ع المصطبة

أحلام أهل المصطبة

استأنف مجالس برلمان المصطبة جلساته الأسبوعية بعد توقف دام أكثر من أسبوعين لأسباب فنية.
الرئيس: حضرات الزملاء معروض عليكم مناقشة موضوع مهم وهو كثرة الأحاديث حول نهضة مصر.
العضو الفلفوس: حكاية التصريحات والأحاديث التليفزيونية والجرايد واحنا بنسمع الكلام ده وماشفناش حاجة وبقول حرام عليكم وجعتم دماغنا بتصريحاتكم.
العضو زعيط: خلاص أنا واللي زيي طلعت روحهم من الكلام اللي ينشرونه في التليفزيونات والإذاعات والجرانين لدرجة أنه لو طبقوا نصه كانت مصر تصبح كلها أغنياء لكن يا خسارة كله كلام في الهوا.
العضو النمرود: يا جماعة الدولة كانت عاوزه تصرف حقن مخدرة للشعب كله عشان يسكت ويعيش في أحلام وردية وفي الوقت نفسه مايقدرش يتحرك لغاية ما فاض بيه الكيل وعمل ثورتين.
العضو معيط: والله كلام النمرود صح مية في المية وخلاص الغشارة راحت فلازم ولابد إن الحكومة دي والحكومات تعمل حسابها إن الشعب فاق من نومه وخلاص بح وشبعنا كلام وشبعنا وعود.
العضو بهلول: أنا عاوز أقول زي زمايلي إن الناس فاض بيها الكيل وعايشة علي أمل إن الحال حاينصلح في فترة زمنية محددة لكن إياك يا حكومة إنك تحاولي تضحكي علينا بكلام حلو زي الحكومات اللي الله لا يرحمها.
العضو نطاط الحيط: والله الكلام اللي بنسمعه في القعدة يقول إن الناس فاض بيها الكيل وعايشين علي أمل كبير إن الأحوال حتتغير لأفضل وربنا يساعد الناس اللي في السلطة وما علينا إلا الصبر شوية بعد طول العذاب في السنين اللي فاتت.
الرئيس: نكتفي النهاردة بهذه الجلسة ونشكر القائمين علي صحيفة الوفد بسماحها بنشر أفكاركم وخواطركم علما بأنها صحيفة أكبر وأقدم حزب سياسي في تاريخ مصر.
الفلاح الفصيح