شباك علي الثورة

بقلم :أحمد فؤاد نجم
منذ 8 ساعة 5 دقيقة
قال احمد القزعة لعبده شمة:
- سمعت آخر نكتة يا غيبوبة؟
فقال عبده شمة ضاحكاً
- أنهي فيهم.. ماهي النكت اليومين دول ماتعدش
ونظر القزعة نحوي قائلاً
- تقول له انت ولا اقول له انا وأمري لله؟
قلت
- أمرك لله قول انت
فقال احمد القزعة
- بيقول لك ياسيدي المعلمة عايزة تطلع تحج؟ تصدق يا خبؤ؟
وضحك عبده شمة قائلاً
- أنهي معلمة فيهم يا واكل ابوك انت
وقال القزعة
- هي البلد فيها كام معلمة
فقلت له متسائلاً
- كام؟
وقال احمد القزعة
- هي فيه غيرها «السيدة الغولة» ياعم احمد
قلت
- وانت إيه رأيك يا حاج عبده؟
فقال عبده شمة
- رأيي في إيه ياعم أحمد؟
قلت
- في رحلة حج السيدة «الغولة» علي رأي القزعة
فقال
- ربنا وحده هو اللي يعلم بما في النفوس والضماير
وقال احمد القزعة
- أهي الاشكال دي هي اللي مضيعانا
قلت
- نسمع وجهة نظره الأول
فقال احمد القزعة
- سمعني وجهة نظرك يا غيبوبة.. اطربني اشجيني
فقال عبده شمة
- هو ياعم احمد مش ربنا غفار الذنوب اذا المذنب تاب وأناب
قلت
- ونعم بالله
قال
- جول لواكل أبوه ده
فقال احمد القزعة
- عايزة تتوب تجيب المليارات اللي سرقتها هي وجوزها وعيالها وبعدين ياكش تتوب ولا تولع بجاز
قلت
- دا كلام محترم يا حاج عبده وماحدش يقدر يقول فيه تلت التلاتة كام
وضحك الحاج عبده وهو يقول
- يا أخي الشعب المصري ده عارف إبليس مخبي ابنه فين وماحدش يجدر يضحك عليه
وقال القزعة ضاحكا
- فهمت يا خبؤ؟
وقال عبده شمه
- وما تفرض انها رجعت الفلوس مين اللي حياخد الفلوس دي
قلت
- لو مالقيناش حد ياخدهم نعالج بيهم مصابي الثورة اللي عددهم لغاية دلوقتي ماحد يعرفه تماماً زي عدد الشهداء «رضوان الله عليهم».