الأقوال المستباحة في النقد والصراحة

إلي العقيد معمر القذافي
مش كل مرة
تسلم الجرّة
حتموت زي اللي ماتو..
والبركة في صواريخ الناتوا..!!
إلي الإعلامية بثينة كامل
ومالو اترشحي لرياسة الجمهورية
كلها »اعترافات ليلية«.. !! »مبروك«
إلي الناقد الأستاذ طارق الشناوي
علي رأي المعلم حمامة
اللي ينفض للملك والامبراطور
واللي غاويين زعامة
يستاهل مليون سلامة.. »صراحة«
إلي النجمة الكبيرة سهير البابلي
اللي يرجع للمسرح من جديد
لاز م يفيد ويستفيد
المتهم يحافظ ع الرصيد!!!
إلي الملحن منير الوسيمي نقيب الموسيقيين الموقوف
حقولك بجد
بس متقولش لحد
إنت دخلت في حارة سد..!!!
إلي ليمان طرة »بورتوطرة«
علي رأي الحاج عبدالعزيز
بعد التجديد والتجهيز والتمييز
حيقلبوك ملجأ عشر نجوم
للحرامية العواجيز..!!!
إلي الكابتن مجدي عبدالغني
مصر بتقولك..
اللي ميشرفهاش..!!
ميلزمهاش..!!
إلي زعيم حزب الوفد د. السيد البدوي
رحلتكم لأثيوبيا
عز الطلب
ليها العجب
بتساهم في تعمير بيت
السياسة اللي اتخرب
مدد ياشيخ العرب..!!
إلي الاعلامية الكبيرة جداً »آمال فهمي«
المخ الفني فيكي احتار
اصرار.. ونجاح.. ومشوار
أنا لو أكون مسئول إعلامي
أدي لك جايزة لاستمرار »صراحة«
إلي الكابتن شيكا بالا
سيبك من السماسرة
واللي بيجروا وراك
مصر كلها عايزاك
يا ابني
مش كل نجم هنا
حيبقي نجم هناك
نصيحة إلي الكابتن حسن حمدي رئيس النادي الأهلي
ياخوفي يابدران
ليفتحولك الدوسيهات
ويقلبّوا في اللي فات
وشهود اثبات
والنائب العام يحولك
علي وكالة الاعلانات..!!
إلي الدكتور بشار الأسد رئيس سوريا
الحرية قتلتها
وسورية ولعتها
وأخوك ماهر بيشرب دمّها
فاضل قد إيه وتقعدوا علي تلّها..!!
إلي صديقي الكبير المستشار مرتضي منصور
نصيحة أخوية
سيبك من الزمالك والزملكاوية
والمعارك البرلمانية والقضائية
وأتوكل علي الله
وأدخل علي رياسة الجمهورية..!!
إلي عبدالله المصري الغلبان مجهول العنوان
المذكور أعلاه
لا له في الكورة
ولا عمره حضر ماتشات
ومطلوب ضبطه واحضاره يوم التلات
أمام محكمة الجنايات
كشاهد إثبات
في أحداث ماتش الأهلي والمصري اللي فات..