الأقوال المستباحة في النقد والصراحة

لبخيت بن بيومي صاحب المساحة

إلي اللواء عمر سليمان اللي كان نائب رئيس الجمهورية
من محاولة الأندال بالاغتيال
ربنا نجاك وسلمك
ولولا إن أنت راجل طيب
كان زمانك الله يرحمك..!!!
إلي مجلس الشوري الجديد
مجلس وجوده
زي عدم وجوده ومبيفدناش
يبقي كده لا مؤاخذة مليزمناش..!!!
إلي مستر جوزيه المدير الفني للنادي الأهلي
بيقولك هيما شجيع السيما
أبو شنب بريمة
أنت المسئول عن الهزيمة..!!
وخططك صبحت مكشوفة وقديمة..!!! "غير"
إلي الاعلامي الكبير أسامة هيكل وزير الإعلام
مكتبة الإذاعة
فيها ثروة غنائية
وانتاج أغاني وطنية
دي تهليبة مالية
اتعملت قبل كده
واسأل الرقابة الإدارية..!!!
إلي الحاج أحمد خطاب المنصورة جمهورية مصر العربية
مصري في منتهي البساطة الانسانية..
بيستثمر أمواله في بنوك الستر الالهية..
لاغاوي مجالس شعبية ولا عمدية
ياريت في مصر مليون من نفس الشخصية..!!!!
إلي المجلس الأعلي للقوات المسلحة
قبل ما تسبنا وتفارق
شوف لنا حل في بجاحة
البلطجي والسارق..!!
واللي واقفين بالمطاوي والسنج
في الشوارع والحواري والمفارق..!!!
إلي الموسيقار الكبير بليغ حمدي
الله يرحمك ويرحم زمانك
عشاقك لسه زعلانين عشانك
والملحنين اياهم بيترحموا عليك
ولسه بيسرقوا في ألحانك..!!!
إلي رئيس الوزراء التركي رجب أردوغان
جددت المحبة
اللي كانت غايبة من زمان
وعملت توازن شرق أوسطي..!!
وعدلت كفة الميزان..!! "أهلا"..
إلي أبو نوارة الشاعر صديقي أحمد فؤاد نجم
بوسة وألف بوسة
بوسة لأبو النجوم
وبوسة للعريس وبوسة للعروسة
وبوسة لمصر المحروسة "مبروك".
إلي الرئيس الفلسطيني محمود عباس
طالب بكل المطالب
اللي مغلوب النهارده
بكره جايز يبقي غالب
ومبيضيعش أبداً حق وراه مطالب..!!!
إلي أحمد عز اللي كان أمين السياسات
بعد مالبست البدلة
الزرقة الملمعة
أعمل فرقة موسيقية مشخلعة
لإحياء الليالي الملاح في سجن المزرعة..!!!
إلي الإعلامي صلاح الدين مصطفي رئيس التليفزيون
أحلف لك بالتين والزيتون
ون والقلم وما يسطرون
وشك حيبقي حلو علي التليفزيون..!!!
الي الكاتب الصحفي الأستاذ المناضل محمد عبدالقدوس
ابن الوز عوام
في كل بحور الكلام
سياسة فن وأدب
وبمنتهي الاحترام..!!!
إلي الإعلامي بلدياتي دكتور توفيق عكاشة
ماشية معاك بجد
ولدلوقتي ربنا حارسك
ومش خايف عليك من حد
أنا خايف عليك من نفسك..!!!