الأقوال المستباحة في النقد والصراحة

الظاهر انك توافقي

إلي منصور حسن المرشح المحتمل جداً لرئاسة الجمهورية
علي رأي ولاد الحلال
الظاهر انك توافقي
مع اليمين
ومع الشمال وعلي كل حال
حندعي لك بصلاح الحال
والصبر والاحتمال.. !! وراحة البال..!!
إلي أنور البلكيمي اللي كان نائب برلماني
علي رأي المثل
ناس تراضي ضميرها
وناس تواصل خط سيرها
وناس بتكعبل
في مناخيرها..!!
إلي النادي المصري البورسعيدي
حظك وبختك وقسمتك
جمهورك هوّه اللي شوّه
سمعتك..
وهوه السبب في أزمتك..!!
إلي محمد إبراهيم سليمان اللي كان وزير اسكان
علي رأي الشمتانين فيك
ياللي مرحمتش وزارتك
لما كانت الوزارة بين إيديك
دارت الأيام عليك «مع الاعتذار لأم كلثوم»..!!
إلي الشعب المصري الغلبان
مظلوم.. ومتهوم.. ومحروم
حتلاقيها من انفلونزا الفراخ
واللا من حمي اللحوم..!!
إلي مدير عام شركة فودافون «للتليفون المحمول»
في الكول تون
منتهي الاهمال
والاستغلال
واخدين فلوسنا
يا ولاد الحلال..!! آلوه يا حكومة السنترال..!!
إلي الشاعر الكبير مرسي جميل عزيز في ذكراه
لازلت في القلوب
جميل وعزيز
وصاحب جامعة الشعر الغنائى
الهايل واللذيذ..!!
إلي الدكتور عبد القوي خليفة محافظ القاهرة
نصيحة أخوية
خللي بالك من الأيام
اللي جاية
مترو العباسية
بيطلع ميه معدنية
امسك الشركة الفرنسية
والحرامية..!!
إلي الدكتور سعد الكتاتني رئيس مجلس الشعب
زي ما كان بيحصل
لفتحي سرور
حوالين فيلتك
في ستة اكتوبر
زرعوا الشوارع عواميد نور
ورصفوا الشوارع داير ما يدور «مبروك يا دكتور»..!!
إلي الاعلامي الكبير عماد الدين أديب
يا عمدة مفيش منك
في الزمان ده
اقولك باختصار
افتح جامعة اعلامية
لتعليم أصول الحوار..!!
إلي الملحن محمد رحيم
أقولك واللا بلاش
بيت النتاش
مايعلاش
بالذات من الاغاني اللي بعتها
ولحنتها والاغاني اللي ملحنتهاش..!!
إلي علاء الكعكي مدير شركة ميديا لاين
بيقولوا في المثل
اللي يخبط لنا في الحلل
نكسر وراه مركب قلل
هاتها البر
وبلاش خلل..!!
إلي الدكتور شاكر عبد الحميد وزير الثقافة
فضيحة في انحاء البلاد
لوُح وروسومات
الفنان بيكار يا ولاد
رفضت تشتريها الوزارة
واشتراها تاجر انتيكات
بتراب الفلوس من مزاد..!!
إلي الدكتور الفدائي كمال الجنزوري رئيس وزراء مصر
الشعب بيقولك
اوعي تسيب البلد ولا ثانية
اللي عايزينك تسبها
آخر شهر يوليه
الظاهر عايزين يفضوها
ويشوفوا للشعب بلد تانية..!!
* لبخيت بن بيومي صاحب المساحة