أحمد حلمي: لقائي بميسي "سوء تفاهم"

نفى الفنان أحمد حلمي ما تردد حول ادعائه الالتقاء بلاعب الكرة الأرجنتينى "ليونيل ميسي".
وكتب حلمي عبر صفحته الرسمية على "فيس بوك"، "أنا مقولتش إني قابلت ميسي ولا حتى شفته، أنا قلوت "ده إعلاني الجديد مع ليونيل ميسي"، إنما كل واحد مننا صور الجزء بتاعه في بلده، وده الطبيعي اللي بيحصل في الإعلانات اللي بيكون فيها كذا شخصية من جنسيات ودول مختلفة، ممكن تكون غلطتي إني موضحتش طريقة عمل الإعلان، بس ده لأني تخيلت أن دي حاجة ممكن تكونوا عارفينها".
وأضاف "على فكرة في إعلانات كتير أجنبية اتصورت بالطريقة دي برضه، بس طبعا كله لازم يكون بالاتفاق والموافقة مع كل الأطراف اللي هتظهر في الإعلان، يعني كل واحد لازم بيبقي عارف مين الشخصية اللي هاتظهر معاه في الإعلان ولازم يكون موافق عليها كمان، وإلا كان بقى زمان كل واحد راح عمل إعلان لنفسه حط فيه كل نجوم العالم".
وتابع، "على فكرة أنا لما عملت الصفحة دي عملتها علشان أكون متواصل معاكوا، مش علشان أخدعكوا، لأن آخر حاجة ممكن أعملها في حياتي هي إني أخدعكوا أو أضحك عليكوا، لأني قبل ما أخدعكوا هاكون بخدع نفسي، أوعدكوا المرة الجاية في إعلاني مع "جيمس بوند" هابقي دقيق أكتر من كده، ((ما فيش إعلان مع جيمس بوند ولا حاجة.. أنا بهزر لحسن تاخدوها بجد))، وكل سنه وانتوا طيبين".