ياسمين عبد العزيز عن فترة مرضها: شوفت الموت ورجعت

قالت الفنانة ياسمين عبد العزيز إنها أصبحت أفضل بعد الأزمات التي تعرضت لها خلال الفترة الأخيرة من حياتها، بفضل أنها أصبحت تحب نفسها وتعطيها اهتمام أكثر من السابق.
وأضافت خلال حلولها ضيفة على برنامج "معكم منى الشاذلي"، مساء الخميس، المذاع عبر شاشة "ON" مع الإعلامية منى الشاذلي: "بقيت أنانية شوية لنفسي، كنت بدي كل اللي حواليا ما عدا أنا، فأنا خلاص كفاية وبقيت أحب ياسمين شوية".
اقرأ أيضًا|ياسمين عبد العزيز تعلن ظهورها مع منى الشاذلي.. قريبًا
لفتت إلى أنها مرت بمرحلة عدم اتزان في حياتها، وفي تلك الفترة ظهرت في أحد البرامج التلفزيونية، التي كان يتطلب وقتها أن تمنح نفسها مزيدا من الوقت حتى تظهر في مثل هذا اللقاء وتستطيع التحدث، مضيفة: "لأن الواحد وهو جوه الموضوع بيبقى غير براه، مبتبقيش شايفة وأنتي جوه الحاجة بتبقي في الدوامة".
تابعت: "مينفعش حد ياخد قرارات وهو جوه الحاجة، حتى في الطلاق مش لازم تدخلي علاقة بعد الطلاق على طول، حتى لو أنتي طالبة الطلاق فهو مش حاجة سهلة، وبيحصل عدم توازن لأي حد بيتطلق، فلازم الواحد يهدى ويرتب دماغه"، متابعة: "أنا في وقت مكنتش حاسباها صح، واتكلمت في حاجات كتير مش صح، وغلطت، ولما أقول غلطت مش معناها إني ضعيفة".
استطردت: "الحاجات اللي مريت بيها في حياتي أي حد مكاني كان ممكن ينهار.. حروب، أذية، طلاقات، كنت في المستشفى 4 شهور ونص، شوفت الموت ورجعت.. كل واحد بيشوف مشكلته كبيرة، لكن في الآخر القوي هو اللي بيكمل".
كما أشارت إلى أنها استمدت قوتها لتخطي أزمات حياتها الأخيرة من الله عز وجل، مؤكدة أن صاحب الفضل الوحيد في حياتها هو الله سبحانه وتعالى، مردفة: "لما بتقربي من ربنا بيطلعك من أي حاجة، والفترة دي مقعدتش كتير، ربنا بيحبني".
استكملت: "في سنين من عمري ضيعتها، بسبب إني كنت خايفة الناس تشمت فيا، واكتشفت بعد كده أنه طب ما يشمتوا، أقعد أنا في حياة مش مبسوطة فيها عشان الناس هتشمت؟! ما يشمتوا، في الآخر أنا اللي مش مبسوطة، محدش قاعد مكاني"، مؤكدة أن تلك النظرة هي من بين الأشياء التي غيرتها في حياتها مؤخرا، مؤكدة أن أهم شيء لديها في الوقت الحالي هو أن تصبح سعيدة.
في سياق آخر قالت: "مش هينفع تكبري وتنجحي من غير ما يكون ليكي أعداء"، مشيرة إلى أن الزواج في الوسط الفني ليس له علاقة بالطلاق، فالانفصال يحدث في كل حتة سواء بالوسط الفني أو خارجه، مضيفة: "إحنا عندنا نسية طلاق كبيرة جدا في الوطن العربي".
اقرأ أيضًا|إسلام زكي: لحنت «ماليش بديل» من 10 سنين وعمرو دياب مابينساش الأغاني الحلوة
وعن أسباب حديث الناس عن طلاق الفنانين، ذكرت: "أي حاجة بتظهر للناس مفيهاش بركة، وأنا لو هتجوز في يوم من الأيام مش هظهر الكلام ده، أنا عايزة أعيش حياة مستقرة بعيدة عن الأضواء"، موضحة أن معنى كلامها لا يعني أنها ستتزوج في السر، لكنها ستحافظ على خصوصية حياتها.