"حِبْ النَّاس"

ليه تِغْتِربْ وانتَ طُول عُمْرَكْ مِجَاورَكْ نَاس
عَايشْ وِ مِش حاسِسْ وَ لا يهِمَّكْ سُؤال ع النَّاس
إوعَاك تِقَاطِع " وِ"تْبِعْهُم" كِدِه و "تِنْسِهْ"
دِى العُزْله تِقْتِل و لو قَصْرَكْ بَنِيه م المَاس
******
اخْتَار لِنَفْسَك صَدِيق و اتْنِين و كُلّ النّاس
حِس بهُمومهُم، كِدَه ف هَمَّك تِحَاوطَك نَاس
دَا خسارة فيه الحَياه اللّى عِشِق رُوحُه
رَقّقْ فى قَلْبَك تِلاَقِى نَفْسَكْ فى وِسْط النّاس
******
مَا ترُوحْشى قاعْدِة بتِتسَلّى بِسِيرْة النّاس
مِن بَعْد ثَانية فى ضَهْرَكْ رَاح يحْكو عَلِيك للنّاس
دا الخَلْق حِلوة و جَمِيلة لو العِلاقة "لله"
واللّى يحَاسب قُلوبْهُم هوّ رَب النّاس
******
ياللّى أنت بِتْدَوَّرْ عَلَى شِلَّة فى إيدْهُم كَاس
عَايشِين لِرُوحْهُم و لو تَاجْرُو فى دَمْ النّاس
إوعَى تِكَابِرْ دَا فِيه عَدْل و نَاس حَوَاليك
بُكْرَه ها تِنْدَم و تِيجى تِبْكى ما تِلْقَا نَاس
******
يا نَاس ياللّى تِظُنُّو السُّوء بِكُل النّاس
دُولْ مِش غِيلان دُول بَشَر بِيْحِبُّوا بَرْضُه النَّاس
دُول مِشْ قُلوبهُم حَجَر وبيحْفُرُوا حُفْرَة
اخْلِص لِهُم مِن ضَميرَك و ارمى بَقى الوسْوَاس
******
الرِّزق اللّى أنت فِيه يِرجَع لرَب النّاس
سُبْحَانُه شَرَّعْ لِنَا نِدْفَعْ حِقُوق للنّاس
إوعَاك "تِمَاطِل" و"تسَتِّفْ" كِده فى مَالَك
مَالَك هَيِخْلَص و تِيجى تِمْشى ما تِلْقَا "مَدَاس"
******
عُمْرَك ما تِعْرَفْ تِخَطّط مِن غير ما تِسْأل نَاس
شَاوِرْ وحَاورْ واستأنِس ب رَأى النّاس
لو تِعْرَف النّاس تِلاقى كِنْز مَفْتوحْلَك
مَلْيَان نَصِيحَة و مَحَبّة مِن قَلْب كُل النّاس
******
ياللّى حِمُولْتَك تِقِيله و بتِخْفى كِتير ع النّاس
"فُكّ" بَقَه عَن هِمُومَك، قُوم "فَضْفَض" ل خِيرة النّاس
يا خُويا دَايمًا "مِزَرْبِن" و مِشْ رَاضِى بحُكْم الله
لاجل "تِهُون" "بَلْوِتَكْ" رُوحْ إسْمَع "بَلاوى" النّاس
******
قَاعِد "مِكَشَّرْ" لِوَاحدَك لو "ضَرَّكْ" وَاحِدْ م النّاس
دَا فى شَرْع مين دَه عَشان وَاحِد تِقَاطِع النّاس
إوعَى "تِكَرْكَرْ" لِوَاحْدَك لَيْقُولُو عَليك مَجنون
دَا الضِّحك عُمرُه ما ييجى إلا فى وِسْط النّاس
******
ياللّى انت عَامِل "إنِطْ" علَى كُل صَنْف النّاس
حَاطِطْلى ريشه عَلَى رَاسَكْ دُونَنْ ع النّاس
وبتِخْرَق الأرض لمَّا تِمْشى تِتْمَخْطَر
فَكَّر فى يُوم آخرِتَك رَاح ييجى فى يُوم تِندَاس
******
اللّى يحِب النّاس هَيْبَادلُوه "حِنِّيٍِّهْ"
"أهْلَكْ لا تُهْلَكْ" و لو كانو حِدَاكْ مِيّه
إوعَى تِقََاطِعْ و تعَاتِبْ كِدَه عَلى طُول
سَامِحْ ياعم الجميع "دا الدَّم مِش مَيِّهْ"
******
الغُربَه كُربَه ولو كَانت فى قَصر كِبير
و اللّمّه حِلْوه و لو كانت فى جُحْر صِغِير
ياسِيدى سِيبَكْ مِن الوحْدَه وحِب النّاس
إسأل عَليهُم و لاَ تِنْسَى يَتِيم و فَقِير
******
ياباشا حِب الغَلابِه و اسمع لِحَوَادِتْهُم
تَاخُد عِيونْهُم و تِتْمَتَّع بِقَاعدِتهم
"طَبْطَبْ" عَليهُم تِلاقِيهُم "فَرْفِشُوا" و يّاك
و تِبقه خَت الثواب و كسِبْت دَعْوِتهُم