ابقى قابلنى

بمناسبة العام الدراسى الجديد لازم نظبط طلبة الجامعة قبل بداية الدراسة؛ علشان ما حدش يضحك عليهم من أولها من التيارات إياها، وعشان كدة يبقى مفيش غير طريقة واحدة اتجربت بعد الثورة ونجحت تمامًا وهى: سمك لبن تمر هندى، ونفتح لهم صندوق النخبة.
عزيزى طالب سنة أولى جامعة، أنت دلوقتى فى مرحلة تشكيل مهمة للوعى، وإحنا بصراحة خايفين حد يضحك عليك كدة ولا كدة ويلعب فى دماغك، عشان كدة إحنا عملنا ورشة عمل وأسسنا لك أسرة طلابية محترمة ومركزية فى كل كلية، علشان نحاصرك فى كل مكان ونساعدك فى تحديد اتجاهاتك السياسية من غير ضغوط ولا إغراءات، واخترنا لها اسم بسيط ولذيذ جد وها تحفظه بسهولة، إيه رأيك فى حركة التيار الشعبى المصرى التقدمى التجمعى الديمقراطى الاشتراكى الوحدوى الباذنجانى الثالث، والاسم المختصر "ابقى قابلنى".
وقررنا نساعدك بجد فى تحديد اتجاهاتك، واخترنا لك عصارة تجاربنا المجتمعية، إللى مصر بجد جربتها بعد الثورة وكانت ميت فل وعشرة، عشان محدش يضحك عليك لا بأخونة الدولة ولا بشفشقة الدولة.. بص يا سيدى لو أنت عاوز تبقى من النخبة اضرب شعرك فى الخلاط، والبس نضارة أو حمالات، واديها كلام فى الهايف، وحبة مصطلحات غريبة، مش مهم حد يعرف معناها، وبعدها بشهرين تلاتة تبقى نجم الفضائيات.
ولو عاوز تبقى زعيم كارتونى وتبقى واحد مننا أو خمنا، وتجيب أصوات كتير فى الانتخابات بالصدفة، وتاخد فى نفسك قلم كبيييير اضرب اسمك فى اتنين زى أحمدين وعوضين وحسنين وأشرفين وحمدين، ونسيب إللى ورانا ونعيد لسيادتك الانتخابات كل شوية ومش هنخلص بأة لحد بسلامتك ما تكسب يا تنتحر بأة وتخلصنا!
ولو عاوز تكسب أى انتخابات شوف مين إللى بينافسك فيها واضرب له صور شوية أحكام ونزلهم على الفيس بوك واعمل حسابات بأسماء وهمية واشتم فيه كل يوم شوية لحد ما الناس تاكل وشه، وروح ارفع عليه قضية وشهر بيه هو ها ينسحب لوحده وأنت يا عم حلال عليك.
ولو انحرفت وعاوز تمارس الرذيلة وأنت مأمن نفسك كويس أجر كاميرا وواحد يصورك وواحد تانى يعمل نفسه مخرج، ولو البوليس كبس عليك قول له عادى يعنى فيها إيه إحنا فنانين وبنصور فيلم وده كله مجرد تمثيل، ولو عاوز تمثل معانا مشى العساكر وتعالى لوحدك يا عم ومش هندفعك حاجة، يقوم الظابط يبوسك ويقولك يا مبدع يا فنان يا محترم.
ولو عاوز تعرف البرادعى مختفى ليه من كام يوم مفيش ولا حس ولا خبر، ممكن أقولك بس ده سر، هو يا سيدى دلوقتى بيجاهد من وراء شاشة إل سى دى وبيفكر فى سطرين يكتبهم بكرة على "تويتر" عشان مذيعة القناة إياها تتحفنا بالسطرين دول كل ربع ساعة وكمان يطلعوا كل شوية فى شريط الأخبار.
ولو عاوز تعرف مصطفى بكرى مستخبى فين دلوقتى وبيعمل إيه، أقولك يا سيدى: إنه بعد إقالة طنطاوى وعنان انتابه شعور بالملل الشديد؛ لأنه مش لاقى حد يملأ فراغهم فى حياته، وحاسس بوحدة واكتئاب، ففكر يعمل حزب جديد اسمه "الوحدة" ومش لاقى حد ينضم معاه يونس وحدته ويسليه!.
Ashrafaliosman@Yahoo.com