حكمة معالى وزير الداخلية

مصر كلها طالبت بإقالة وزير الداخلية، وسيبقى وزير الداخلية.. ومصر كلها طالبت بإقالة حكومة الجنزورى، وسيبقى الجنزورى، وتبقى الحكومة.. ومصر طالبت باستدعاء المشير، ولن يذهب المشير.. ومجلس الشعب أمام هذه العاصفة اتهم وزير الداخلية بالتقصير.. وسينتقل إلى جدول الأعمال.. إليكم الحوار:
- تفتكر وزير الداخلية محمد إبراهيم، زملكاوى؟
- تقصد زى حبيب العادلى، والمشير ومبارك؟!
- مش جايز يكون.. لعبة كده ولا كده؟!
- لا يا شيخ؟.. طيب ودى تبقى أخلاق رياضية؟!
- لاحظت أن اللعب فيه تكسير عظام.. وقتل؟!
- عاوز تقول فيه مؤامرة محبوكة، على الأهلى؟!
- أمال يعنى تكسير الفريق، وقتل الألتراس صدفة؟.. دى مجزرة!
- ممكن تبقى حسبة سياسية، مش حسبة رياضية؟!
- وممكن تبقى سياسية ورياضية معاً.. فرصة نادرة!
- بس الوزير طلّع بيان، قال فيه إنه التزم بالحكمة، وضبط النفس؟!
- هنا بقى ما كانش تنفع لا حكمة، ولا ضبط نفس!
- آه.. عندك حق.. مفيش حكمة مع القتل.. مينفعش الحياد طبعاً؟!
- الشرطة مش ممكن تبقى حكم بين فريقين.. معاها صفارة!
- يعنى فى الميدان تنسحب.. وفى الملاعب برضه.. شرطة إيه؟!
- السؤال: متى تتدخل الشرطة؟.. الفوضى تضرب البلاد؟!
- فيه قاعدة شرطية بتقول: سيبهم وفى الآخر اللى مات ندفنه، واللى قتل نحبسه؟!
- فى العالم كله الشرطة تبادر لتمنع الجريمة.. تحبط الجريمة.. عندنا لأ؟!
- الشرطة عندنا إما فاعل.. أو متفرج.. حكم بصفارة!
- هيه دى بقى حكمة وزير الداخلية.. نلتزم الحكمة!
- لأ راجل حكيييييييم.. برغم التصعيد تعامل بحكمة بالغة.. ههههه!
- البيان كان خيالياً.. الحكمة لسلامة الجماهير.. فمات 80 فقط!
- مجلس الشعب وجه اللوم للوزير على التقصير.. بتلومونى ليه؟!
- معتقدش ممكن يعمل غير كده.. هيقيل الجنزورى؟ ولا هيقيل وزير الداخلية؟!
- مشكلة صحيح.. بس فيه نبرة عالية قوى.. استدعاااااء المشير؟!
- مفيش فى المجلس استدعاء للرئيس.. الفرعون؟!
- طيب وهوه المشير رئيس جمهورية؟.. ولا وزير دفاع؟!
- المشير الآن رئيس جمهورية.. بسلطات كاملة!
- الجنزورى أخد السلطات دى، وأعلن عنها؟
- ههههههههههههه.. أخد سلطات، بفتح الحروف كلها!
- الكتاتنى غرقان.. أول اختبار قاسى لمجلس الإخوان؟!
- لا المجلس اختلف عن مجلس عز، ولا الكتاتنى اختلف عن سرور؟!
- تقصد هينتقل لجدول الأعمال.. يعنى كالعادة؟!
- هتشوف.. وسينتهى صراخ النواب.. وتأمر النيابة بدفن الجثث!
- مشكلة لو طرح المجلس الثقة فى الحكومة؟!
- المجلس مش من حقه.. ثانياً هتجيب حكومة منين تانى؟!
- البرادعى جاهز.. من دلوقتى.. الآن وليس غداً!
- البرادعى مش هيشوفها.. وآدى دقنى لو حصل!
- ليه بقى يا كبير.. كنا خلصنا؟!
- اسأل المجلس العسكرى.. بالتأكيد عنده الإجابة!