شباك علي الثوره

بقلم : أحمد فؤاد نجم
منذ 19 ساعة 44 دقيقة
قال عبده شمه وكأنه يحادث نفسه
- ياااه معجولة دي ياعم أحمد! داحنا علي كدة في الزمن اللي وصي عليه حسان اليماني
فقال احمد القزعة
- أيواااه كدة بقي حنخش في الهلفطة.. أيوة يا غيبوبة
فقال عبده شمه
- اسكت ياد يا تافه انت
فقال احمد القزعة
- أنا عايز اعرف الاول مين حسان اليماني اللي انت واكل دماغنا بيه وزمن إيه اللي وصي عليه سي حسان بتاعك ده وايه هي الوصية اللي وصاها
فقال عبده شمة
- بذمة النبي ياعم احمد انت طايج الجدع ده ازاي
فقال احمد القزعة
- خليك معايا أنا مالكش دعوة بعمك احمد وكلمني أنا
فقال عبده شمة
- أكلمك انت كيف وانت مابتفهمش؟
وقال القزعة
- خلينا لك انت المفهومية يا غيبوبة.. ياللا بقي انجز
وقال عبده شمة
- انجز كيف يعني؟
فقال احمد القزعة
- قول لنا انت مندهش من ايه وعمال تقول معجولة دي ياعم احمد هي إيه اللي مش معجولة يا غيبوبة
فقال عبده شمة
- خمسمية محامي كويتي جايين يترافعوا عن حسني مبارك وعياله وعصابته
وضحك أحمد القزعة قائلاً
- خمسمية حتة واحدة أمال حيفضل في الكويت كام نفر
وضحك عبده شمه وقال
- علي جولك امال حيفضل كام نفر في الكويت
قلت
- ونسيت اللي عمله النظام السعودي مع المعتمرين المصريين؟
فقال احمد القزعة
- دول تافين في بق بعض بقي
قلت
- الله ينور عليك ولازم نعرف ان النظام الكويتي هو حيل النظام السعودي
وتساءل عبده شمة
- جد كدة بيكرهوا مصر؟
قلت
- لا ياحاج عبده هما مابيكرهوش مصر لكن هما خايفين من اللي حصل في مصر وتونس واخيراً في ليبيا خايفين من الثورة لانهم عفنوا ع العروش اللي حطهم عليها الاستعمار والصهيونية وفيه حاجة لازم تعرفها كويس وهي ان النظام السعودي شيء والشعب شيء تاني والنظام الكويتي شيء والشعب شيء تاني فقال احمد القزعة مندهشاً
- ازاي بقي ياعم احمد فهمها لي دي
قلت
- مثلما كان نظام المخلوع حسني مبارك في مصر معاديا للشعب فإن النظامين السعودي والكويتي معاديان للشعبين هناك ومش بعيد يحصل هناك اللي حصل هنا وفي تونس وليبيا قولوا ان شالله.