شباك علي الثورة

بقلم :أحمد فؤاد نجم
الأحد , 14 أغسطس 2011 12:39
قال عبده شمة
سمعت ياعم أحمد الخبر؟
قلت:
اللهم اجعله خير
قال:
الواد مليم ابن الحاجة كايداهم جبصوه أولة امبارح فضحك أحمد القزعة قائلاً:
يا ابني انت حتنطق عربي امتي؟
فقال شمة:
مالك يازفت الطين انت
فقال القزعة:
جابصوه أولة امبارح دي عربي ياعم أحمد؟
قلت ضاحكا:
عربي عكس
فقال عبده شمة:
عما يجولك جاسوس سعودي كان ولا أبصر ايه
قلت:
أنا فعلا عندي معلومات إن المخابرات السعودية مجندة مجموعة من الشباب المصريين.
فقال عبده شمة:
اثنين مليون ياعم أحمد
قلت:
يخيل لي ان الرقم مبالغ فيه حبتين
قال أحمد القزعة:
رقم ايه ياعم أحمد وهي المخابرات السعودية دي مش عربية إسلامية؟
قلت:
بيتهيأ لي:
فقال القزعة
طب ازاي عرب ومسلمين يتجسسوا علي بعض؟
فقال عبده شمة:
وانت ايش أفهمك في المسائل دي ياجهول؟
فقال أحمد القزعة:
منك نستفيد ياغيبوبة
قلت:
الأنظمة العربية شيء والشعوب شيء تاني يا قزعة.
قال القزعة:
برضه مش فاهم
فقال عبده شمة
ولا عمرك حتفهم ياجزعة
قلت:
انت فاكر يا قزعة حصار قطاع غزة وضربه بقنابل الفوسفور الأبيض.
قال القزعة:
ودي حاجة تتنسي.
قلت:
أهو دا حصل بالتواطؤ مع نظام العميل حسني مبارك مش كده.
فقال القزعة:
كده تمام.
قلت:
هل الشعب المصري كله كان موافق علي كده.
قال لي:
لا كله ولا نصه ولا حد خالص كان موافق.
أيوه أيوه فهمت الشعوب شئ والحكام شيء تاني صحيح.