الأقوال المستباحة في النقد والصراحة

إلي المجلس الأعلي للقوات المسلحة:
بيقولك الحاج فرحات
في الانتخابات حيحصل شرار
امسك البلد جامد
قبل ما يفلت العيار
ويحصل انفجار!
إلي قناة المصري التليفزيونية:
وفق الله علي النور خطاكي
ومن أعداء الحرية والوطنية
حماكي... ربنا معاكي!
إلي الكابتن محمد أبو تريكة نجم مصر والنادي الأهلي:
النجم الكبير المعتبر
لا يزودوا
ولا ينقصوا
حتة ماتش في قطر
المنتخب في خطر
بيتاجروا فيه حبة غجر!
إلي سعد عباس رئيس شركة صوت القاهرة
للصوتيات والمرئيات والاعلان:
دنيا
ناس جايين من عند الرسول [
آخر غندرة
نالوا الثواب والمغفرة!
وناس نايمين في ليمان طرة!
إلي الرئيس الإيراني أحمدي نجاد:
دقي يا مزيكا
إنت اللي باقي
شوكة في زور
إسرائيل وأمريكا!
ربنا يقويكا!
إلي المحامي الكبير نبيه الوحش:
اللي يدافع عن الغلابة
اللي واكلين حقوقهم
القرود والديابة
يدخل الجنة يوم القيامة
من أوسع بوابة!
إلي مصر المحروسة:
اللي معاه شوية ملايين
وغاوي يعمل فنطظية
يأجر شوية مكلمنجية
ويفتتح قناة فضائية!
إلي الكابتن سمير زاهر رئيس اتحاد كرة القدم:
أحلفك بالجبلاية
وهيئة المنتفعين
انت واخد الكورة المصرية
ورايح علي فين!
إلي الشاعرة الكبيرة إيمان بكري:
وجودك كشاعرة متميزة
في هذا العصر
منتهي النصر
وتاج من المعاني الجميلة
علي صدر حبيبتك مصر!
إلي نهر النيل العظيم:
سرقوا سلطانك
الله يرحم أيام فيضانك
وانت بتجري في الوادي
م الناحية دي للناحية دي
وسلطان زمانك!
إلي نادي الزمالك:
كل ميت سنة
وانت مبسوط ومسرور
وكسبان الدوري
ومفرح الجمهور
وعامل معاهدة صلح بين الهزايم
والفلس ومرتضي منصور!
إلي رئيس الوزراء الإيطالي برلسكوني:
استقالة عجبتنا كلنا
مفيش كدة
لا هناك ولا هنا
عقبالهم يارب وعقبال عندنا!
إلي البهو الفرعوني في مجلس الشعب:
معقولة
اللي تحت قبته
اجتمعوا زمان أعظم النواب
يحولوا أحمد عز في عصر الفساد
لمطعم كوارع وفتة وكفتة وكباب
والمجلس يدفع الحساب.. معقولة!
إلي الإعلامي الكبير حمدي قنديل:
نصيحة من المصريين اللي بيحبوك
خللي بالك فلول الفولة والفول
حيحاولوا بأي شكل يسكتوك!
-------
لبخيت بن بيومي صاحب المساحة