برلمان اللالا لاند

أسمعوا وعوا يا كرام
وأبدو أشد الأحترام
لريسنا البطل الهمام
وقوموا فذوا يلا قيام
وأضربوا تعظيم سلام
سيادته بدأ الكلام
في مجلس البرلمان
يا شعب مصر المحروس
عليكوا بالجزمه حدوس
و حاشتريكوا بالفلوس
يا شعب فقري و منحوس
فذ قوم مفيش جلوس
مبارك عليكم أنا
من تسعه وعشرين سنة
أعد في خيركوا هنا
عايش أنا وولادي في هناء
وأنتوا لجل ما تاكلوا الفول
بتروحوا تبيعوا الضنا
ومع بداية فترة جديدة
أوعدكوا حتكون مديدة
عايز فيها أعصابكوا شديدة
عشان حاتعيشوا فيها على الحديدة
تفطروا شقاء وتتعشوا مرارة
والغدا حيكون بالقطارة
و إياك أسمع كلمة معارضة
ده كلام هلس وكله أوانطا
أعد على قلبكو مش ماشي
و لو مش عجبك عادي مش ورطة
هي يدوبك حتة طلقة
أو حنفيك من هنا على ملطة
ومفيش مشاركة شعبية
ولا مطالبة بديمقراطية
ولا تقولي أحزاب سياسية
أنا هنا صوت الأغلبية
وأنتو يا شعبي عليه رازيه
لازم أحكمكوا بكف أديه
و أحاصركوا بالبلطجية
وعشان مستقبل أولادكم
وأحفادكم وأحفاد أحفادكم
بايعوني حاكم لبلدكم
لجل مشوه في تاريخها
و أغير كل ملمحها
وعلى كيفى أقسمها وأبيعها
و في كرشي أبلع منفعها
حد فيكو جاله أحباط
أو حاسس بأضطهاد
حابب يبدي أعتراض
لجل ما في السجن يتشاط
و يلحس بلسانو البلاط
رد يا شعب أعتباط
وسأفوا لحاكم البلاط
أشهد يا علمنا يا مرفوع
فوق أرض بلدنا وموجوع
أن الحكم ده غير مشروع
وأشهدي يا حضارة أجدادنا
أنه واكل خير أولادنا
و مستعمر بظلمه بلادنا
واشهدي يا شمس المحروسة
أنه دخلها و هي عروسه
و حيسبها في الطين مغروسة
واشهدي يا كتب التاريخ
على بلدنا إلي يماتي بتشيخ
من يوم ما دخلها المسيخ
و أشهد يا كتاب الرحمان
على شعب ماشي عميان
بقلة عقل و نقص أمان
مطاطي لظلم الحكام
لم الشعب ده يا سجان
و أرميه بقى خلف القطبان
ده شكله كدة أعلن العصيان
و حيقول حقوق الإنسان
فضكوا بقى من ده موال
وقوموا فضوا المجلس في الحال
و صدقوا بقى لو مهما انقال
سيبقى الوضع على ده الحال