يوميات أم مفروسه الحلقة الثامنة // هم ما يتلم بقلم رنا هاشم

أركني العربية يا نادين ريقي ناشف , تعالى نشرب أي حاجة
ما خلاص يا مَلك أهدي بئا
خلاص أزاي هو أنا كنت ناقصة كمان مشكلة زي دي تحصل يا خبر أسود , دي
مصيبة يعني أيه ولد في السن ده يقولي كده هي دي أخرة الحرية اللي أنا
أديتهالم علمت و ربيت علشان يجي ولد عمره 16 سنة يقولي كده
يخرج مع صحابه ماشي
فيهم بنات عادي كلهم بنات عائلات و أنا عارفاهم ,
معجب بواحدة بيحبها
اوك كلنا عدينا بده
بس يجي يقولي كلمي ابوها و هتجوزها ولا هعملكوا مصيبة
والله يا نادين فكرته بيهزر فضلت أضحك يقوم يحمرلي عنيه و يقولي هتشوفي !!
أشوف أيه بالضبط خلصوه من أيدي و ربنا بالقوة
و هو بيقولى أنت كده هتخليني أغلط يا مصيبتي أنا عنيا طلعت من مكانها
من الأسبهلال تغلط أيه يا محترم ده أنا لسة ممم ...
ولا بلاش خلينا ساكتين
3 ساعات دهشة غبية مرسومة على وشي لحد ما وصل المحروس باباه
حكيتله أسم النبي حارسه صوته وصل لأديس أبابا
طبعاً يا هانم مش تربيتك
أنا ؟؟
أيوا أنت أمال مين سايباه يخرج يسهر ملبياله كل طلباته مفيش لأ
تصوري يا نادين ده بس أللي أفتكره
ما أفتكرش أن هو و أخته أي مكان يدبوا رجلهم فيه يقولو عليهم أنهم
ولاد متربيين مؤدبين
ما افتكرش أن صوتهم ما بيطلعش إلا بكل قول حسن
بيصلو و بيصوموا
إتعلموا يعرفوا ربنا من صغرهم
يا نادين مش كلام باهر اللي قتلني ده طفل صغير حب حبه الأول محتاج
اننا نحتويه نتعامل مع التغيرات الفيسولوجيه اللي بيمر بيها في سنه ده
مين يحتويه غير أبوه ؟؟
ولا لما يتفوق الناس تقول أبن أبوه ولما يغلط يبئا تربيه أمه .. مش
باهر اللي مضايقني .. باباه هو اللي قاتلني
دولة الرجال العقيمة اللي مبتخلفش الا الذل والتهميش والسخرية
لكن لا أبني اللي هو تربيتي أنا هحتويه وهحميه هو و أخته من تفاهة
أفكار أبوهم واللي زيه وهعلمهم أكثر وهفهمهم أن الحرية إحترام افكار
المجتمع اللي أنتوا عايشين فيه
أعلم بنتي أن زماني غير زمانها لما تتجوزي تكوني قد راجل كل همه في
الحياه تحطيمك يا تواجهي صح يا بلاها أحسن تقعد جنبي ,
ولادنا زرعة خضرة بالحنان والاحتواء بنرويها وكلو في الاخر بيعدي
أشربي أشربي ما أحنا ياما شربنا مر وهم
مش حاجة تفرس ؟؟