كشفت ريم طارق زوجة مؤدي المهرجانات حسن شاكوش، تطورات جديدة في أزمتهما، مؤكدة أنها رفعت قضية طلاق. وقالت زوجة شاكوش، في بث مباشر عبر حسابها على إنستجرام: "مفيش حاجة اسمها صلح، في مشكلة كبيرة إن بنت تتحملها مع جوزها أو عيب مينفعش الواحدة تتحمله، وهي بتبقى عايزة تخرج بكل ود أو تشوف حل في المصيبة دي لأن هي مصيبة لأن هو ده اللي عايزة أقوله دلوقتي، اختيار غلط محدش يعتب عليا.. الحمد لله". وتابعت: "الفكرة كلها ان أنا خدت تمكين عشان حاجتي وهدومي وكل حاجة متعلقة بيا، خرجت وجيت تاني يوم أخد حاجتي، وكدة كدة رفعت قضية طلاق، اتمكنا عشان أخد هدومي وحاجتي ورحت امبارح مع بابا، ووقف بره بعد ما حسن شاكوش طرده، وأهله وصلوا بعد نص ساعة، كدة كدة مش هينفع أعيش مع واحد مهددني بالقتل، وحلقة (شيخ الحارة) كل اللي اتقال فيها صدق وأنا اللي اتضحك عليا". واستكملت: "أهله على راسي بس هم كانوا مهددني، وأنا أثبت ده في محضر في القسم، والتمكين أنا خدته، ومكنش ينفع أرجع لأن أهله كانوا في البيت، طلعت على القسم وعملت محضر، وروحت النهاردة الصبح البيت عشان معايا تمكين ومفتاح البيت، ولقيت الأمن بيقولي أستاذ حسن مش جوة ومنعرفش إنك اتمكنتي، والنجدة جاتلي وهو امتنع عن تنفيذ قرار النيابة وحكم المحكمة وكلم أمن الكامبوند وقال لهم تطلع على القسم وتروح تشوف لها حل مش هتخش، ولما جت النجدة قالوا له ان هو امبارح قالهم أنا طلقتها، وهي ملهاش تمكين، وحتى لو طلقني لي شهور عدة 3 شهور، والتمكين مش معناه اني أعيش معاه". وأوضحت: "هو ممتنع إنه يديني حاجتي حتى لبسي وورق القائمة والمؤخر، وهو اختلطت عليه الأمور أنه هيعرف يعمل كدة مع مين، أنا من بعد ما فتحت الأكاونت ده وصل لي من كذا بلد إن بنات متاخد منها حقوقها وفلوسها وهدايا ألماظ وسيارات وورق عرفي، عملت كل ده مع الناس دي عشان مكنش الكلام بينكم رسمي، من المغرب والجزائر ودبي والكويت والتجمع، الناس مستوية منك". وتابعت: "أنت جيت عندي واتجوزتني ليه عشان تداري إيه، انت اتعرضت لأيه قبل ما تخطبني عشان كدة قررت تروح تتجوز؟ ايه الحاجة اللي كنت بتداريها، الحاجة دي أنا عرفتها، مش عارفة أقول لك إيه بصراحة، لحد دلوقتي محدش سمع اني بقول عنه حاجة، هو طلعني مريضة ومزورة.. عمل كل حاجة تغطي على الحاجة اللي عنده اللي مش عايز حد يعرفها اللي أنا برضوا عرفتها". وأردفت: "اتقال لضابط النجدة ان أنا اتطلقت، فلو انت طلقت عشان قضية الطلاق اللي أنا رفعتها وعرفت سبب الطلاق اللي أنا رفعاه قبل ما تتعرض على القضية دي النهاردة، فانا خلاص مبقاش في سر، فلو انت طلقت عرفني عشان أقول للناس ايه السبب اللي خلاك تيجي تخبط على الناس وتقول أنا عايز دي من 3 سنين بنت الجيران اللي مابتسبش فرض اللي سجدت شكر لله وعملت كل الحاجات دي، أقول السبب بقى اللي انت جيت وقولت أنا عايز بنت ناس عشان انت اعترضت على واحدة وقولت انها مش بنت ناس من تفكيرك ووجهة نظرك". وبخصوص زواجها الأول، قالت: "أنا كنت متجوزة قبله سنة في نوفمبر 2020 وانفصلت في فبراير 2022، وهو سأل عليا قبل الجواز وغنى في فرحي القديم، لو سمحت البني آدم ده ليه جمهور وبيستخف بعقولهم وبيقول أنا بحافظ على ولاد الناس أنا هدومي الشخصية عندك بتحتفظ بيها ليه، بس البنات كتير وبتاخد هدومهم تعمل بيها إيه؟ أنت ليه عايش في جو المؤامرة ده أنت مش محتاج، أنا كنت مغفلة، أنا معرفش انك بتقبل ان شيخة تجيب لك سلسلة من ورا جوزها، الحاجات كتير أوي وأنا برا عني، متخصنيش اللي يخصني انك قولت امبارح قولت احنا بنحافظ على ولاد الناس وقولت حاجات وأنا سكت، أنت ليه معترض انك تديني حاجتي اللي عندك محتفظ بيها ليه". وتابعت: "سبب اني فتحت الأكاونت ده اني أعرف أرد عليه، وأول ما الموضوع يخلص هقفل الأكاونت، مش محتاجة شهرة ما أنا ممكن أتصور وأتشهر، لكن لقب مرات مش عارف إيه ده عبء عليا، الناس كانت بتقول لي انتي اتجوزتي الشيخ الشعراوي أتاري الناس عندها نظر أنا مكنتش عارفة، وتاني يوم جوازي قال لواحدة ان جوازي منها فيلم، وبعتت لي الرسايل بينهم، أنت ضحكت على البنت دي ليه، وانت قايل ان احنا مع بعض بقالك 3 سنين، ايه جو المؤامرة ده، أنت فيك إيه زيادة عن البني آدمين؟ مفيش حد يعرف بنات غيرك، لو سمحت أنا مش واحدة من الناس اللي انت ضحكت عليهم واستخفيت بعقولهم الناس دي ممكن يكون مكنش ليهم ضهر، أو بيخافوا منك، وانت كنت قايل لي ان اي واحدة بتعمل لك حاجة بتنزل لها الحكومة في المكان اللي بتشتغل فيه، وتروح انت كواسطة خير تخرج عشان تبين لها ان أنا الصدر الحنين، ركز في اللي أنت بتعمله عشان عيب انت المفروض جيت وقعدت معايا في بيتنا وقولت لي أن الاتنين اللي اتجوزتهم شرعي واحدة كانت بتشتمني والتانية كانت ما بتريحنيش، وأنا عملت لك كل حاجة، قلبت لي مجنون حاولت أعالجك، أنا مقصرتش معاك في حاجة وعمري ما كنت أستوعب الغدر". وأضافت: "أهلي اعترضوا على فكرة الأكاونت وانا اقنعت بابا انه في ناس بتخاف من الفانز أكتر، أنا عمري ما هسامحك على انك كنت سبب في ان أنا أتحرم من ثواب رمضان، وبرضو أنا اللي مشيت ورا جهل وتخلف عشان أرضي جوزي وأنا كنت فاكراك كويس، والبنت اللي بعتت لي يوم الخطوبة وحذرتني وأنا آسفة اني مسمعتش كلامك بس أنا كنت عمري ما أتخيل ان في شخص فيه كل العيوب دي". وتابعت: "أنا حابة أشكرك أنت والشخص التاني اللي كان في حياتي عشان انتم اتهمتوني كنت مريضة فدا يثبت ان أنا محدش يتكلم عني، أنت كان عقلك يجيبك تقول انك دخلت لقتها مع واحد، فأنا مبسوطة انك قولت ان عندي مرض أحسن ما تقول حاجة تانية، ووارد انك تقول أي حاجة عشان تداري الحاجة اللي احنا عارفينها". وأضافت: "يا ابن الحلال دخلنا بالمعروف وهنخرج بالمعروف واديني حاجتي اللي عندك، وعرفني احنا اتطلقنا ولا لأ عشان أعرف أكمل في قضية الطلاق للضرر ولا أقول للناس لأني معنديش أي استعداد ان واحدة تتظلم تاني، كل الناس اللي انت دوست عليهم كلموني وبعتولي رسايل وفيديوهات وبعتوا لي كل حاجة..أنا طلبت نتعرض على الطب الشرعي احنا الاتنين، أنا لا واحدة مزقوقة ولا عايزة منك فلوس ولا فيلا لو كنا عايزين منك حاجة كنا كاتبناك على ورق كتير.. كل اللي هقوله ان أي واحدة شايفة ان أنا غلطانة تروح تتجوزه وتعيش معاه وتقرر إيه اللي هيحصل وإيه اللي مش هيحصل وهترضى بإيه ومش هترضى بإيه". كانت محكمة الأسرة ب 6 أكتوبر قضت بإلزام حسن شاكوش بدفع مبلغ 20 ألف جنيه شهريًا نفقة إلى زوجته ريم طارق. وتضمنت أوراق دعوى النفقة أن ريم طارق مازالت على ذمة حسن شاكوش حتى الآن، إلا أن العشرة بينهما لم تستمر طويلًا بسبب كثرة تعديه عليها وسوء معاملته لها، وعدم الإنفاق عليها وإهانتها دائما أمام الجميع وطردها من مسكن الزوجية ثم امتنع عن الإنفاق عليها. وتضمنت أوراق الدعوى الأرباح التي يكسبها حسن شاكوش من حفلاته داخل وخارج مصر بخلاف أرباح اليوتيوب والتيك توك، التي تصل لملايين الجنيهات؛ حيث تبين أنه يتقاضى في الحفلة الواحدة خارج مصر حوالي 70 ألف دولار -أي ما يعادل 2 مليون و156 ألف جنيه- ويتقاضى 40 ألف جنيه مقابل الغناء نصف ساعة في الملاهي الليلية، ومبلغ 15 ألف جنيه في الحفلة الواحدة. وقال دفاع ريم طارق، إن المطرب حسن شاكوش يمتلك شركتين بينهما شركة إنتاج فني "شركة مساهمة ذات مسئولية محدودة تابعة لهيئة استثمار 6 أكتوبر، والأخرى شركة أفراد". وأضاف دفاع ريم، أن هذه السجلات التجارية تعد إثبات على دخل حسن شاكوش الضخم من إنتاج الأغاني والمهرجانات وسيقدمها أمام محكمة الأسرة في دعوى النفقة خاصة أن إحدى الشركتين تتعاقد مع شركات عديدة ما يحقق لها أرباح كبيرة. وتقدم دفاع ريم طارق إلى نيابة أكتوبر أول ب"فلاشة" تحتوي على مقطع فيديو يصور زوجة شاكوش أثناء حفل الزفاف وأمامها قسيمة زواج فارغة من البيانات تقوم بوضع بصمتها عليها قائلا: "بتبصم على بياض". View this post on Instagram A post shared by Reem tarek (@reemtarek84_)
