فيديو.. المصريون بأمريكا وعام على الثورة

"بعد مرور عام على إجبار الرئيس المخلوع على التخلى عن السلطة فى مصر وتولى المجلس الأعلى للقوات المسلحة مسؤولية إدارة شؤون البلاد طبقاً لقرار المخلوع كيف يرى المصريين بالولايات المتحدة أحوال مصر توجهنا لهم بسؤال مباشر و محدد فى هذه الحلقة الأولى السؤال كان كيف ترى مصر بعد عام على خلع مبارك و كانت هذه هى إجاباتهم بلا رتوش"..
دكتور عصام أحمد - طبيب – نيوجيرسي:
"الوضع بعد مرور سنة كاملة على قيام ثورة 25 يناير مقلق لدرجة خطيرة فلم تتحقق أهداف الثورة على الاطلاق و الشعب المصري أصبح منقسم .. الشعب المصرى أصبح قلق جداً على الثورة .. الشعب يُضحى به فى أوقات كثيرة و مناسبات المفروض أن تكون سعيدة مثل مباراة المصرى و الاهلى .. الشعب المصرى خايف إن الثورة تكون قد سرقت بالفعل ."
ندا المنسي-طالبة جامعة مدينة نيويورك:
"بعد سنة من مغادرة الشباب للتحرير و اعتقدنا اننا انتصرنا و ان كده البلد اتغيرت .. شايفين ان تقريباً مافيش حاجة اتغيرت و يمكن الحال بقى أسوأ و كل شهر تقريباً فى شهداء وفى انفلات أمنى و فى بجد كوارث بتحصل فى البلد .. بس يمكن الحاجة الكويسة إللى طلعت من الموضوع هو ان بقى فى جرأة من الشعب و انهم بينزلوا فى مظاهرات و مليونيات و مش خايفين انهم يهتفوا ضد العسكر و ضد الحكومة ".
نانسى الشامي-باحثة علم اقتصاد جامعة كورنيل نيويورك:
"الواضح بالنسبة لى إن المجلس العسكرى مش حريص على تحقيق مطالب الثورة و أكثر حاجة ملموسة ممكن الواحد يشوفها هى مشاعر الناس تجاه المجلس العسكرى و تغيرها من 11فبراير الماضى و 11 فبراير الحالى لأن المجلس العسكرى أثبت ان عنده نفس المصالح بتاعة النظام السابق و هو لا يحدث أي تغييرات إلا بالقدر الذى يمكنه من السيطرة على الوضع فى البلاد ".
عصام الغرابلي-صاحب شركة مقاولات نيويورك:
"أنا حزين جداً على الوضع الذى وصلت له مصر و كان عندى أمل أنى أشوف مصر فى مرحلة تانية جديدة بعد خلع مبارك و لكن واضح إن المجلس العسكرى مش قلبه على البلد"
سارة السعدني-نيوجيرسي:
" و الله أنا شايفه إن الحال فى مصر بقى متدهور بدرجة غير عادية و هو شيئ غير طبيعى ان يحدث بعد ثورة المفروض إن العالم كان يريد ان يعلمها للاطفال فى المدارس .. المفروض ان يكون هناك إحساس بالمسؤولية فنحن قمنا بثورة و الاجيال الماضية عبر 30 سنة لم يفعل أحد شيئاً. "
أحمد التوني - نيوجيرسي:
"مصر تمر بظروف صعبة و هذا متوقع فالحرية لا تأتى بببلاش و لكن ستمر مصر بخير".
دكتورة سلمي ابو المجد-طبيبة اسنان نيويورك:
"الظروف فى مصر من سيئ إلى أسوأ .. الرئيس المخلوع حسنى مبارك يُثبت وجوده كل يوم لأنه سايب ورائه ناس أوفياء له و دول من يحققون خطته فى الفوضى ".
أحمد نادر مراد-باحث جامعة نيويورك:
"من رأييى ان مافيش حاجة اتغيرت والمشكلة إن ثورتنا كانت على ثورة 52 و العسكر لا يعترفون بأن هناك ثورة حصلت و يتعاملوا بنفس عقلية مبارك و مبارك مشى و فى 19 مبارك تانيين ما فيش حاجة اتغيرت فى البلد .. العسكر لسه بيحاول يخلى النظام العسكرى فى مصر .. بالسيطرة على الاقتصاد .. السيطرة على الاراضى .. السيطرة على كل حاجة و يخلى مجلس الشعب يبقى دوره غطاء للمجلس العسكرى ."
رحاب ملوخية- مهندسة ديكور نيويورك:
"الوضع فى مصر ماتغيرش كتير .. كل اللى حصل إن واحد بس إتشال أو مجموعة إتشالت اتحطت فى مكان .. مافيش أي حاجة سياسة النظام زى ما هو موجود .. تنفيذ الاوامر زى ما هو منوجود مافيش حاجة اتغيرت عن ما كان أيام حسنى مبارك و الحاشية اللى معاه غير أن إحنا شيلنا إسم و حطينا إسم و مجموعة تانية معاه لكن كل حاجة زى ما هى .. لا أعتقد ان الوضع فى مصر تغير إلا الحاجات الايجابية اللى عملتها الثورة و هى حاجات بسيطة مفروض تكمل".
سامح توفيق عبد النبي-نيويورك:
"انا كمصرى عايش هنا و شاركت فى الثورة اللى اهدافها كانت واضحة و لم يتحقق منها حتى الان إلا القليل و الوضع للأسف يزداد من سيئ إلى أسوأ كل يوم فعلى المستوى السياسيى كل رموز النظام السياسيى لم يأخذوا احكام و مازال الثوار يحاكموا امام محاكم عسكرية . "
مينا ابراهيم-طالب جامعة مدينة نيويورك:
"الوضع فى مصر ضبابى جداً مافيش أي خطة ."
كريم محمد-مهندس كومبيوتر نيويورك:
" ان معظم الحاجات المفروض تتغير لم تتغير حتى الآن .. الفساد منتشر بطريقة فظيعة و لم توضع خطط للاصلاح او التغيير ".

محمد البارودي-ناشط سياسي نيويورك:
"الوضع كما هو و احنا لما خرجنا فى يناير كنا نقول " الشعب يريد إسقاط النظام " فحسنى مبارك كان على رأس النظام و سقوطه لا يعنى سقوط النظام و كل مؤشرات الفساد مازالت موجودة فى مواقعها و لهذا فثورتنا مستمرة و النظام لم يسقط بعد ."
عصام اسكندر-مترجم نيويورك:
"البلد لسه ما قامتش وفى ثقافة عنف و إجرام بتنموا .. و ثقة الناس فى مؤسسات الدولة تكاد تكون منعدمة و لا أعرف ها تتصلح امتى ؟؟ !! و هذه فاتورة ليست رخيصة إن المواطن لا يثق فى مؤسسات بلده ."
دكتورة جينان رؤوف-استاذة جامعية نيوجيرسي:
" أنا شايفة إن الوضع خطر جداً و مش شايفة إن فى أي مطالب حقيقية تحققت و إن الثورة لم تنته و أن الثورة مستمرة ."
شاهد الفيديو