نفسى «أجيب» أنبوبة

صدرتوا الغاز بعت البوتاجاز       وصدق اللى قال اللى بيته من إزاز
لا أنا عارف أجيب أنبوبة            ولا عارف أدخل غاز
أزمة فى محافظة واحدة               وده حتى تبقى نشاز
نفسى أجيب أنبوبة                    وده أول الجهاز
لا أنا عارف أكون نفسى             ولا نافع حتى جواز
قلت أبدأ بباجور                       معرفتش أجيب الجاز
وتسأل فى المحافظة                  عند الأستاذ فواز
فواز ده راجل مسؤول                فى الحى وفى الجهاز
تسألوا عن الأزمة                      يقولك الأهلى فاز
الكورة بقت أهم                        من أكلة ع البوتاجاز
مش عايز خلاص                     أنبوبة وبلاها حتى جواز
ولا عايز أجيب عربية                ولا حتى سرير هزاز
أخبار حروب ودمار                  فى الراديو والتلفاز
وكفاية إنى مصرى                   وده فخر واعتزاز
محمد إمام