قالوا مدنيه - لأ للعسكر والإخوان .

قبل ما أتكلم عالعسكر والإخوان , لازم تعرفوا قبل كلامى مين العسكر؟ مين الإخوان ؟ أما العسكر هما الجيش , وإيه الجيش ؟ فيه له خطه ليه أهداف , لازم برنامج يتحدد ومعاه نظام , لازم توزيع للأدوار , الكل له دور , العسكرى واقف فى الخدمه مش نعسان , ودى دبابه ودى طياره ودا واحد عينه على رادار , كله له دور , وإللى يقصر فيه له عقاب دا مينفعش ( الغلطه بفوره ) دى بلدنا ومنهم مسئوله , خطه ويقظه وحزم وقوه شعار العسكر , و قالوا إخوان , طب مين هما الإخوان , قالوا دا شعارهم إن الإسلام هوا الحل , قالوا إيه تانى ؟ قالوا يا إخوانا دا خلاص هيسيطروا عالكل , قالوا بيتكلموا بالدين وكمان قالوا كلامهم حلو , دا إللى قالوه , لكن إيه هوا الإسلام ؟ لما الجامع وقت الصلا بيكون مليان دا الإسلام , لما الشبعان يدى لأخوه إللى جعان دا الإسلام , لما هتتوحد كلمتنا نقول إسلام , ولما بلادنا تكون دى غايتنا دا إسلام , لما يعيش جرجس متطمن ويا محمد نقول إسلام , لما الرحمه تسود كده بينا دا الإسلام , لما صغيرنا يقوم لكبيرنا نقول إسلام , لما مراتى وبنتى هيبقوا فى يوم إخواتك يكون إسلام , ولما هيتنضف إعلامنا نقول إسلام , لما الشغل يكون بضمير ولما الغل يرووح من بينا دا الإسلام , قالوا خلاص سيطروا عالكل وبالإسلام , لكن فين هوا الإسلام ؟ كله كلام , وقالوا مدنيه , طب مع مين ؟ المدنيه دى بيلزمها ناس فاهمين , للحريه فاهمين صح , وإحنا إخوانا لازم نتساق ولو إتسابنا كده على كيفنا هتبقى خراب , هوا دا حالنا وديا طباعنا , وألا هنكدب بقى على بعض , لازم تربيه تكون بالدين , نعرف ربنا و نكون صالحين , وعشان يحصل لازم خطه ومعاها يقظه وقوه وحزم , طب ليه لأ , عايزين عسكر عايزين دين , عايزين الإتنين مع بعض , ياخدوا إيدينا نأسس صح , غير كده إنسوا تقولوا مدنيه , لازم ليها تكونوا فاهمين , عايزين عسكر عايزين دين .