دى الحقيقة المرة اللى بنفوق عليها ؛ لما تتأخر البنات فى الجواز شوية يوافقوا على أول حيطة تخبط على باب البيت ، يقولولك وماله اهى تبقى فى قفا راجل .. كفايه انها هتتجوز أهو احسن من قاعدتها وكل بنات العيلة اتجوزت وهى لسه ، من مبدأ يعنى أننا نطمن عليها مش نرتاح من ناحيتها لاسمح الله ولا حاجة ؛ يلا تتجوز وتخلفلها حته عيل يسندها بدل ماهتقعد بين أربع حيطان .. صباحك فل يا عم الحاج منك ليه كده أنت وهو ؛ أنتو نصبتوا العزا على الميت وهو حى ما تهدوا كده وتسمعونى ؛ هو إيه اللى ضل راجل ولا ضل حيطة ، لا طبعا ضل الحيطة احسن مليون مرة من ضل راجل مش راجل ، نص البنات اصلا بنات بميت راجل يعنى البنت الواحدة تفكها بعمارة خمس أدوار كده لو هنحسبها بالحيطان ، البنت بتعرف إمتى تحمى نفسها وإمتى تعمل الكردون المناسب حواليها علشان ماحدش يقرب منها ولا يتعدى حدوده معاها ، فمش محتاجه لراجل حيطة ، محتاجه لراجل يحتويها ، راجل وقت الشدة يكون راجل مش حيطة ، راجل يعرف يكون ليها أب وأخ وصديق وأبن وعم وخال وكل حاجة قبل حتى ما ييبقى زوج ، مش حيطة لامؤاخذة ، البنت طول ماهى فى بيت ابوها متصانة أحسن ما تقعد فى الضل متهانة مافيش حاجة اسمها عانس غير فى مجتمعنا الشرقى فقط اللى بصراحة مش لاقية أى ترجمة للكلمة دى غير أنها مسمى سازج وغبى وقبيح ، البنت لما بتكبر فى السن بتوصل للنضوج فى كل حاجة ، تفكيرها ناضج ، و وعيها وإدراكها للحياة ومفاهيمها ، ردود أفعالها ونظرتها المستقبلية ، إهتمامتها بأولويات الحياة أكثر نضوج ، وصول البنات لسن التلاتين وفيما فوق مش عنوسة زى ما بيطلق عليه البعض لا بالعكس ده قمة النضوج بس لو إحنا سيبناهم ينضجوا فى مجتمع خصب و واعى ، مش نضغط عليها بكلام مستفز زى ( يا حبيبتى انتى لسه ما تجوزتيش ياعينى ، إيه ده هما الرجالة أتعموا مافيش نظر يا أخواتى ) وقيس على كده كلام كتير من اللى بيأثر فيهم وبيجرفهم لطريق غلط ، أنها ترضى بأى حد مقابل أنها تتخلص من نظرة مجتمع عقيم الفكروالتفكير ، مجتمع بيحكم بس على الواحدة من خلال عقد جواز ولا دبله فى إيدها ، مجتمع بيعلق كل علاقته بيها وتصرفاته معاها من خلال النقطة دى ، إلا من رحم ربى ، على الرغم من أن معظم البنات بتدفع حياتها ضحية لكلام الناس برضه ، بتتجوز علشان ترضى مجتمع وتخلص من رزالاته وهجماته المستمرة عليها، اللى بيترتب عليه زواج فاشل ، لانه إختيار تحت ضغط وغير مناسب ، وممكن تضطر تكمل علشان تداوى الغلط اللى فات بغلط تانى أكبر انها تستمر ، مهو مش معقولة تخلص من عانس تدخل فى مطلقة ، ده حتى عيب وما يصحش ، أحنا فى مجتمع محافظ ، يفعل الرذيلة فى الخفاء ،ثم يخرج للمجتمع ليتوضئ ويصلى الفجر .. إحنا محتاجين نصلح نظرتنا لبعض ، ياريت ما نحكمش على حد لا من خلال شكله ولا حالته الإجتماعية ولا أعزب ولا مطلق ولا غيره ... كل واحد فينا ربنا كاتب له نصيبه من الحياة فاللى كاتبه ربنا هيكون لازم نحترم بعض ، وظروف بعض ، ويارب كل البنات تلبس الفستان الأبيض للى يستاهلها بجد اللى يصونها ويحميها ويأمن خوفها مش يكون هو سبب خوفها من بكرة ، لو خافت فى يوم وهى معاه تخاف عليه مش منه تخاف على الراجل مش تخاف تنهد عليها الحيطة
