■ الحقيقة إننا بنرائى بعض لو نقول يوم الحقيقة لو ما نكدبشى فى حياتنا لو نراعى الله فى دينا لو نكون صادقين يا شعب لو نحب الخير لبعضينا ونمشى فى طريق الحق لو يسود العدل بينا لو ما يكون فيه ظالم ولا مظلوم كله حيعيش فى الأمان آه لو نبطل كدب ساعتها هيبقى الدين محبة ساعتها ح نعيش تحت راية التوحيد ونرضى الرب ونهتف من قلوبنا.. تحيا مصر.. تحيا مصر محمد جودت البحيرة ■ كلنا أقباط قبطى يعنى مصرى.. مصرى مسلم مسيحى.. طول عمرنا مؤمنين لكل واحد دين.. أكتوبر تلاتة وسبعين ف الخندق شمال يمين.. جرجس مينا حسين جنود شبان جدعان.. بيضحوا عشان مين علشان كلنا مصريين.. جارى ساكن قصادى اسمه جورج الفادى.. كل عيد ينادى يدخل بيتى يهادى.. كمان زمايل عملى فيهم أم شادى.. وش بشوش ونادى أكتر قلب صافى.. عم إسكندر مريض ع المستشفى أوام جريت.. من دمى أنا اديت رجعنا سوا للبيت.. عم إسكندر غالى بيسأل علىّ عيالى.. قبل عمى وخالى ألاقيه دايماً قبالى.. رغم كبر سنه مافيش حاجة تهمه.. إلا أنه مصرى والله محبة عنده.. كلنا أقباط قبطى يعنى مصرى مصرى مسلم مسيحى. أشرف أحمد الطويل ashrafsaleh.altaweel@gmail ■ الوطن للجميع.. ولله الدين.. نشأنا على تراب واحد.. ومن النيل شاربين.. شعب واحد.. نسيج واحد.. اشهد يا تاريخ.. الوحدة الوطنية حتمية.. من غير هتافات بصريخ.. الحب متبادل.. بين قداسة البابا وفضيلة الشيخ.. الود يجمعنا والحب الصادق عمره ما يوم بيشيخ.. يا شعب مصر العظيم أوعى يجرفك التيار.. عدونا واحد متربص لنا.. بالحديد والنار.. بالوحدة الوطنية نتماسك.. عدونا غدار.. هدفنا واحد.. مصيرنا واحد.. مافيش منه فرار. فؤاد عبدالرازق- موجه صحافة- الإسكندرية ■ لعبتكم لازم تخيب.. رب الهلال رب الصليب.. ومجروحين أو مرتاحين.. هو الشيطان أصبح طبيب.. مسلمين أو نصارى.. دولة مش لعبة إثارة.. دولة حرة عايزة تعلى.. عايزة ترجع للحضارة.. ياللى أمرك شىء عجيب شمس مين اللى تغيب.. ده اللى يوم النيل رواة.. يبقى تلميذة النجيب.. أهلنا آخر شطارة.. حب غاية فى الجدارة.. ياللى زرعت الشوك بايديك.. الحصاد ثمرة خسارة.. القلوب زى الحليب.. لا سميع ولا مجيب.. للى ودا كلام وجاب.. كل أنواع اللهيب. سامى عبدالبارى المصرية اللبنانية للصلب ■ هىّ النسمة الرايقة الصافية.. هىّّ البسمة ترد الروح.. هىّ الشمس الحلوة الدافية.. هىّ أمانك فين ما تروح.. جرب مرة وزورها تلاقى.. كل الناس بترحب بيك.. واشرب مية نيلها الساقى.. كل العالم من قبليك.. عيشلك فيها يومين واتهنا.. تلقاك عايش وسط الجنة.. تلقى فؤادك رق وغنا.. وبأسرار أمجادها تبوح.. أحلى بلاد الدنيا بلدنا.. بلد المصحف والإنجيل.. أعلى حضارة بنوها أجدادنا.. علم بينفع جيل ورا جيل.. م الفيوم للسد العالى.. م الأهرام للبرج العالى.. كل نجوم مصرنا بتلالى.. مصر الغالية كتاب مفتوح.. بين وديانها وبين صحاريها.. دوّر تِلقى كنوز وكنوز.. تِلقى الحب الصافى ماليها.. تِلقى العنبر والفيروز.. من أسوان لرشيد لمغاغة.. م المعمورة لحد الساغة.. كُرَما وعُلما وأهل بلاغة.. أجمل غنوة تداوى جروح.. هىّ النسمة الرايقة الصافية.. هىّ البسمة ترد الروح.. هىّ الشمس الحلوة الدافية.. هىّ أمانك فين ما تروح. أشرف عطية البلتاجى رابطة الزجالين وكتاب الأغانى