الأقوال المستباحة في النقد والصراحة

بخيت بن بيومي صاحب المساحة

اخلع
وخليك في الامان
المتغطي بالفيتو
قدام العالم عريان!
إلي المشجع الأهلاوي الطفل البريء أنس محيي الدين:
بيقولوا يا ابني في الامثال
يعملوها الخونة والاندال
ويقعوا فيها الشباب
والاطفال!
إلي زعيم حزب الوفد الدكتور السيد البدوي شحاتة:
بيقولك الحاج أحمد زيدان
عمدة كفر الاعيان
اللي يرفض العصيان
ويشجع الامن والامان
مصر تاخده بالاحضان!
إلي فارس الصحافة المرحوم مجدي مهنا:
نام في قبرك وارتاح
أعداء الوطن اللي بالي بالك
بلعهم التمساح!
إلي الدكتور تامر الشرقاوي العاشق مصر حتي النخاع:
وطنيتك تستحق
الدراسة والتقدير
وياريت تفتح عيادة لعلاج
الوطنية في ميدان التحرير!
إلي الكابتن محمود الخطيب:
بيقولك عم سلامة
مصر كلها محرومة
من الابتسامة
ومش حتضحك من قلبها
إلا لما ترجع بألف سلامة!
إلي الرئيس الايراني أحمدي نجاد:
اديني ودنك الذرية
أقولك كلمة
في ربع ثانية
خللي بالك
الصهاينة
ولاد الزانية
ناويين يضربوك
في شهر يونيه!
إلي الكرة المصرية:
يا مجنناني
يا مزعلاني
اوعي تنزلي الملاعب تاني
إلا بعد ما تخدي حقك
من الجاني اللي بكاكي
وبكاني!
إلي الدكتور أحمد محيي القاصد رئيس أمانة
المراكز الطبية المتخصصة:
الدكتور الكبير
والاداري القدير
اللي عنده ضمير في رعاية الفقير
ينفع في زمن العجايب سفير
وياريت في مصر منه كتير!
إلي النادي المصري البورسعيدي:
أبو العربي أبو البلديات
بيقول خلاص مفيش ماتشات
والنادي حيعملوه مسرح جنازات
وقرافة ودار مناسبات!
إلي سيادة النائب العام المستشار عبدالمجيد محمود:
علي رأي ولاد البلد الجدعان
لو عايزين تحققوا جزء
كبير من الامن والامان
حددوا اقامة سوزان في أي مكان
وياريت في الميدان!
إلي الشاعر الشعبي شوقي صقر رئيس لجنة الرعاية
بجمعية المؤلفين:
علي رأي خالتي أم عبده سراية
اللي يجيب حقوق المؤلفين
من غير ما يعمل لنفسه دعاية
يدخل الجنة يوم القيامة مع
الارامل والايتام والولاية!
إلي الشعب المصري المحترم:
علي رأي أبو سعدة
عارفين أمريكاليه
متعكننة ومتنكدة
علشان عملاءها وجواسيسها
وقعوا في المصيدة!
إلي الكابتن سمير زاهر اللي كان رئيس اتحاد الكرة:
ولا تزعل ولا تتهان
أعلن الهجرة
من بعده الكرة
واعمل لك اتحاد لحسابك
جنب مقر الفيفا في سويسرا!
-----------
لبخيت بن بيومي صاحب المساحة