زيادة الإنتاج أهم من مساندة البورصة

* * حسنين : شد حيلك معانا عايزين يوم الأحد كل واحد يشترى فى البورصه ولو بميت جنيه . علشان نسند بورصة بلدنا بدل ما تقع .
= = = محمدين : طبعا أنا مقدر مشاعر الشباب وإنهم بيعملوا كدا فى حب مصر . لكن للأسف بكدا بيلعبوا فى الملعب الغلط .
* * حسنين : يعنى إيه ؟
= = = محمدين : يعنى الفكره نبيله . لكن فيه أصحاب مصلحه وراها . والنتيجة إنك حتخلى الشباب دول زى شوية سمك صغير . تأكلهم الحيتان إللى فى البورصة سواء كانوا حيتان أجانب ولا مصريين .
* * حسنين : برضه موش فاهم .
= = = محمدين : فاكر زمان لما قلنا إن البورصة دى سوقين . سوق الإصدار وسوق التداول . وإن سوق الإصدار دا هو إللى الاقتصاد عايزه لأنه بيشغل الناس وبيزود الإنتاج . وقلنا إنه لما نكون عايزين نعمل شركة جديده بنقسم رأسمالها على أسهم صغيره علشان الناس تشتريها . ونجمع الفلوس إللى نعمل بيها الشركة بدل ما تاخد فلوس من البنوك .
* * حسنين : فاكر . كمان إنت قلت إنه لو الشركة دى حبت تتوسع فى أى وقت تعمل نفس العمليه . تطرح المبلغ إللى عايزاه فى شكل أسهم .
= = = محمدين : طيب فاكر لما قلنا إن السوق التانى إللى اسمه سوق التداول . إللى هو البورصة إللى بتطلع فى التلفزيون .إللى الشباب عايزين يشتروا فيها كل واحد بميت جنيه . دا معمول زى بوابه للى عايز يطلع من سوق الإصدار . وإن السوق دى مهما زادت قيمة تعاملاتها . عمرها ما بتزود ماكينه فى مصنع وفرصة عمل فى شركة .
* * حسنين : يعنى الإقتصاد المصرى إللى الشباب عايزين يساعدوه موش ها يستفيد من الفلوس اللى هايدفعوها ؟
= = = محمدين : بص حاليا الاقتصاد فيه مشاكل كتيره . لابد نحط أولويات وإحنا بنعالجه . ممكن تلاقى حالة البورصة نمره تسعه . حاليا مهم قوى ندور على حل لمشكلة سعر الصرف وانخفاض قيمة الجنيه قدام الدولار والعملات الأجنبيه لأن دا ها يزود تكلفة الواردات .
مشكلة الدين الداخلى إللى ها يزيد مع الإقتراض وزيادة الفايده على أذون الخزانه . مشكلة عجز الموازنه إللى ها يزيد ويخلى أى تصرف لتحسين مستوى المعيشه صعب . مشكلة البطاله إللى ها تزيد من بعض القطاعات زى السياحه . مشكلة الأجور . مشكلة ارتفاع الأسعار .
* * حسنين : يعنى البورصة موش مهمه يعنى ؟
= = = محمدين : فاكر لما قلت لك البورصة فكره عبقريه لتمويل المشروعات . لأن المشروع إللى بيمول نفسه عن طريق طرح الأسهم . موش مضطر يدفع فوائد وأقساط . إلا لما يربح . وحتى ممكن لو عمل ربح يقدر يأجل توزيع الربح ويكبر بيه المشروع . لكن فى سوق الإصدار . موش فى سوق التداول .
* * حسنين : يعنى الشباب المتحمسين دول يعملوا إيه ؟
= = = محمدين : لو مّصريين يدخلوا البورصة بلاش سوق التداول لأنهم ها يخسروا . وما تنساش إن الأجانب طلعوا والعرب طلعوا . ومصريين كتير طلعوا . وفيه ناس عايزه تبيع بقالها أسبوعيين . وبعيدين الأجانب موش ها يشتروا حاليا .
وإن كان على مساندة السوق إطمن . دى بتعملها البنوك الحكوميه من زمان . والمحافظ الاستثماريه بتاعت التأمينات الاجتماعيه .
وخلى بالك مفيش علاقة بين سعر السعر والشركة إللى طلعته . يطلع ينزل . أحوال الشركة بعيده عن أحوال السهم . فيه حاجات تانيه أهم بتأثر عليها .
* * حسنين : بس بيقلوا الأسهم بقت رخيصه ودى فرصه .
= = = محمدين : إللى يبص للسعر بس . يبقى موش فاهم بورصة . فيه حاجه إسمهما المخاطر السياسيه . يعنى مثلا سعر الفائده على الودائع فى مصر حاليا حوالى 6 % . لو حد قالك إن البنك الأهلى الصومالى بيدى 30 % على الودائع ها تحط فلوسك هناك . طبعا لأ . ليه لأنك موش ضامن حتى تاخد أصل فلوسك .
نفس الكلام إنت فى بلد أوضاعها موش مستقره . وما حدش عارف إيه إللى ها يحصل فى المستقبل . وإللى بيشترى سهم دا بيشترى مستقبل الشركة صاحبة السهم . يعنى ممكن الأسعار تنزل كمان وكمان .
* * حسنين : طب الناس المتحمسة دى تعمل إيه ..
= = = محمدين : ممكن حد يأسس شركة جديده بإسم شركة 25 يناير . منها ننتج سلع نكون عايزنها ومنها نشغل الناس . والشركة دى تطرح أسهمها علىا لشباب وهما يشتروها . . أو يعملوا صندوق استثمار مباشر يعنى بيستثمر فى المشروعات موش فى سوق التداول . والصندوق دا يطرح وثائق الاستثمار بتاعته فى السوق والشباب يشتريها ونعمل مشروعات تفيد البلد .
ممكن نعمل مشروعات بسيطة للناس الغلابة من خلال الجمعيات الأهليه . ممكن نسلف الناس من خلال الجمعيات الأهليه بتاعت التمويل متناهى الصغر . يعنى ست أرمله بستلف 300 جنيه 400 جنيه على أقساط تجيب حاجة تبيعها ولا تصنعها ولا حاجات تربيها . ممكن نعمل مساعدات لأسر الشهداء أو الجرجى بتوع المظاهرات .
* * حسنين : يعنى إنت مّصر إنهم يبعدوا عن البورصة أقصد سوق التداول ؟
= = = محمدين : يا سيدى إحنا قلنا فى المظاهرات الشعب يريد اسقاط النظام . عايزين نطبق دا فى الاقتصاد زى السياسه .
* * حسنين : يعنى إيه ؟
= = = محمدين : يعنى فيه مؤسسات دوليه ودول أجنبيه عايزانا نستثمر فى سوق التداول . إللى قلنا إنه مجرد فلوس بتدور بين إللى بيشتروا وإللى بيبيعوا الأسهم . والبلد لا تستفيد منها لا فرص عمل ولا إنتاج سلع . إحنا عايزين نتجه بفلوسنا للاستثمار فى الحاجات إللى توفر سلع وتشغل الناس .
فاكر لما قلنا إن غالبية المتعاملين فى سوق التداول يهمهم الربح السريع . والمضاربه . وإنهم لما البورصة بتنام . بتجهوا بفلوسهم لأسواق تانيه علشان يحققوا نفس الأرباح الكبيره بسرعه . وإنهم بينفخوا الأسعار فى سوق العملات الأجنبيه أو فى سوق العقارات أو الأراضى علشان يعملوا نفس الأرباح السريعه الكبيره .
* * حسنين : فاكر . حتى إنت قلت ساعتها إن الدوله بتساعدهم لما بتعفى أرباح الإستثمار فى سوق التداول من الضرائب . فى حين إنها بتفرض ضرائب على كل الأنشطة الصناعية والحرفيه . وإن ناس كتير سابو عياداتهم ومكاتبهم ومحلاتهم وراحوا البورصة .
بدل ما كل شويه بتوع الضرائب جايين ليهم وبتوع الصحة والتأمينات والمرافق والدفاع المدنى وغيرهم .
= = = محمدين : علشام كدا إحنا عايزين نخلى البورصة تكون فى خدمة الإقتصاد موش يكون الاقتصاد فى خدمة البورصة .
* * حسنين : يعنى إيه ؟
= = = محمدين : يعنى نستفيد من البورصة كوسيلة لتمويل المشروعات . تطلع أسهم أو سندات . نعمل بيها شركات جديده أو نوسع بيها شغل الشركات الموجوده .
* * حسنين : بس دا ادارة البورصة شركات السمسره رحبت بالفكره بتاع الشباب قوى .
= = = محمدين : كل واحد بيدور على مصلحته . رئيس البورصة عايز يفضل فى مكانه . وشركات السمسره عايز العموله . وفيه صحفيين متواطئين مع شركات السمسره .
* * حسنين : بس دى ميت جنيه بس .
= = = محمدين : والله قريت فى المصرى اليوم واحد مدرس بيعلق على الموضوع ده . قال إنه مدرس بالحصه فى فصول الخدمات الثانوية التجاريه فى بلبيس من سنة 2002 . وإن مرتبه غير المنتظم ميت جنيه شهرى وإنه ملوش مكافآت .
* * حسنين : بس الشباب دول عايزين يساعدوا بورصة بلدهم .
= = = محمدين : على فكره عدد إللى بتعاملوا فى البورصة قليل قوى . لكن شوف كام واحد متضرر فى السياحه ولا العمال باليوميه . دول بالملايين . خلونا نساعد بلدنا فى الحاجات إللى ليها أولويه . موش نخلى فلوس الشباب ياكلوها الحيتان فى البورصة .
mamdouhec@maktoob.com