ضمير أبلة عفت

سيدة من زمن فاتن حمامة.. ربة أسرة سياسية بالفطرة.. يشهد أفرادها حروباً طاحنة.. تغلق الستار كل ليلة على مناقشات حول حكومة الثورة، وإضرابات العاملين، والضرائب، وموقف الرئاسة من الدستور، وتحطيم الأهرامات.. أبلة عفت انتخبت «مرسى».. الآن تشعر بالندم. أمس استيقظت تبكى على صوت الطائرات.. إليكم الحوار:
■ (حالة فزع) مالك يا ماما؟.. فيكى إيه؟!
■ الحرب هتقوم.. حركة الطائرات غير عادية.. منهم لله البعدا!
■ يا ماما دول بيتدربوا.. إمبارح المتحدث العسكرى قال ده فى بيان رسمى!
■ عمرنا ما سمعنا كده من سنين.. اللى بيحصل فى سينا، هيودينا فى داهية!
■ مش برضه حضرتك قولتى نديلهم فرصة.. قولتلك على الأقل أبطلى صوتك!
■ كفاية، ضميرى بيأنبنى.. باصلى الفجر، وبادعى ربنا يخلصنا!
■ كتييير عملوا كده.. إدوا أصواتهم لمجرد العند، فقط لا غير!
■ معلش الجايات أكتر من الرايحات.. مش هيشموها تانى!
■ إمتى إن شاء الله؟.. هيكونوا غيروا هوية البلد!
■ مش عارفة «مرسى» ساكت ليه؟.. بيعمل إيه؟!
■ شايف اللى هيحطم الهرم وساكت.. وشايف البلد بتضيع وساكت!
■ عمر مصر ما كانت كده فى أضعف حالاتها.. ولا أيام الإنجليز!
■ ههههه.. أيام الكفار، كانت دائنة لبريطانيا العظمى!
■ لأ، ودلوقتى بنشحت.. ومن مين؟.. من قطر؟!
■ الغريبة إن أمير قطر بيقول إنه بيمشّى كلامه على مصر؟!
■ القاعدة إن اللى يديلك تاكل يحكمك.. تبقى قطر، تبقى السعودية، مش مهم؟!
■ الناس هتعمل إيه؟.. الأسعار بقت نااااار.. ولسه عاوزين ضرايب؟!
■ الميزانية واقعة.. مفيش إنتاج، يبقى الحل فى الضرايب!
■ طيب والناس هتستحمل لحد إمتى؟.. فين الثورة؟!
■ الثورة بح.. تعيشى يا ماما وتفتكرى.. ثورتنا راحت فين؟!
■ مش عارفة ليه الدنيا اسودت كده؟.. كان عندنا أمل كبييير!
■ كل شىء راح وانقضى.. تعرفى تقوليلى فين دم الشهدا؟!
■ «مرسى» تعهد إنه هيجيب حقهم، يا يموت زيهم!
■ يا ماما.. دى زى أغنية «يسقط يسقط حكم العسكر» وغيرها!
■ كان يومها واقف جنبه ناس كتير بنصدقهم.. انتخبناه زيهم!
■ ههههه.. دول غسلوا إيدهم منه دلوقتى.. قالوا باى باى مرسى!
■ بعد إيه؟.. ورطووونا؟.. قالوا نعرف نشيله.. واختفوا!
■ كلام.. على رأى صباح.. ما باخدش منك غير كلام!
■ طيب والحل يا ابنى.. الثورة انهزمت؟!
■ اعتبريها كده.. جهزى حتتين دهب من جديد.. الثورة قادمة!
■ هوه إحنا هنفضى لبعض، ونسيب سينا تضييييع؟!
■ سيينا هتضيع أكتر، لو قعدنا كده، ويمكن البلد كلها تضيع!
■ بيقولوا «مرسى» اللى خلّا الجيش يوقف العملية نسر؟!
■ صحيح.. ورغم كده التكفيريين بيضربوا فى اتجاه إسرائيل!
■ ممكن يجروا شكل إسرائيل.. يبقى يومهم أسود ومنيل!
■ أى استفزاز لإسرائيل، هيكون ذريعة لضرب مصر.. والبادى أظلم!
■ عشان كده اترعبت من صريخ الطيران امبارح.. افتكرت الحرب قاااامت!
■ ناس كتير جريت ع البلكونات.. مرعوبين.. حرب إيه، لما نلاقى ناكل!