حلمي عبدالباقي يكشف تفاصيل خسارة ثروته في البورصة.. ونصيحة خلال الحج غيّرت مساره

كشف المطرب حلمي عبدالباقي تفاصيل خسارته أمواله وثروته في البورصة، واعتزاله العمل في الملاهي الليلية.
وقال «عبدالباقي»، خلال لقائه مع الإعلامية إيمان أبوطالب، في برنامجها «بالخط العريض» على شاشة تليفزيون الحياة، إنه كان يغني في الملاهي الليلة أو ما يسمى «كباريهات شارع الهرم» من أجل الصرف على نفسه وفنه، متابعًا: «كنت بشتغل عشان أعرف أنتج لنفسي، وأعمل أغاني متكلفة».
وأضاف: «في الفترة دي مكنش في منتج ممكن يتحملني، مكنش منتج يتحمل إن أعيد الشغل مرة واثنين، المنتج بيبص للموضوع من الناحية المادية فقط، أنا بالنسبة لي ممكن أصرف كل اللي في جيبي بس يطلع شكله كويس قدام الناس».
وأوضح أنه اتخذ قرارًا باعتزال العمل في الملاهي الليلية في العام 2007، مشيرًا إلى أن كثيرًا من الفنانين عملوا في الملاهي الليلية، قائلا «لما حسيت إن الشغلة مبقتش زي ما أنا عايز، أنا بحب أحافظ على كرامتي وشكلي، حسيت إن الموضوع مبقاش زي الأول، فقررت الاعتزال».
وأكمل: «بعدها روحت أحج، وخسرت فلوسي في البورصة، كنت في ظروف صعبة جدًا، واتعرض عليا الرجوع للغناء في الملاهي الليلية، لكن رفضت خلاص، كنت خدت عهدي على نفسي، لأني قابلت شيخ كبير في السعودية وأنا بحج، أنا كنت ناوي أعتزل ويمكن من قبل الحج، قلت للشيخ أنا بشتغل كذا وحاسس إن في شبهة في الفلوس، قالي مش هقولك ارمي فلوسك في البحر أو احرقها، اغسلها، بدل ما تطلع زكاة مال 5 قروش طلع 20، لغاية ما فلوسك تتغسل».
واستطرد «عبدالباقي»: «وفي سنة 2008 خسرت فلوسي في البورصة، ومراتي قالت لي مش فاكر لما كنا في السعودية والشيخ قالك كذا وكذا، أهي الفلوس اتغسلت لوحدها، قعدت فترة كبيرة في ظروف صعبة، ومراتي كانت واقفة جنبي، ودايما تقولي ولا يهمك».