رباعيات

كنتي بتلعبي.. وأنا قلبي صبي
ولا كنت شيطان... ولا كنت نبي
والقلب اهو شاب علي باب الأحباب
لسه بيستني.. لسه غبي
***
يعني هتفضل تهرب يعني
ركز بقي أرجوك واسمعني
اقدر أحبك.. غصبن عنك
قول لي بقي انت ازاي تمنعني؟
***
لما باقول لك ان أنا عاوز
ألمس خدك وابقي الفايز
انا باعتبر ان ده من حقي
وانتي بتعتبري ده تجاوز!
***
نفسي أقعد نتكلم عادي
نشرب شاي مثلاً.. في النادي
لكن احساسي بيتغير
لما باشوفك.. ماشية قصادي
احتاج لك في ساعات البرد
اقطف من ع الخد الورد
عمر ما حد يحبك قدي أنا
.. واحد بس علي الأرض
***
في العشق انتي سبب جوعي
والبعد سنين.. ورجوعي
باجمع قلبي المتكسر لكن
ماتبانش دموعي!
***
كان نفسي أكون زي العاشقين
وارسم قلب.. وسهم.. وحرفين
لكن ديما أخاف علي اسمك
لا الناس يسألوا.. ويقولوا دي مين
***
حاسب.. مش كده أرجوك حاسب
ومسيرنا هنقعد نتحاسب
علي بعدك عني وتعذيبك
خليها بقي لوقت مناسب