فلاح مسكت الفاس بإديا وسنانى.. فلاح فى وسط الناس وأرضى عاجبانى.. وإن كان فى وسط الصحرا بإيدى أزرعها وتبقى بستانى.. عينى عليكى يا بلدى خليتى اللى بيهدم أغلى من البانى.. خليتى أرض الغلابة تحرسها ناس كالديابة.. والعدل فى الإسلام لو كنت قبطى مسلم أو كنت نصرانى.. العدل هو الله.. والدين يا ناس لله..وحسابه عند الله.. والجهاد لله لكل ظالم فى بلدى أو فى بلد تانى.. ولا إله إلا الله محمد رسول الله.. وموسى رسول الله.. وعيسى رسول الله.. والراية للسلام مش حلم وأمانى..فلاح بيزرع كلام يسقيه بقلب وحنان يطرح محبة وسلام.. بالفعل مش بالكلام.. ولا بربابة وأغانى.. ويا ريتنى أقول ع الربابة.. وامشى وسط الغلابة.. إحنا منهم وبيهم.. أعيش فى وسطيهم.. وساعتها عمرى ما أعانى.. فاهم يا محترم.. ياللى ماسك القلم.. وبتدوس على الألم..للى يا ناس انحرم من نعمة التعليم والفهم مش بالكلام الفهم فى القرآن.. اقرا وشوف المعانى.. وإن كان الكلام المزوق يصلح حال العباد كنا بقينا أول بلد على البلاد وما كانش فيه مجنى، ولا كانش فيه جانى.. كفاية بقى عتاب وكفاية لوم م الصحاب.. فى الأول وفى الآخر لازم نكون أحباب عشان مراكبنا تمشى ونروح لرب الحساب هناك لسان عربى مش هندى وألمانى.. وخلينا فى دنيتنا نعمل لآخرتنا.. وايدى فى ايدك يا صاحبى نبنى سوا بتنا طوبة من الدنيا.. وطوبة للآخرة.. وننصر المظلوم ونصلح الظالم.. تلقى الحياة جنة مادام بحب وسلام.. ونبعد عن الأوهام ونطرد من بلادنا كل الناس اللئام. أبومحمد رضا عدلى