عفواً أساتذتي الأفاضل: نحن معيدين جامعة ولسنا عبيداً !!!

هناك الكثير من أساتذة الجامعة الشرفاء ولا ننكر , من يضرب لهم المثل في الشرف و كفاءتهم العلمية وحسن خلقهم, من يكونوا لنا بمنزلة الاب وغلاوته , من نبكيهم بالدموع إذا فقدناهم , وتظل بصماتهم العلمية أثراً خالداً لأجيال وأجيال قادمة.
ومع هذا نحن في حاجة لإجراء اختبار نفسي أو تقييم نفسي دوري على كل أعضاء هيئة التدريس, لعلاج "البعض منهم " من العقد النفسية التي تصيبهم جراء ظروف الحياة المعيشية القاسية ونكد وطلبات زوجاتهم ومشاكل أولادهم , فمن الجائز جداً أن يعاني أحدهم من عقدة طفولة كامنة يمكن تكون تنتجت عن ظلم أو قسوة والده عليه في صغره , وحان الوقت إن يخرج الكبت , وللأسف أختار أن يطلع عليك أنت...هتقول : وانا مالي وذنبي إيه ...ما يطلعه عالمدام او العيال ,ولكن للاسف هو ماقدرش على "...." ..وماقدموش غير البردعة .
يجب ان يُجرى الاختبار النفسي علينا نحن ايضاً , لأننا نخرج من تجربتي الماجستير والدكتوراة "مُعقدين ", ويا سلام لو مريت بتجربة حب فاشلة ولا اتنين كده عالماشي, هتكون أكيد "مجنون رسمي".
لذلك يجب عليكم أن تلحقونا قبل ما نفرم الطلبة اللي هيحطهم قدرهم الاسود تحت إيدينا , فالحقيقة المُرة, إن كثير ممن كان يشتكي من ظلم مشرفيه , فجأة تلبسه روح مشرفه "الله يجحمه " أول لما تتاح له الفرصة و يشرف على رسائل علمية .
والله المعيد ده إنسان نمرود وطماع , أنت هتتأمر مش كفاية إنك نلت شرف إن وافق يشرف عليك . فيها إيه يعني؟؟ لما تستحمل شوية ظلم أو تأخير أو تعديل مالوش لازمة في رسالتك أو حتى شغل مجاني في عيادته أو مكتبه الخاص أو تدخل المحاضرة بداله أو تصحح امتحانات مادته , أو حتى لو خد جزء من رسالتك وعمله بحث ونشره بإسمه لوحده وإنت وكأنك ما اجتهدت وبحثت ودورت , لتكون صدقت نفسك؟؟!! وإنك بقيت أستاذ و بتعرف تعمل أبحاث, دا انت من غير تعليماته وتوجيهاته البحثية هتغرق في شبر ميه وعمرك ما هتروح ولا هتيجي !!!
لكن كله اللي فات يهون أمام ابتزازات من نوع أخر نادرة بس موجودة وقليلات من تمتلكن الجرأة أن تفصح عنها , بعد ماتكون حاولت ردعه.. بالذوق.. باللين ...ما يصحش ..دانا متجوزة....دا انت راجل محترم و قد ابويا.....ويجي لحظة الانفجار و تديله على دماغه وتغور في ستين داهية وتتحرق بجاز "الرسالة والدراسة والكلية".
لسه حد بيسأل: لماذا لا يوجد ولا جامعة مصرية ضمن أفضل خمسمائة جامعة على مستوى العالم ؟؟ لماذا البحث العلمي في مصر متدني ولا ينهض بأمتنا؟؟
السابق سرده كان سبب واحد من أسباب كتيرة للإجابة عن سؤال تدهور البحث العلمي , وهو ايضاً مشكلة واحدة من مشاكلنا الكتيرة اللي بنطالب بحلها... لسه بقى حد بيتهمنا إن مطالبنا فئوية , وإحنا كمعيدين أو مدرسين مساعدين "مرفهين" و بنعاني من إيه؟؟؟؟
داليا أحمد
معيدة مقهورة مش باين لها مناقشة بعد