ميمون ... ممنون

إكمني مواطن حقاني
و العيشة فبلدي عجباني
بأمانة و صدق و تفاني
عارضته فى كلمة أه ياني
إسمحلي يا أستاذي الفاضل
الخير بزيادة و كمان فاضل
ده فكل حتة و مش فاضل
غيرش أنت بس تقول عايز
أما صحيح جنابك مايص
قال إيه حاسس كدة بقسوة
يا عبيط ده طبور العيش عزوة
و جنون القوطة يا دوب نزوة
و فرضنا العيش مش لاقيينه
بلاها البلدي ... كلوه فينو
من دلعه راح قالي الزحمة
أما صحيح ده مفيش رحمة
ماهو من فرحتهم بالكوبري
اتزحموا عليه علشان مغري
شعب مين اللي جعان علطول ؟
و مين ده العايش عالفول ؟
دي الناس من فرط اللذه
بقوا يكلوا اللحمة و يحلوا بمزه
ماهو لولا المسئول أبو أروق بال
ماكنتش بلدنا في أحسن حال
تعليم مجان
و شقق إسكان
و العدل ميزان
في كفوفه القوه و الضعف سيان
طاوعني و إحسبها كدة من تاني
حكومة و سمعت قردها بيعاني
قبل ما يوعى و يقول ظلماني
فرشوا للقرد جنته سوداني ...