الأقوال المستباحة في النقد والصراحة

إلي المرشحين العشوائيين لرياسة الجمهورية

* إلي الدكتور كمال الجنزوري رئيس وزراء مصر المناضل
علي رأي الحاج عمارة
قال ايه بعدما سكنوا
في الحارة
وشجعناهم..!!
عايزين يطردونا منها
ويسكنوا الحارة علي هواهم..!!!
* إلي الدكتور علي عبدالرحمن محافظ الجيزة
بعد تغيير اسم المخلوعة والمخلوع
من علي مدارس الجيزة
الأهالي في حالة فرح من أسبوع
ياريت كل المحافظين
ينفذوا نفس الموضوع..!!!
* الي الكابتن جمال حمزة اللي كان نجم في نادي الزمالك
انت عارف الناس بتقول ايه
من جار علي ناديه
جارت الأيام والليالي عليه
ويستاهل اللي بتعملوا
النوادي فيه..!!!
* إلي وزير الثقافة ورئيس الأكاديمية
التراشق بالألفاظ
الغير حضارية
يكون بعيد عن الوزارة
وبعيد عن الأكاديمية
يكون مثلا في ميدان العباسية..!!!
إلي عبدالله المصري الغلبان مجهول العنوان
المذكور أعلاه
أحواله المالية لا حول الله
ودماغه محتاسة
وفي منتهي التعاسة
وساقط في الدراسة
وجاهل في السياسة
وقال ايه رايح يترشح للرياسة..!!!
إلي الكابتن حسني مبارك اللي كان رئيس جمهورية
لو كنت أخدت العيلة
وخلعت ياعم
مش كنت أرحت واسترحت
من وجع الدماغ
وحرق الدم..!!!
إلي الموسيقار محمد عبدالوهاب في ذكراه
اللي صوته لازال بيهزنا
وبنقول الله
وفي القلب موسيقاه
يبقي من النجوم
اللي عاشوا مرة
ليعيشوا مدي الحياة..!
إلي المرشحين العشوائيين لرياسة الجمهورية
يا تري مين اللي حيوصل
للكرسي في النهائي
ربيع بتاع الكفتة والكباب
واللا الواد عبدالتواب البواب
واللا المعلم عبدالباقي
واللا الأسطي النجار مسعود العراقي..!!!
إلي الصحفية دكتور عزة شريف "المصري اليوم"
أسلوبك ع الورق
بساطة شعبية
سبحانه اللي خلق
الموهبة الصحفية
تستاهل ألف تحية..!!!
إلي أبونا العزيز الأنبا شنودة
بمنتهي الصراحة
ستظل ذكراك
رمزا للأخوة والمحبة
والسماحة
وفي كل القلوب لك أكبر مساحة.. !! وداعاً.
إلي عمنا الدكتور السيد البدوي شحاتة زعيم حزب الوفد
نظرة ياشيخ العرب
أنا طالب استغناء
وجايب لك الطلب
وجاي لك في المساء
وشارح الموضوع
من الألف للياء..!!!
إلي المجلس الأعلي للقوات المسلحة
علي رأي عمدة ابن بلد مظبوط
باب الترشح المفتوح
من غير شروط
يدخل منه زغيط ومعيط
ونطاط الحيط
وأبو طاقية وأبو زعبوط..!!!
إلي حزب الوفد
ربنا يكفيك شر
أصدقائك وأحبابك وقرهم
أما أعداؤك فأنت كفيل بهم...!!!
----
لبخيت بن بيومي صاحب المساحة