لأول مرة ابنتي أشرف زكي وروجينا في فيلم عن قصة حُب والديهما: «محظوظين»

احتفلت الفنانة روجينا، منذ ساعات، بعيد زواجها على الفنان ونقيب المهن التمثيلية، أشرف زكي، بصور من حفل زواجهما وقدّمت فيديو يعرض قصّة الحُب التي جمعتهما، وكيف طالبها «زكي» بالزواج منها، فيما ظهرت للمرة الأولى ابنتي الفنانان وتشاركهما بالأحاديث عن الوالدين ومدى تعاونهما ومساندتهما لهما على المستوى الأسري.
وبدأ الفنان «زكي» كلماته في الفيديو القصير، تحت عنوان «فيلم (سفير الفن) أستاذ دكتور أشرف زكي»، الذي نشرته زوجته عبر «انستجرام»، قائلًا: «وأنا معيد في المعهد قابلت روجينا شوفتها بنت مؤدبة وكده وبالفعل فاتحتها في الجواز، والحمدلله اتجوزنا واتبهدلنا وعيشنا في شقة مفروشة، هنا وراء المعهد، أنا وروجينا كنا رحلة صعبة جدًا رحلة الشقاء، اتحاربت بسببي كتير وانتصرنا».
في المقابل، قالت الفنانة عن رحلة زواجهما: «قالي عايزك في مسرحية وبعدها بدأ يفتح كلام، وكل يوم يقولي الورق هجيبه بكره، لأ أنا عايز نقعد نتكلم، فاتخانقت معاه وقلتله أنت كل شوية هتيجي تقولي عايزين نتكلم في المسرحية، حضرتك أديني ميعاد بروفة وأنا هاجي فاتخانقنا واتعصب وقالي: ماحبش حد يكلمني بالطريقة دي اقفلي الحوار.. لغاية لما صالحني في المكتبة وجابلي (قلب) وفاتحني في قصة الحب، وقالي: هروح أعمل عُمرة ونتخطب ونتجوز»، تابعت: «هو سندني وكبير العيلة وأبوبناتي، دايمًا بقول أشرف عمري كله إلا 18 سنة».
وشاركت ابنة الفنانان، وأولهما المُخرجة مايا، وتستكمل كلمات والديها: «بحكم أني كنت في المعهد وكان بابا في المعهد برضو، كنا بنروح ونيجي مع بعض، برغم كل دا (الانشغالات) إلا أنه بيعرف يلاقيلنا وقت مناسب ودايمًا موجود في الأوقات المهمة، ودايمًا فخورة به حتى لو مش بقولها، ونفسي أكون زيه في حاجات كتيرة، محظوظة لأنه أبويا وبقدر أكلمه في الوقت اللي عايزاه، في حين أن ناس كثيرة بتكلمني عشان عايزين يستشيروه ويأخدوا رأيه في الحياة، ربنا يخليه لينا».
وعلّق «زكي» على كلمات ابنته: «فخور بيها لأنها عمرها ما استخدمت اسم أبوها ودايمًا، كانت رافضه يتقدملها أي مساعده عشان أبوها، وبنتي الثانية مريم في ثانية ثانوي ودايمًا مابجربهمش على اختيارات معينة ومريم مجتهده وتدخل الكلية اللي هي عايزاها أنا مش هتدخل»، وحلّت مريم في الفيديو وتتحدث عن علاقتها بوالدها: «أنا وبابي قريبين أوي لبعض أي حاجه بتحصل أو مصيبة بابا بيكون أهدى شوية بصراحة مافيش زيه ودايمًا بيفضي نفسه عشانّا».
الفيلم فكرة وإخراج، مي سكرية، وصياغة دكتور مصطفى سليم، والموسيقى التصويرية للمايسترو جورج قلته.. وكان فرق السن بين روجينا وأشرف زكى يمتد سنوات طويلة، فهى تصغره ب13 سنة، وتبلغ من العمر 47 عامًا، أما أشرف زكى من مواليد 1960 ويبلغ من العمر 60 عامًا.
View this post on Instagram
A post shared by Rogena (@rogenaofficial)