الأقوال المستباحة في النقد والصراحة

* إلي فلاديمير بوتين رئيس الوزراء الروسي
اللي حصل عندنا في العهد اللي فات
لما حبت الحكومة تقتل الديمقراطية
وتدوس علي الحريات
زورت الانتخابات..!!
* إلي وزير الداخلية الجديد اللواء محمد إبراهيم
وزارة ومغامرة
وانفلات أمني
وفوضي ومؤامرة
تبقي محتاج
كرباج
وتبين للجميع العين الحمرة..!!
* إلي فنان الكاريكاتير الأستاذ مصطفي حسين
سبحانه اللي خلق
روسوماتك
وابتساماتك علي الورق
علاج للكآبة الشعبية
والنكد المزمن والقلق..!!
* إلي الفريق الأوليمبي المصري
بقولك بالأمانة
رغم ان الجماهير
بوصولك لندن فرحانة
لكن قلقانة
لأن مستواك يدوب يوصلك
للتمثيل المشرف بتاع الفرق التعبانة
* إلي الشاعر الكبير بهاء الدين محمد
اللي يصيغ ملحمة الوجود
بسريالية شاعرية
غير معقولة بمنتهي السهولة
يستحق جائزة العشق الالهي
من الدرجة الأولي..!!
* إلي أنبوبة البوتاجاز
لما تبقي الأزمة أنبوبة
تبقي حركة فلول ملعوبة
والحكومة في غيبوبة..!!
* إلي الكاتب الكبير الراحل الأستاذ أحمد بهجت
كتاباتك الأدبية والدينية
وابحارك في محيطات
التصوف والروحانية
تضمن لك الجنة
والرحمة والسعادة الأبدية
* إلي الملحن محمد سلطان
أحلفك لك برحمة خالتي عزيزة
اللذيذة
اللي كانت ساكنة في ميدان الجيزة
الموسيقار إبراهيم الراديو
معاه العود ونايم تحت الطرابيزة..!!
* إلي رئيس الوزراء الفدائي الدكتور كمال الجنزوري
علي رأي خالتي زنوبة الكركوبة
قال ايه بعدما ندعي لك
تشكل وزارة محبوبة
تحقق الأحلام المطلوبة
وتحل الأزمات اللي في غاية الصعوبة
نتكعبل في أزمة الأنبوبة
* إلي الأستاذ أسامة هيكل اللي كان وزير إعلام
لو كنت أعلم خاتمتي
ما كنت بدأت
ولا هجرت الوفد ورفضت..!!
وروّحت..!!
* إلي الكابتن الشاب المتمرد حازم إمام
أنا لو من عيلة
إمام الكروية
أصحاب التاريخ
والأخلاق الرياضية
أطلب منك تغيير اسمك فورا
يا إما ارفع عليك قضية..!!
* إلي عضو المجلس الاستشاري الأستاذ أسامة برهان
أخيرا ظهروا ولاد البلد الجدعان
اللي ساهموا في عودة الأمن
والأمان
وفتحوا الميدان..
انت كنت فين يا عم أسامة من زمان..!!
-------
لبخيت بن بيومي صاحب المساحة