عطية: "السلطة خايفة من وعي الشباب.. لأنه بِيهد أي ديكتاتورية"

طالب الفنان محمد عطية جيل الشباب "بنشر الوعي" بين الناس لأنها المعركة الحقيقية في مصر حاليا من وجهة نظره ، مؤكداً أن الوعي "هو السلاح اللي بيهد أي ديكتاتورية.
وقال عطية فى تدوينة له على موقع التواصل الاجتماعى " فيس بوك": "اليوم أعتقد إن أغلب جيلنا بيستخدم فيس بوك وتويتر.. وبقى بالنسبه له بديل عن الإعلام المخزي صاحب الاتجاه الواحد اللي إحنا بنشوفه.. والمعركة الحقيقية اللي ممكن ترجح الكفة.. هي معركة الوعي.. فأنا عاوز أقول لأصحابي اللي من جيلي اللي حاسين إن حلمهم بيتسرق منهم ومهمشين في بلدنا.. انشروا الوعي.
وأضاف عطية: أكتر حاجة خايفة منها السلطة ومش عارفة تعمل فيها إيه هو الوعي اللى حصل عند الشباب، وإنه بقى مهتم بشئون بلده ومش ساكت لو عندك معلومة تاريخية هتفيد اكتبها.. كتاب قريته.. فيلم شفته أغنية أي حاجة ممكن توعي الناس وتعرفهم حقيقة اللى بيحصل نزلها وانشرها.
وتابع: هتلاقى اللي يقولك (يا عم إنت هتعمل مثقف؟؟ يا عم ما تسيبك شوية من السياسة و شوف شغلك؟؟ إنت هتعيش فى الدور؟؟) مزايدات مش هتخلص.. ماتسكتش.. الجيل اللي قبلك سكت ومشي جنب الحيط وأديك شايف النتيجة.. سلمك حاضر مؤلم.. ودايما حط فى دماغك إن في معركة الوعي إنت الأقوى.. لأن التاريخ بشواهده واقف في صفك.. والواقع المؤسف والوضع الحالي كمان بيأكد إن في مشكلة.
وختم: عاوز تعرف الفرق اللي حصل واللي مخوف السلطة.. افتح الأكاونت بتاعك على فيس بوك.. شوف نفسك من 4 سنين وشوف نفسك دلوقتي.. إحنا كان كبيرنا بنعمل شير لكليب أو نكتة.. حلو مافيش مشكلة.. إنما دلوقتي جنب ده.. أنا وإنت بقينا بنناقش قرارات السلطة وبقينا مهتمين بمستقبلنا ورافضين إنه يتفرض علينا.. شارك في معركة الوعي بكتاباتك وصوتك.. خوفهم واكشفهم بالسلاح اللي بيهد أي ديكتاتورية (الوعي)!!.