ننشر آخر ما كتبه "محمدي" علي حسابه الشخصي قبل اعتقاله

تداول ناشطون آخر ما كتبه الناشط السياسي المحمدي محمد، عضو حركة أحرار والمتهم بالانضمام لكتائب حلوان والذي ألقت قوات الأمن القبض عليه فجر اليوم .
وذكر المحمدي، أنه أحد المصابين برصاص الأمن والبلطجية في ثورة 25 يناير، وأنه كان من أنصار حمدين صباحي "بتاع التصريحات"، بحسب تعبيره، حتى التقى حازم أبو إسماعيل وأيده بسبب الحملة الإعلامية الشرسة ضده، وأنه لن ينتخب محمد مرسي، وكان من أشد المعارضين لحكمه.
وقال محمدي إنه رفض المشاركة في تظاهرات 30 يونيو، التي قال إنها من تنظيم وتخطيط من وصفهم بالعسكر، لإعادة الوجود مرة أخرى، لذلك قرر المشاركة في اعتصام رابعة حتى فضه، والتظاهر ضد ما اعتبره انقلاب عسكري على حكم وإرادة الشعب.
وجاءت نص تدوينة المحمدي:
آخر كلمات
حابب أقول كلمتين كده عشان لو إتمسكت ابقى ريحت ضميرى !
انا اسمى محمدى محمد طالب من زمان فى جامعه عين شمس اه والله زاى ما بقولك كده !
واحد من اللى اتصابو فى ثورة 25 يناير يوم جمعه الغضب قعدت سنه و 5 شهور بتعالج فى مستشفى منشيه البكرى العام اى حد المستشفيات الحكوميه الجميله اللى كنت بشترى فيها كل حاجه على حسابى
شاب مصرى عادى .. زاى كل الشباب اللى نزلت الثوره كان بيحلم بعيش حريه وعداله اجتماعيه ! بس للاسف اضحك عليا
كنت من انصار حمدين صباحى الراجل الثورى بتاع التصريحات زايكو كلكو ونزلت انتخبته فى المرحله الاولى !
وبعدين لقيت فى راجل كده بيتكلم اسمه الشيخ حازم قولت اسمعله هو انا ليه ديما همشى وراء كلام الاعلام وبالفعل سمعت كلام الراجل عن المؤامرة الامريكيه على مصر والهيمنه وبدات افهم الوضع فى مصر والدول العربيه جمبنا ماشى ازاى !
وعلى فكره أنا معصرتش على نفسى ليمون ونزلت انتخبت مرسى زايكو عشان انا مكنتش شايفه فيه الرئيس الثورى اللى كنت بحلم بيه وقطعت الانتخابات
ومرت الأيام ومرسى مسك الحكم وكنت من اشد المعرضين لمرسى طول النهار اقسم بالله نازل فيه تاجريح هو والاخوان وشتيمه زاى ناس هبله كتير مكنتش تعرف ان العسكر ادنا سنه حكم مع شويه ازمات مفتعله عشان يكره الناس فى الحكم المدنى عشان يرجع تانى بحكم عسكرى !
وقبل 30/6 بشهرين كنت من اكتر المؤيدين لمرسى لأنى كنت عارف انه لو اتعزل زاى حسنى الشعب مش هيسكت وبالفعل اللى حذرت منه لقيته ..
نزلت رابعة وطلعت على منصة رابعة وانا مطلعتش عشان الشرعية طلعت عشان أقول أنا ضد حكم العسكر واللى فاهم يعنى أيه حكم عسكرى كان هينزل زاى بس فى ناس أول لما بتسمع أنك ضد حكم العسكر تقولك أنتا ضد الجيش يا خاين يا عميل اهو الناس دى اكتر ناس بتبقى عايزه تضرب بالجزم.
اتفض الاعتصام وكلنا هربنا وأنا من ساعة موضوع فض رابعة وأنا كل يوم لما الداخلية ميبقاش عندها شغل تروح عامله ليا قضيه وتقول عليا انى ارهابى .
طيب اشمعنه انتا يا محمدى ؟ ! ما فى ناس كتير زايك ؟ !
هقولك ليه انا كنت واحد من اللى شركو بفضل الله فى كل الاعتصامات من اول ال 18 يوم وكنت بنزل وانا مضروب بالنار على كرسى متحرك مرورا بمحمد محمود ومجلس الوزراء الخ الخ الخ لحد اعتصام رابعه ..
طيب برده اشمعنى انتا يا محمدى بيعملو برده معاك كده !
هقولك ليه الشعب طول عمره حافظ شكل الارهابى انه واحد محلقش لحيته من اول لما اتولد ماسك بندقيه بيقتل فى الناس اللى مش بتصلى وبتنزل تعوم فى البسين وطبعا مش هتكلم عن الفزاعه الاعلاميه اللى بيستخدمها الاعلام المصرى للتخويف من الارهابين
بس المره دى الداخليه والاعلام بتاعها معرفوش يعملو معايا اللى بيعموله مع باقى الناس
لقونى شاب بلبس شورت وبلعب حديد وكنت بلبس سلسله مش ده الارهابى اللى هما متعودين عليه
أنا فاكر ان قناه كده مش فاكر اسمها كانت بتذيع اسامى ارهابين مطلوبين لقيت اسمى وسطهم محمدى محمد الشهير باورتيجا وحطين صوره واحد ملتحى
أكيد لو القناه دى كانت حطت صورتى بالشورت الشعب مكنش هيصدق
واكتر ارهابين دلوقتى الدوله بتحاربهم هما الشباب اللى عندهم وعى اللى فاهمين ان مصر عمرها ما هتضرب اسرائيل عشان مصر هى اللى بتحميها !
كان قدامى طريقين بعد الثوره
أول طريق انى اصرف الشيك ابو 50 الف جنيه بتاع الجيش واقبل شهاده التقدير اللى قدمها ليا مجلس الوزراء ايام الجنزورى وانى ابقى ناشط سياسى بقى وكده زاى الشباب العره اللى بنشوفهم بيتكلو باسم الثوره والثوار دلوقتى
او انى اكمل فى الشارع زاى ما انا ويقولو عليا مجرم وبلطجى والكلام الكتير اللى بيقوله ديما ده
أسال نفسك يا كابتن يا اللى بتقرى البوست لو أنتا مؤيد للسيسى مصر ليه برغم أن كل يوم فى ولاد ليها بتموت على الحدود من إسرائيل مش عايزه تحربها !
ناس كتير سالتنى لو الجيش حارب ممكن تطوع فى الجيش طيب انتا بتحب مصر اصلا ؟
أكيد هطوع فى الجيش وهكون على خط النار بس لما نحارب اسرائيل ... إسرائيل .. إسرائيل مش ليبيا ولا غزه ! ومفيش حد بيكره بلده برغم ان البلد دى ياما شوفنا فيها ايام سوده !
موضوع السلاح اللى مشيرينه ليا وبيقولو عليا قائد كتائب حلوان
أنا هقول ليكو أيه موضوع السلاح ده فى السريع كده انتو عارفين الشعب المصرى بيحيب يتصور بالحجات دى كان فى فرح جمبى بعد الثوره وكان فى ناس اعرفها معاها سلاح اخدتها واتصورت بيه أيه الجريمة فى كده
ممكن تقولو عليه طيش شباب هزار بوابين سموها زاى ما تسموها بس الحمد لله انا عمرى لا قتلت حد ولا اصبت حد ولا ناوى اعمل كده ! رغم ان اللى ضربنى يوم 28 يناير هى الداخليه واللى قعدتنى سنه ونص فى المستشفى هى الداخليه بس الحمد لله على كل شى
واخيرا انا مبسوط والحمد لله وعارف انى لو اتمسكت هيتعمل معايا الجلاشه بس خلو البوست ده ذكرى عشان لما اتمسك ويقولوا عليا بلطجى وبتاع .. ابقو فهمو الناس دى اننا مبعناش ولا خوفنا من تهديد حتى بعد ما قبضو على بابا عشان اسلم نفسى مخوفتش وكملت زاى ما أنا بالعكس انا عرفت قد ايه النظام ده غبى وخايف مننا !
معلش بقى لو طولت عليكم بس أنا ختزلت 4 سنين مرت من حياتى فى بوست ميكملش 5 دقائق
عشان محدش يدخل يقول انى بتاجر وعشان اتشهر والكلام الفاضى ده ربنا يعلم مكنتش احب نفس فى الموقف ده عشان اسمع كلمه من حد مالوش لازمة .