الفنان محمد عطية: "الوعي" هو السلاح اللي بيهد أي ديكتاتورية

طالب الفنان والمطرب محمد عطية جيل الشباب "بنشر الوعي" بين الناس لأنها المعركة الحقيقية في مصر حاليا من وجهة نظره مؤكداً أن الوعي "هو السلاح اللي بيهد أي ديكتاتورية".
واضاف عطية على حسابه الرسمي على موقع فيس بوك:"اليوم أعتقد إن أغلب جيلنا بيستخدم الفيس بوك وتويتر .. و بقى بالنسباله بديل عن الإعلام المخزى صاحب الإتجاة الواحد اللى إحنا بنشوفه .. و المعركة الحقيقية اللى ممكن ترجح الكفة .. هى معركة الوعي .. فأنا عاوز أقول لأصحابى اللى من جيلى اللى حاسين إن حلمهم بيتسرق منهم و مهمشين فى بلدنا .. أنشروا الوعى".
وقال عطية:" أكتر حاجة خايفة منها السلطة و مش عارفه تعمل فيها إيه هو الوعى اللى حصل عند الشباب و إنه بقى مهتم بشئون بلده و مش ساكت لو عندك معلومة تاريخية هتفيد إكتبها كتاب قريته فيلم شفته أغنية أي حاجة ممكن توعي الناس و تعرفهم حقيقة اللى بيحصل نزلها وأنشرها".
وأوضح عطية انه:" هتلاقى اللى يقولك( يا عم إنت هتعمل مثقف ؟؟ يا عم ما تسيبك شوية من السياسة و شوف شغلك ؟؟ إنت هتعيش فى الدور ؟؟) مزايدات مش هتخلص .. ماتسكتش .. الجيل اللى قبلك سكت و مشى جنب الحيط و أديك شايف النتيجة .. سلمك حاضر مؤلم .. و دايما حط فى دماغك إن فى معركة الوعى إنت الأقوى .. لأن التاريخ بشواهده واقف فى صفك .. و الواقع المؤسف و الوضع الحالى كمان بيأكد إن فى مشكلة ".
وأنهى عطية حديثة قائلاً:"و عاوز تعرف الفرق اللى حصل و اللى مخوف السلطة .. إفتح الأكاونت بتاعك على فيس بوك .. شوف نفسك من 4 سنين و شوف نفسك دلوقتى .. إحنا كان كبيرنا بنعمل شير لكليب أو نكته .. حلو مافيش مشكلة.. إنما دلوقتى جنب ده .. أنا وإنت بقينا بنناقش قرارات السلطة و بقينا مهتمين بمستقبلنا ورافضين إنه يتفرض علينا .. شارك فى معركة الوعى بكتاباتك و صوتك .. خوفهم و إكشفهم بالسلاح اللى بيهد أى ديكتاتورية ( الوعى ) ".