الاقوال المستباحة في النقد والصراحة

قاهرة المعز في اسوأ مرحلة

قاهرة المعز في اسوأ مرحلة
متبهدلة..!!
ومهملة..!!
وشوارعها فوضي ومزبلة..!!
إلي حبيب العادلي اللي كان وزير داخلية
دنيا
فيها ناس آخرتها فل وغندرة
وناس آخرتها كعبرة
وتموت كمان في ليمان طرة..!!
إلي الخواجة الأمريكي برادلي المدير الفني للمنتخب القومي
الخطة في ماتش موزمبيق
كانت أونطة
حتقوللي
انت ترد يللي بشرطة
يدوب توصلنا البرازيل
عن طريق مالطة..!!
إلي مجلس الشوري
وجودك زي عدم وجودك
مفيش من وراك خير
غير التحضير والتفكير
في الصحافة القومية
وتغيير رؤساء التحرير..!!
إلي المهندس محمد رضا إسماعيل وزير الزراعة
الشعب المصري غلبان
والمبيدات المغشوشة
في كل مكان
ومش ناقص فشل كلوي
ولا وباء السرطان..!!
إلي الدكتور حسن يونس وزير الكهرباء
ربنا يدي لك الصحة
ولا يحرمك من الحوافز والبدلات
وينورلك مصر
في كل الاتجاهات
ويكفينا ويكفيك شر البلطجية
وحرامية الكابلات..!!
إلي الأستاذ فيصل الجمال المدير المالي لحزب الوفد
قدام الكعبة حغني لك
وأقول يارب وحدعي لك
يسترها معاك
واحنا وياك
وتدينا قبل ما يدي لك..!!
إلي الرئيس السوري بشار الأسد
نار الشعب قايده
مفيش فايدة
ومفيش داعي للمناورة
والمحاورة والمزايدة
في طيارة أو سفينة
اخلع النهاردة..!!
إلي المجلس العسكري الحاكم
بيقولك عم منسي
الماتش النهائي علي كرسي
الرئاسة بين شفيق ومرسي
طب لو الماتش باظ
اوعي حد يخطف
منك الكرسي..!!
إلي مجلس الشعب
علي رأي الفيلسوف شهبور
دولة بلا دستور
كعمارة بدون ميه ولا نور..!!
إلي الرئيس المخلوع حسني مبارك
بتقولك الحاجة تفيدة
دماغك الناشفة العنيدة
تستاهل التأبيدة
وتدوب في عرق الزنزانة
البدلة الزرقة الجديدة..!!
إلي الأستاذ محمد عبدالمتعال رئيس قنوات تليفزيون الحياة
عايز أقولك
واللا اقولك
مش حقولك
م انت عارف قصدي ايه
من غير م اقولك
إلي الإعلامي سعد عباس رئيس صوت القاهرة
الراجل اللي آخر انضباط
اللي يستاهل التحية
من اسوان لغاية دمياط
اللي رغم الأزمة المالية
بحداقة ودبلوماسية
هو اللي يلاعب المراكبية
ويمشي المراكب ع البلاط..!!
إلي المطرب محمد منير
اللي يغني يا بيوت السويس
ويتجاهل اسم محمد حمام
يبقي خاين العيش والملح
والمحبة والاخوة واحترام..!!