شباك علي الثورة

بقلم :أحمد فؤاد نجم
منذ 24 دقيقة 58 ثانية
نفخ عبده شمة أو زفر زي ما بيقول الإخوة النحاة
فقال أحمد القزعة
- مالك يا غيبوبة! شحنتها قمح وجت ملح؟
فلم يعره عبده شمة أي اهتمام وسألني
- هي العبارة دي مالهاش آخر ياعم احمد؟
قلت
- اللي له أول يا حاج عبده لازم يكون له آخر
فقال
- وميتا الآخر يا عم أحمد
قلت
- كل شيء بأوانه يا حاج عبده
فقال
- بس المسائل طولت وبوخت ياعم احمد
فقال احمد القزعة
- لو صبر القاتل ع المقتول كان مات لوحده يا خبؤ
فقال عبده شمة
- أيوة لكن البلد كدة حالها واجف
وضحك احمد القزعة قائلا
- كويس ان فيه في البلد حاجة بتقف الله يبشرك بالخير
وضحك الحاج عبده قائلاً
-ليه عاد انت ارتخيت يا جزعة؟
فضحك احمد القزعة قائلاً
- مش بالضبط يعني نص نص
فقال عبده شمه
والله أنا قلقان علي حال البلد
قلت
- انا عايز اعرف انت ايه اللي قلقك يا حاج عبده؟
قال
- غير البطء في محاكمة القتلة واللصوص أنا جلجان من حكاية سرية محاكمة شيخ المنسر
قلت
- هذه مسئولية القضاء المصري وعلينا أن نسأل انفسنا.. هل نثق في هذا القضاء؟
فقال احمد القزعة
- أنا أبصم بالعشرة يا غيبوبة
ورد عبده شمة
- وأنا أبصم بالعشرين يا جزعة
قلت
- إذن أين المشكلة؟
فقال احمد القزعة ضاحكا
- المشكلة في الصنف اللي بيستعطاه غيبوبة
وضحك عبده شمة قائلاً
- إن كان علي كده نغير الصنف يا واكل أبوك انت
قلت
- انا عارف ان فيه ناس كتير خايفين علي الثورة ومعاهم عذرهم.. لكن أنا عمري لا خفت ولاح أخاف علي ثورة 25 يناير طول ما الشباب المصري موجود
فقال احمد القزعة
- وطول ما ميدان التحرير موجود واحنا بعون الله مستعدين نقدم بدل الشهيد عشرة
قلت
- وربنا يخلي لنا الأم المصرية الحبالة الولادة
قالوا.. يااااارب