يحدث في مصر

رشا مجدى: مساء الخيرأعزائنا المشاهدين أهلا بكم وحلقة جديدة فى يحدث فى مصر النهاردة هنتكلم عن قطاع مهم فى وزارة الصحة القطاع ده له دور حيوى فى إنقاذ المريض أنا بتكلم عن الأسعاف أللى سعت الوزارة لتطويره وتحديثه بأحدث الأجهزة الطبيه علشان المريض يقدر يحصل على العلاج حتى يصل إلى المستشفى
محمد موافى:الليله برضه هنتكلم عن بنوك الدم وأهمية وجودها وتفاصيل خاصة جدا ببنوك الدم بعض الملاحظات عليها هنتكلم عليها فى ملاحظات لكن خلونا الأول نرحب بوزير الصحة الدكتور حاتم الجبلى مساء الخير يا
د/حاتم الجبلى :مساء الخير
رشا مجدى:معالى أسمحلنا قبل ما نبدأ نشوف التقرير وبعدين نكلم
تقرير
مليار جنيه هى تكلفة التطوير التى شهدها مرفق الإسعاف بكافة أنواعه البرى والنهرى والطائر وذلك خلال الأونه الأخيرة وألتى شملت إنشاء 44 نقطة جديدة للإسعاف على الطرق الصحراويه والسريعة حتى لا تتجاوز المساحة بين نقطة وأخرى 20 كيلو متر
مواطن:الخدمة بتاعة الإسعاف كويسه ممتازة ممتازة ومنتشرة فى كل مكان
مواطن:فى رعاية طبيه وفى إسعافات فورية دلوقتى فى كل مكان لو أنت فى البيت حد أتصل بالإسعاف بتيجى تاخده وتوديه لأقرب مستشفى وبتتعمله الرعاية الصحيه المتكاملة
التطوير سيشهد أيضا إنشاء مراكزللتحكم لتتبع سيارات الإسعاف ورصد تحركاتها وأماكن تواجدها وأن تصل لأى مريض فى دقائق معدوده ناصر رسمى( رئيس هيئة إسعاف مصر): عندنا أكتر من 1200 سيارة هى موجوده بالفعل على الطرق السريعه أحنا فى صدد تغطية كل الطرق السريعه فى مصر بسيارات إسعاف موضوعة بنظام دقيق إن هو يسمح بالوصول إلى الفكر الأساسى أللى هو الوصول 75% من المكالمات فى أقل من 8 دقائق ,تطوير مركز الإسعاف إن يكون ل25 ألف مواطن سيارة إسعاف وفقا للمعايير الدوليه والوصول بخدمة الإسعاف والطوارىء إلى طموحات المواطن المصرى
محمد موافى:نرجع تانى لوزير الصحة دكتور /حاتم الجبلى هنتكلم عن قطاع الإسعاف وبرضه هنتكلم عن بنوك الدم ومشاكل بنوك الدم لكن خلينا نبدأ كام عربية إسعاف دلوقتى ماشيه فى مصر
د/حاتم الجبلى :خلينى بس أبتدى القصه من الأول لأنها قصة تستحق أنها تسجل
محمد موافى:عندنا كام عربيه ؟
د/حاتم الجبلى :أحنا الأول كان عندنا حوالى 1700 عربيه منهم 1000 عربيه خرده عربيه نمطيه العربية النمطيه دى لما تيجى تفتحها تلاقى فيها نقاله وأسطوانتين أوكسجين فى معظم الوقت بيبقوا فاضيين قلت لا يمكن دولة زى مصر كبيرة وكان فيه مرفق إسعاف من سنة 1908 النهاردة يبقى دا الإسعاف بتاعها الحقيقة رحت للسيد رئيس الوزرا وكان وقتها بايعين الأراضى بتاعة الساحل الشمالى فكان فيه فلوس جايه من وزارة الإسكان فقلتلهم أنا عايز فلوس علشان أطور مرفق الإسعاف قعد مع رئيس الوزراء الكلام ده كان فى أول يوليو 2006 بعد 3 ساعات بدون مبالغة 3 ساعات دورى فيه إن أنا أقنعه ليه بطور مرفق الإسعاف ؟ فالمهم أقتنع وخصصولنا مليار جنيه قالى قبل ما تبتدوا أعرضوا عليا مرة تانية فأشتغلنا جامد جدا يوليو وأغسطس وسبتمبر ورحناله عرضنا عليه قال ده مينفعش دى قايمة مشتريات دا مش نظام تشغيل فطبعا كلنا جالنا أحباط من القصة دى رحناله تانى وشوفنا عيوبنا فين المهم رحناله فى يناير وافق بقى على الموضوع حطينا فى الأول شراء 1213 عربيه وقلنا مع التطوير ده مع ال700 عربيه أللى عندنا يبقى عندنا 1900 عربيه أحنا كان موجود عندنا كان عندنا عربية تقريبا لكا 100 ألف مواطن على المستوى العالمى يبقى عند عربيه لكل 25 ألف مواطن أحنا حاليا النهاردة عندنا عربيه لكل 37 ألف مواطن إشترينا 1813 عربيه وطبعا أحنا كان عندنا عربيات مرسيدس فقلنا نجيب زيها وبعدين قالو لأ لازم يبقى عندنا تنويع فأتفقنا مع جهاز مجلس الدفاع الوطنى إشترينا العربيات أللى أنت شايفاها دى والتجهيز بقى
محمد موافى:قبل ما نتكلم عن تجهيز العربيات نتكلم عن تجهيز الناس أللى شغاله فى العربيات
د/حاتم الجبلى :أول نقطة كان لازم إن أحنا ننوحد لما تطلب يرد عليك واحد بس مش مهم أنت بتطلب منين أللى هو الكول سنتر الكول سنتر ده عملناه مع الدكتور صادق كامل فى القرية الذكيه كويس بدأنا بالقاهرة الكبرى وبعدين أسكندريه ودلوقتى خدنا يجى 6 ، 7 محافظات لغاية ما ينتشر فى مصر كلها
محمد موافى:دى لوحدها شغلت قبل ما نتكلم عن المسعفين
د/حاتم الجبلى :شغلت شوف عدد قد أيه من الناس ؟ المسعفين بقى قلنا نشوف الناس القديمة فرزناهم بالتقيم إلى أ و ب و ج خدنا أ ومرنا ب وج أيه ودناهم يشتغلوا وبعدين بقى أبتدينا نعين خريجى بكالوريوس زراعة وعلوم وتربية رياضيه وكده وعملنلهم برنامج تدريب الجماعة الأنجليز جيبنا جامعة من الجامعات البريطانيه وأبتدوا يرنوهم وأبتدوا ياخدوا مرتبات تبدأ من 1200 جنيه بعد ما كان بياخد حوالى مثلا 150 جنيه ويلم بقشيش 1000 جنيه فقلنا أحسن حاجة نديله مرتب 1200جنيه
رشا مجدى:بمناسبة الموافقة أللى أديهالنا الدكتور نظيف على مرفق الإسعاف برضه مجلس الوزرا وافق على مشروع إنشاء هيئة مستقله للإسعاف ليه ؟
د/حاتم الجبلى :هقولك ليه ؟ كان الأول 29 مرفق مفيش حد ليه علاقة بالتانى يعنى لو حصلت حادثه على الطريق الزراعى تتطلبى المرفق يقولك لأ روح للمحافظة أللى جنبنا أنت مش تبعنا والراجل يموت عالبال ما الناس يتفقوا أنهى عربيه تطلع تجيبوا ماكنش ينفع فكان لازم نوحد تشغيل على مستوى مصر كلها بحيث أنوا يبقى عندنا إدارة مركزيه فى القاهرة و7 أقاليم أللى هما الأقاليم أللى أحنا مقسمين مصر على أساسها غرب الدلتا وشرق الدلتا والقاهرة وشمال وجنوب الصعيد والمحافظات الحدوديه هو دا الوضع النهاردة النهاردة حضرتك مش مهم تكونى فى أنهى محافظة خلاص هو بيوجهلك العربيه الأقرب لأنى خلاص بقى فيه سيطرة مركزيه على العمليه فى نفس الوقت بقى لسه طبعا فيه حاجات هتدخل فى النظام ده نتيجة السيطرة المركزيه دى أنوا فيه حاجة أسمها التتبع أللى حضرتك بتطلبىيه ده أللى بيرد على مكالمتك بيشوف الموبيل بتاعك أنتى فين ؟ ويشوف أقرب عربية تبقى قدامه على الشاشة وهى بتتحرك
رشا مجدى: دول مظلومين على فكرة يافندم يعنى عارفة أللى بيحصلهم ودا للأسف المواطن إن هو بيجرب الخط بتاعه شغال ولا لأ د/حاتم الجبلى :بصى دلوقتى الموضوع ده أحنا بيجلينا المكالمات الجاده فى اليوم من 700 لى 2000 المكالمات أللى كانت ملهاش قيمة بيجرب الشريحة 120 ألف فى اليوم دلوقتى نزلوا لحوالى 74 ألف لأنوا خلاص طلع قرار وزارة الإتصالات أنتى عارفة لما بتطلبى رقم بيطلعلنا فى القريه الذكيه يقوم على طول مبلغ الوزارة تقوم حرقه الكروت يعنى مركزيا دلوقتى وزارة الإتصالات بتحرق الكارت
محمد موافى:دا عقاب رادع
د/حاتم الجبلى :رادع يعنى هو لسه شارى كارت ب100 جنيه بيجرب وبيقول أى كلام يقوم على طول الكارت محروق فأحنا حرقنا تقريبا فوق 1000 كارت الجزء التانى أللى بيشتم كل المكالمات مسجله فالنائب العام هيحاكم 50 واحد
محمد موافى:من أللى بيسجل
د/حاتم الجبلى :أصل أنت فى السيستم نفسه النظام نفسه الكمبيوترات بتسجل كل المكالمات وبتسجل الرقم عليها فأنت بتعرف صاحب الرقم وبتسجل المكالمة وبتجيب خبير صوت وخبير الصوت بيتأكد إن دا صوته وبعد كده فى 50 واحد رايحين للنائب العام
محمد موافى: العربيات على الطرق
د/حاتم الجبلى :دا سؤال مهم جدا أحنا علشان نوزع العربيات فيه فى المدن والقرى الرئيسيه القرى الرئيسيه أحنا حاطين على الطرق بالأتفاق مع وزارة النقل كان الحقيقه محمد منصور عملنا دراسات على الكثافة على الطرق فالطرق الكثيفة جدا زى القاهرة وأسكندريه الصحراوى والزراعى وغيرها من الطرق المعروفة يعنى دى بنحط نقطة إسعاف دلوقتى كل 20 كيلو الطرق أللى هى أقل كثافة زى الطريق أللى أحنا فتحناه دلوقتى سوهاج البحر الأحمر دا هننشأ كل 40 كيلو لأن دا الكثافه عليه مش عاليه ودا طريق التوزيع لخط الإسعاف جوا المدن بقى قصة تانيه خالص أكبر مشكلة بقى كانت العربيات أللى بتروح إلى صاحب الشقه كان أحنا عندنا معدل عالمى لازم تستجيب له أيه المعدل العالمى ؟ إن أنت 75% من المكالمات بتجيلك لازم تستجيبلها فى فترة لا تزيد ع 8 دقايق طب نعمل دى أزاى جوا القاهرة يعنى صعبة جدا فبرضه أياميها محمد منصور عملنا دراسه على مدى فترة زمنيه أعتقد 8 شهور أو سنه فيها عرفنا أوقات الذروة الطرق فى القاهرة فى اليوم الواحد صبح وضهر وباليل فى المواسم معانا فى رمضان أو غير رمضان فى الصيف أو الشتا وبالتالى أبتدينا نوزع العربيات طبقا لمعدلات إستخدام الطرق فى الأروقات المختلقة وبالتالى الناس دلوقتى ما بتصدقش يقولك العربيه دلوقتى بتيجى بعد 10 دقايق دا العربية جت بعد 8 دقايق دا العربيه جت بعد 6 دقايق ليه ؟ لأن التوزيع أتربط بى عمليه الكثافة وإستخدامات الطرق المختلفه
رشا مجدى: طب معالى قبل ما نطلع للفاصل ونشوف مرفق الإسعاف أحنا شوفنا على الشاسه طيارة الإسعاف الطائر دا بقى عندنا ؟
د/حاتم الجبلى :دا حقيقى أحنا السنة أللى فاتت عن طريق القوات الجويه أشترينا طايرتين هليكوبترا الطايرتين هليكوبتر دول هيبتدوا يشتغلوا
رشا مجدى:دى هليكوبتر يا فندم ؟
د/حاتم الجبلى :لأ دى طيارة القوات المسلحة دى كانت أحدى الحوادث أللى حصلت فى أسوان تاطيارات الهليكوبتر أحنا جيبنا 2 ال2 دول هيبتدوا يشتغلوا فى سبتمبر أللى جاى وعندنا بقى بالمشاركة مع خط الطيران أشترينا طايرتين أللى هما النفاستين يقدروا ينقلوا المرضى لمسافات طويله 5 ساعات يعنى 5 ساعات طيران بأقصى وزن ممكن فتقدر تاخد المريض من القاهرة توديه لندن دون أى توقف يعنى فعلا عندنا واحدة والتانيه كمان شهرين
محمد موافى:ونقلت حالات ؟
د/حاتم الجبلى :نقلت حالات كتيرة
محمد موافى:دكتور أسمحلنا نكمل بعد الفاصل مشاهدينا فاصل قصير ونرجع نتكلم عن ما تبقى لو كان لسه فيه حاجة باقيه من تطوير الإسعاف وبنوك الدم
فاصل
محمد موافى:مشهدينا أهلا بحضراتكم مرة تانيه فى يحدث فى مصر وبنتكلم مع وزير الصحة الدكتور /حاتم الجبلى الجزء الأولانى كنا بنتكلم عن تطوير مرفق الإسعاف المرفق أللى تايخه فى مصر من سنة 1908 بعد كده وصلنا فين ؟ ولحد دلوقتى بقينا فين ؟ خلونا نتكلم على مرفق الإسعاف برضه مازال فيه كلام عن مناقصات التوريد
رشا مجدى:لأ أنا يعنى أحنا قلنا عن التطوير أللى حصل فى توزيع السيارات فى تقرير صادر من محافظة البحر الأحمر بيقول التقرير ده إن 60 % من سيارات الإسعاف أللى موجوده معطلة صح ؟
د/حاتم الجبلى :صح ما هو دا التطوير طبعا إن أنتى بتجيبى أنا معرفش إذا كان 50 ولا 60 إنما أنتى دلوقتى بتحل محل السيارات القديمة أحنا أستوردنا لحد لقتى 1200 أو 1300 عربيه وفضلنا 500 ولسه يمكن نجيب 400 كمان هما دول أللى هيرحوا يغطوا أوجه النقض أللى حضرتك بتتكلمى عليها
محمد موافى:مناقصات التوريد ؟ أى حاجة أحنا بنشترى 1813 عربيه تقريبا العربية بتجهيزاتها 400 ألف جنيه بنتكلم فى أرقام ضخمة كيف تمت عملية التوريد ؟
د/حاتم الجبلى :أحنا طبعا بنكلف مجلس الفاع بالحاجات دى علشان ما خشش فى متاهات أحنا بندى أمر إسناد لمجلس الدفاع ومجلس الدفاع عنه شركات بتتولى هذه العمليه وبالتالى بنتفادى الإتهامات والصراعات أللى بين الشركات والوكلاء والكلام أللى حضرتك عارفاها
محمد موافى: طب يا دكتور أحنا ده عدنا المليار أللى الدكتور أحمد نظيف خصصه للإسعاف أحنا بنتكلم عن 1700 ، 1800 وبنتكلم عن طايرتين
د/حاتم الجبلى :الطايرتين يتكلفوا حوالى تقريبا أحنا أشترناهم من وزارة الطيران المدنى يعنى أعتقد إن الطيارة بتتكلف 9 مليون دولار
محمد موافى: طب إنشاء الهيئة محتاجة قد أيه تانى
د/حاتم الجبلى : لأ ما هو كله كله ما الهيئة أصلها بتخش فى الموازنه بتاعة الوزارة يعنى بالعكس دا الدكتور يوسف كان موازنة الإسعاف موازنة الإسعاف سنة 2006 كانت 35 مليون جنيه يعنى كل واحد منا له 50 قرش إسعاف خات بالك السنادى هو وصلهالنا إلى حوالى 400 مليون أحنا بنعمل صيانه لكل العربيات أللى أحنا جايبنها دى ماضيين عقود صيانه ماضيين عقود تأمين 2 علشان ما تجيش تقول العبيه عطلت ولا العربية باظت بنتابع بملفات إستهلاك السيارة من السواقين عملت كام كيلو دخلت الجراج كام مرة مين السواق أللى كان موجودة عليها وهكذا فطبعا كده دلوقتى أنت حاكم العمليه ألحمد ألله بطريقة كويسه جدا
رشا مجدى: خلينى أنتقل إلى بنوك الدم بنوك الدم بيقولوا إن بعض المواطنين إن بنوك الدم بأت ترسخ أكياس الدم خصوصا بعد قضية أكياس الدم
د/حاتم الجبلى : لأ ما هو شوف حضرتك هو النظام أتغير تغيير جذرى أنتقل من عملية البيع إلى عملية التطوع يعنى زمان لما حضرتك كنت بتروحى البنوك زى مثلا بنوك بتاعة دكتورة زينب السبكى وغيرها من الناس كان بيجى متطوعين محترفين يروجوا ياخدوا مبلغ معين ويتبرعوا بدمهم طبعا ما كنش فيه طبعا تتأكدى إذا كان فيه فيرس سى ولا أيه ولا الزهرى ولا غيرها من الأمراض أللى بتنتقل عن طريق الدم دكتور إسماعيل سلام سنة 97 قال هيغير النظام وعمل أتفاقيه مع الصليب الأحمر المصرى لتقديم المعونة الفنيه لتغيير النظام بتاع تداول الدم فى مصر بأنه منعوا عن القاع الخاص تماما وقال إن الحكومة هى أللى تتولاها وتتولاها بقواعد معينة مبنيه على سياسة التطوع وليس التجارة طبعا دى نقلة فكريه وتمويليه وتنفيذيه فى منتهى التعقيد ألحمد ألله المشروع أتقسم لمرحلتين مرحة خلصت سنة 2003 أللى هى مرحله من 2003 لى 2006 دلوقتى أحنا فى المرحلة الأخيره فيه دلوقتى حاجة أسمها البنك الأقليمى وأماكن التجمع يعنى أيه بقى ؟ يعنى حضرتك النهاردة بتتبرعى بالدم أو بتروحى لعربية نقل دم أللى فى الشوارع الحقيقة السنادى جايبين 25 عربية جديدة خلال الأيام أللى جاية برضه على أعلى مستوى
رشا مجدى:تابعة لوزارة الصحة ؟
د/حاتم الجبلى :أه تابعة لوزارة الصحة وعن طريق مجلس الدفاع برضه
رشا مجدى: :يعنى لوما لقتش عليه علامة وزارة الصحة
د/حاتم الجبلى :هتلاقى نقطة دم كبيرة حمرا كده ومكتوب عليها وزارة الصحة المجلس القومى لنقل الدم وو إلى ذلك
محمد موافى: يعنى مفيش مرة رصدته حتجات سرقة أو غش ؟
د/حاتم الجبلى :لأ بص هو أحنا فوجئنا فى أحد الأيام إن فيه إعلان فى الصحف إن أحدى الجمعيات الخيريه الكويسه بتقول يا جماعة تعالوا أتبرعوا بالدم أحنا هنجمع الدم لصالح وزارة الصحة أنا خد إجراء بمنتهى الحده والوضوح بمنع أى حد أنوا يجمع دم إلا عن طريق وزارة الصحة فدلوقتى عندك البنك الإقليمى أحنا هنفتتح قريبا بنكين إقليميين واحد فى طريق الكورنيش مصر القديمة وواحد تانى فى العباسيه دا الدم أللى بيجمع فى القاهرة دا بيرحلو بيتحلل دى تيجى حضرتك بقى مديرة مستشفى معينة عندك حوادث كتير لازم تتطلبى منه الخزين بتاعك مسبقا بحيث لو حصل عندك طوارىء أو أو أو مدير المستشفيات مش فاهمين الحته دى فيرحوا يقولوا للعيانين أيه ؟ أتبرعوا أنتم بالدم وأحنا هنجبلكم أكياس بديله لأ دا مش مطلوب أحنا المفروض نجمع فى السنة حوالى فى التطوع مليون و250 ألف كيس أحنا جمعنا السنة أللى فاتت 900 ألف لأن النظام مش مطبق فى كل مصر
رشا مجدى:علشان كده أكياس الدم غاليه ؟
د/حاتم الجبلى :لأ بصى بقى كيس الدم أللى أحنا بنطلعه بيكلفنا 630 جنيه خلاص أحنا بنبيعه للمواطن بحوالى 200 جنيه حاجة زى كده حاجة فى الرقم ده إنما كل مرضى العمليات أللى هما فى الطوارىء والحوادث محدش بيدفع حاجة
محمد موافى: طب دكتور فيه همزة وصل ناقصة فى المسأله إن مديرين المستشفيات مش عارفين إن فيه دم موجود
د/حاتم الجبلى :فيه خطأ عندنا والخطأ دا أحنا بنتفاداها دلوقتى وبنوعيهم يعنى أنا مثلا كنت فى مستشفى أعتقد مستشفى طوخ والراجل هناك المدير راجل يعنى محترم قوى قاللى أنا كنت بعمل فى الشهر 600 عملية قيصريه بتاعة السيدات ولادات دلوقتى بعمل 60 قلتله ليه ؟ قاللى علشان معنديش دم قلتله لأ نظام الدم هو كذا قاللى ما كنتش أعرف كده وبدأ دلوقتى يتصل بالبنك وأبتدى العدد عنده يزيد تانى
رشا مجدى: معالى خلينا نتكلم على المعامل بقى أللى بتسحب عينات الدم أو الدم أللى بيتم التبرع بيه هل المعامل أتطورت عن كده ؟
د/حاتم الجبلى :أه طبعا أنا نفسى قوى تروح مركز نقل الدم أللى فى العجوزة وأنتى نازله من كوبرى 6 أكتوبر على يمينك تلاقى شركة بتاعة الأمصال واللقاحات من ناحية ومركز نقل الدم من ناحيه يعنى شوفى الدنيا ماشية أزاى ؟ ودا الرئيسى بتاع مصر كلها وكل أللى تبعه بقى البنوك الإقليمية
رشا مجدى: بس كل الدم بيتحلل هناك ؟
د/حاتم الجبلى :لأ بيتحلل فى البنوك الإقليميه وبالنسبة للقاهرة الكبرى بيتحلل هناك وبيتحلل فى مصر القديمة وبيتحلل فى العباسيه
محمد موافى: أمتى يا دكتور مصر القديمة والعباسيه هيشتغلوا؟
د/حاتم الجبلى :خلال 10 ، 15 يوم هيبقى فيه
محمد موافى :هيبقى فيه معامل تانيه ؟
د/حاتم الجبلى : لأ أحنا يكفى جدا
محمد موافى:بره القاهرة
د/حاتم الجبلى :أه أحنا عندنا ما هو البنك الإقليمى ده زى أللى فى طنطا ده بيغطى الغربيه كلها يعنى مثلا حضرتك رحت مستشفى وتبرعت فيها كيس الدم المستشفى ممنوع أنها تستخدمه علشان كده كتير قوى من الناس أللى بيشتغلوا فى بنوك الدم فى المستشفيا غضبانين لازم يبقى عنده البنك الإقليمى فى طنطا يتحلل ويقول إن دا سليم ويطلب كمية بديله مش لازم الكميه أللى هو وداه هى أللى ترجعله
محمد موافى:طب يا دكتور أحنا أتكلمنا عن الإسعاف وأتكلمنا عن بنوك الدم أنا عايز بس أقف وقفه إن كل ده وأحنا كل شوية بنواجه طوارىء بنواجه وباء
د/حاتم الجبلى : أحنا الحمد ألله يعنى أنفلونزا أتش وان إن وان ما خدتش منا جهد كبير ليه بقى ؟ يعنى أحنا بنحتلف عن دول كتيير جدا كنا مستعدين بسبب أنفلونزا الطيور يعنى على قد ما أنفلونزا الطيور كانت سيئة فى 2006 و2007 زى ما خلتنا نعمل خطة قوميه وخلت الناس أللى عندنا فى الوزارة أن تستعد يعنى فاهمين السيستم فمتعبوش فأحنا فلم أبلغنا بهذا المرض فى أبريل زى ما حضرتك لاحظت أو عايز أقيم أدائنا أنا ممكن أقيم أدائنا بنتيجة واحده فقط معدل الوزفيات عندنا فى مصر 3,3 مواطن لكل مليون الولايات المتحده الأمريكية تمتلك أعظم نظام صحى فى العالم 7,5 حالة وفاه لكل مليون مواطن بالرغم بقى إن مصر عايشه على 7% من الأرض فيها 80 مليون مواطن وعندها 15 مليون مواطن عاشين فى مناطق عشوائية النظافة العامة مش فى أحسن أحوالها المدارس مكدسة زى ما حضرتك شفتى إنما إن أحنا نطلع بهذه النتيجة فى نهاية هذا الموضوع خلى الناس تقولك دى كانت أوكذوبة
محمد موافى:أو كان فيه تهويل يا دكتور ؟
د/حاتم الجبلى : لأ خلى بالك يعنى أنا النهاردجة جبت طعوم وجبت تيمفلو يكفى 5% من السكان أنجلتر جابت أللى يكفى ال54 مليون مواطن عندها أمريكا جابت 3 مليار جنيه أحنا جبنا ب10 مليون دولار إذنا أحنا واجهنا المسأله بجدية
محمد موافى:طب يا دكتور أحنا واجهنا المسأله بجدية جدا طب أسمحلى هل كان هناك لعب من شركات عالميه لبيع الطعم ؟
د/حاتم الجبلى : عارف دى بتقلل القيمة العلمية فى مواجهة أى حاجة أنت عندك 262 واحد ماتوا فعلى الأقل نحترم مشاعر الأسر أللى هى ليها أفراد ماتو أللى أنا عايزه أقوله فى إعتقادى الشخصى وأنا مغيرتش رأيى من أول يوم الغلطة عند التقييم بتاعة الإستعداد لدرجة الوباء فى منظمة الصحة العالميه ليه بقى التقسيم بتاعهم تقييم المرحلة الأولى والتانية والتالته أو الرابعه والخامسه والسادسه دا تقسيم جغرافى لأنتشار المرض لا يعبر بأى حال من الأحوال عن ضراوة المرض والكلام ده أحنا قلناه لما أنا رحت مؤتمر أتش وا إن وان فى المكسيك وبعدين رحت قلته تانى فى القاهرة هنا فى 22 يوليو وبعدين قلت بعدكده لما رحت المغرب منظمة الصحة العالمية لم تكن موقفة أنها تحلل إنتشار المرض طبقا لضراوته
محمد موافى:طب يا دكتور خلينا نتكلم على الحجر الصحى ومدى التطور فى الحجر الصحى ؟
د/حاتم الجبلى : الحجر الصحى طبعا يعنى كان فى حالة ثبات عميق لأن معندهمش طلب يعنى يعنى معندهمش مشاكل بقالهم سنين وسنين وبعدين فجأه لقينا إن هما خط الدفاع الأول فطبعا جبنالهم الكاميرات الحراريه دى أللى ساعدتنا جدا فى أنها أخرت المرض شهرين أول حالة فى يونيه أبتدى المرض ينتشر داخليا فى أواخر أغسطس فكان أدتينا شهرين والشهرين دول فرقوا جدا معانا جدا النقطة التانيه أنى أحنا أنتدبنالهم ناس من بره وبعدين حاطينا قيادات جديدة فالحقيقة جانب مفيد أنها حركت حاجتين حركت الحجر الصحى
محمد موافى:نبهتنا ليه
د/حاتم الجبلى : أه طبعا
رشا مجدى: طب دكتور قبل ما نختم ممكن نقول إن مصر نجحت فى مواجهة الجائحة زى ما كنا بنقول أنفلونزا الخنازير بالنسبة لدول عديد يعنى نجحت أزاى ؟
د/حاتم الجبلى :أنا هقولك كلمة واحده نجحت نجاح باهر
رشا مجدى:ما هو دا أللى أنا عايز أقوله أحنا منجحناش فى أنفلونزا الطيور لأنها توطنت
د/حاتم الجبلى : لأ بصى أنفلونزا الطيور دى حاجة تانيه خلينا نتكلم على أنفلونزا أتش وان إن وان وبعدين نتكلم عن الطيور أتش وان إن وان أنا بحكم على النجاح بحاجتين أحنا فين والناس فين ؟ أنا عندى 3,3 حالة وفاه فى المليون وغيرى عنده 8 و 9 بلد زى الأرجنتين فيها 11و 11 حالة وفاه لكل مليون مواطن يعنى قدى 3 مرات وشويه أنفلونزا الطيور دى قضية تانيه ليه بقى ؟ لأنوا أنفلونزا الطيور دى مرتبطة بعادات بقالها 7 تلاف سنه مش هنقدر نغيرها فى سنتين أو تلاته إنما أنا ليا وجهة نظر وبقولها دايما لصديقى أمين أباظة لن تحل أنفلونزا الطيور إلا لو منعتى منعا تاما تربية الدواجن فى الدلتا وتوديها على الطريق الصحراوى ناحية قناة السويس فى سينا أو فى البحيرة أو وادى النطرون
محمد موافى:معالى وزير الصحة الدكتورحاتم الجبلى قطاع الصحة محتاج لكلام تانى لسه فنستأذن حضرتك فى حلقات أخرى الدكتور حام الجبلى شكرا جزيلا شكرا لمشاهدينا أتكلمنا عن أكتر من حاجة أتكلمنا عن الإسعاف والإسعاف الطائر وبنوك الدم ومعامل تحليل الدم والحجر الصحى وأنفلونزا الخنازير وأزاى تصدينا ليها قطاع الصحة لسه فيه كلام
رشا مجدى: لسه فيه كلام ولسه فيه حلقات وخدنا وعد من الدكتور /حاتم الجبلى أنوا هيكمل فى حلقات قادمة ولكن مشاهدينا الكرام أنتهت وقت حلقتنا اليوم نراكم على خير فى حلقات قادمة إن شاء ألله .