محمد صلاح العزب مؤلف «سفاح الجيزة» يكشف الكواليس المرهقة والممتعة لكتابة المسلسل

كشف محمد صلاح العزب، مؤلف مسلسل سفاح الجيزة، عن كواليس كتابته للعمل، مشيرا إلى أن العمل حمل العديد من الكواليس المرهقة وأيضا الممتعه أثناء كتابته.
وكتب محمد صلاح العزب، عبر حسابه الرسمي بموقع التواصل الإجتماعى «فيس بوك»: «بعد عرض نص حلقات المسلسل، وبصفتي بحب الكواليس، فأنا حابب أتكلم شوية الكواليس المرهقة والممتعة لكتابة مسلسل سفاح الجيزة، وحابب طبعا أشكر عماد مطر وإنجي أبوالسعود شباب ورشة الكتابة الشطار اللي لولا دأبهم ومجهودهم المسلسل عمره ما كان هيطلع بالشكل ده».
أضاف: «علاقتي بالمسلسل بدأت من أحمد فهمي، اللي عرفني بالمنتج طارق نصر، واتفقنا على كتابة مسلسل سفاح الجيزة لمنصة شاهد، وأحمد قالي طارق نصر معاه اتنين شباب اقعد معاهم وشوف دماغهم، ولو تمام كمل بيهم، مش تمام نشوف الدنيا ممكن تمشي ازاي».
تابع: «مع القعدات الأولى حسيت إننا هنبدأ من يعني إيه سيناريو أصلا، وطارق قالي أنا عاوزك تقيم الشباب وتقرر، بس أنا كنت حبيتهم من القعدات السريعة وقررت إننا هنكمل سوا، بأي شكل».
واستكمل «محمد العزب» حديثه قائلا: «بدأنا الرحلة، اللي كانت أول شهر تقريبا عبارة عن كورس سيناريو مش ورشة كتابة، وقعدنا شغالين على المسلسل فترة طويلة جدا، وقعدنا شهور بنتقابل في مكتبي في الدقي بال10 وال12 ساعة، وفي مكتب فهمي في الشيخ زايد، وعند أحمد علاء في وسط الناموس اللي طوله 2 متر وفي الكافيهات وفي الحر والبرد والربيع والخريف، وفي المرات اللي عماد وإنجي كانوا بيشتغلوا لوحدهم فيها لازم يبعتوا لي صور إنهم شغالين».
أضاف: «حقكم عليا، هي كانت مرحلة صعبة، بس الحمد لله، أكيد انتو دلوقتي حابين إن ده حصل بالشكل ده، وشايفين النتيجة،والحمد لله.. الدنيا اتطورت بسرعة كبيرة، وعماد بالذات ركب الموضوع بسرعة ولما اتزنقت مرة في الوقت في مسلسل رمضان ضميته هو وكرم بكر عشان يكملوا معايا».
تابع: «وهكذا تمت كتابة سفاح الجيزة في أجواء مليئة بالجثث والدماء والرومانسية».
واختتم حديثه قائلا: «أنا مبسوط جدا بعماد وإنجي كمان عشان هم بني آدمين مميزين، عماد دءوب ومجتهد ومش بتاع مشاكل وبينقذ قطط وكلاب، يبقى أكيد شخص طيب، وإنجي مخلصة وبتعترف بالجميل لأي حد علمها حاجة، ومجتهدة وبتسعى عشان توصل لهدفها من غير ما تعتمد على وسايط ولا علاقات زى ما بنات كتير بتعمل علشان توصل لشهرة سواء في كتابة أو تمثيل، شكرا يا عمدة.. شكرا يا إنجي.. شرفتونا».
تفاصيل مسلسل «سفاح الجيزة»
انطلقت منذ أيام أولى حلقات مسلسل سفاح الجيزة، ل أحمد فهمي، والذي يجسد خلاله قصة قذافى فراج الشهير بسفاح الجيزة الحقيقي، الذي ارتكب 4 جرائم قتل بشعة بشكل درامي، خلال عامي 2015 و2017، وأيضا ارتكب العديد من الجرائم الأخرى، ومن بينها النصب، ثم تسببت مصادفة في فضح جرائمه لينتهي به الحال أمام حبل المشنقة مواجها حكما بالإعدام.
أبطال مسلسل «سفاح الجيزة»
يذكر أن «سفاح الجيزة» بطولة أحمد فهمي، باسم سمرة، ركين سعد، ميمي جمال، حنان يوسف، صلاح عبدالله، تأليف انجي أبوالسعود وعماد مطر، وإخراج هادي الباجوري.
أقرأ أيضا:
«سفاح الجيزة».. شخصيات متعددة يتقمّصها مجرم امتهنَ القتل بدمٍ بارد (تقرير)
«فين فراج وفتحي عبد الوهاب!»..كيف تفاعل الجمهور مع أحمد فهمي في «سفاح الجيزة»؟ (تقرير)