الهزال , و جاتله نكسة وبعديها وكسة ,, و تم بيعه يا حرام وقالو ده هتقوم له قومة و هيفوق من النومة ,, و إنتظرنا ,,, و طبعا عمر أفندى غير هندامه وعمل نيولوك و بقى مستر عمر أو مسيو
عمر ,,,, وإحنا مش معترضين ,, اللهم لا إعتراض ,, إحنا كنا إعترضنا على إيه ,,,,,, لكن بعد سنين ,
دلوقت يعنى نقرأ فى الجرائد فكرة إن الحكومة تشترى عمر أفندى ,,, أقصد مسيو عمر أو مستر عمر ,,,,,,,, بفرق العملة و اللغة و النيولوك ........ حاجة تحير مش كدة ,, لامؤاخذة يعنى يا حكومة
أصل يا حكومة ياختى قالك إيه اللى إتلسع من الشاى ينفخ فى الزبادى ,, وأنا مش هكذب عليكى , أنا مش بكدبك , ولكن يعنى ماتآخذنيش برضه مش بصدقك ,, عمايلك معايا ماتطمنش ,, الغاز بعتيه لإخواننا البعدا ,وضيقتى علينا ,, وخنقتينا فى الصيف وخلتيها ضلمة , وزى بتوع السيما وهى دى أصول الإخراج تضيق ويفرجها الفراج ,, قلتى إفرحو هجيب لكو الغاز من حنك السبع , بس يادوب تدفعو فرق بسيط ,يعنى أد اللى خدناه ييجى عشر مرات ,,, طبعا زغرطنا فى عبنا ,, و غنينا جانا الغاز أهو جانا الغاز ,, بعد شوية أرض
مدينتى وإختلاف الأسعار ,, بيعيتها ياحلوة للمستثمر الشاطر وإشتريتيها منه بعد الكوارث ,, وإحنا وراكى ومعاكى, ما إنت قدرنا وإحنا بتوعك , حد يقدر يقول للغول عينك حمرا ,, ده إنتى يا محلى عيونك ,, بنغنيلك
الله يصونك الله يديمك ومن عين حسودك يحميكى و يخليكى ,,, وشوية شوية شوية وفى كل مرة نسمع
نفى وإلغاءات وتحلف لى أصدقك وأستعجب من أفعالك ,,,, وعشان كدة ياختى أنا مش مصدقة إنك مش هتشترى مسيو عمر ,,,, أصل قالك ايه المية تكدب الغطاس والشركة اللى حددتيها يا حلوة الحلوين تابعة لوزارة الإستثمار وقطاع الأعمال العام بالقانون 203 لسنة 1991,,,, يبقى ايه ؟؟ يبقى آأأأه ,,,,,,,,,, آاه يا نافوخى على قولة الراحل حسن عابدين ,,, والالا تحبينى أقولك زى عمنا عبد المنعم إبراهيم بقت 600 حتة ....... هو إنت يا حكومة أد كدة شايفة إن المستثمرين غلابة ,, عصاميين ,, تعبو ياحرام لحد لما لمو الملايين ,,
و إحنا طبعا مبسوطين ,, ووراكى برضه ماشيين .......... بس لحد إمتى هتمرمطى فينا شمال و يمين ,,,
خلاص مابقيناش لاقيين